လန်ချန်း-မဲခေါင် ပူးပေါင်းဆောင်ရွက်ရေး ၁၀ နှစ်ပြည့် အထိမ်းအမှတ် အခမ်းအနားသို့ မြန်မာနိုင်ငံဆိုင်ရာ တရုတ်သံအမတ်ကြီး မစ္စ Ma Jia တက်ရောက်

မြန်မာနိုင်ငံအစိုးရသည် မတ်လ ၅ ရက်က လန်ချန်း-မဲခေါင် ပူးပေါင်းဆောင်ရွက်ရေး ၁၀ နှစ်ပြည့် အထိမ်းအမှတ် အခမ်းအနားကို ကျင်းပခဲ့သည်။ မြန်မာနိုင်ငံနိုင်ငံတော် လုံခြုံရေးနှင့် အေးချမ်းသာယာရေးကော်မရှင် အဖွဲ့ဝင်၊ နိုင်ငံခြားရေးဝန်ကြီးဌာန ဝန်ကြီး ဦးသန်းဆွေနှင့် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး မစ္စ Ma Jia တို့ အမှာစကား ပြောကြားခဲ့သည်။ မြန်မာအစိုးရမှဝန်ကြီးနှင့် ဒုတိယဝန်ကြီး ၂၀ ကျော်၊ မြန်မာနိုင်ငံဆိုင်ရာ လာအို၊ ဗီယက်နမ်၊ ကမ္ဘောဒီးယား၊ ထိုင်းနိုင်ငံတို့မှသံအမတ်များနှင့် ကိုယ်စားလှယ်များ တက်ရောက်ခဲ့ကြသည်။

Ma Jia က လွန်ခဲ့သောဆယ်စုနှစ်အတွင်း လန်ချန်း-မဲခေါင်ဒေသခြောက်နိုင်ငံသည် အေးအတူ ပူအမျှ အသိုက်အဝန်း တည်ဆောက်ရာတွင် ခိုင်မာစွာ တွန်းအားပေးခဲ့ပြီး ဒေသဖွံ့ဖြိုးတိုးတက်ရေးနှင့် ဘုံစည်ပင်သာယာဝပြောရေးကို မြှင့်တင်ရာတွင် အရေးပါသောပံ့ပိုးကူညီမှုများ ပြုလုပ်နိုင်ခဲ့ကြောင်း၊ မတည်ငြိမ်မှုနှင့် ဖရိုဖရဲဖြစ်နေသောနိုင်ငံတကာအခြေအနေများကို ရင်ဆိုင်ရာတွင် နိုင်ငံခြောက်နိုင်ငံသည် ဒေသတွင်းငြိမ်းချမ်းရေးနှင့် ပြည်သူများ၏ချမ်းသာသုခအတွက် ထည့်သွင်းစဉ်းစားပြီး "လန်ချန်း-မဲခေါင် ပူးပေါင်းဆောင်ရွက်ရေး 2.0"ကို လက်တွဲပုံဖော်တည်ဆောက်ကာ ပိုမိုကောင်းမွန်သောအနာဂတ်ကို ဖန်တီးရမည်ဖြစ်ကြောင်း ပြောကြားသည်။

သန်းဆွေက နိုင်ငံခြောက်နိုင်ငံမှခေါင်းဆောင်များ၏ဦးဆောင်မှုအောက်တွင် လန်ချန်း-မဲခေါင် ပူးပေါင်းဆောင်ရွက်ရေးသည် နယ်ပယ်အသီးသီးတွင် ရလဒ်များစွာ ရရှိခဲ့ပြီး အအောင်မြင်ဆုံး မဲခေါင်ယန္တရားအဖြစ် ကြီးထွားလာကြောင်း၊ တရုတ်နိုင်ငံ၏ပံ့ပိုးကူညီမှုအတွက် လှိုက်လှဲစွာ ကျေးဇူးတင်ရှိပြီး အနာဂတ်တွင် လန်ချန်း-မဲခေါင် ပူးပေါင်းဆောင်ရွက်ရေး၏ ပိုမိုတောက်ပြောင်သည့် အောင်မြင်မှုများ ရရှိရန် မျှော်လင့်ကြောင်း ပြောကြားခဲ့သည်။

အခမ်းအနားတွင် လန်ချန်း-မဲခေါင် ပူးပေါင်းဆောင်ရွက်ရေးရလဒ်များဓာတ်ပုံပြပွဲလည်း ကျင်းပသည်။