တရုတ်နိုင်ငံက ၂၀၂၅ ခုနှစ်တွင် ရပ်ဝန်းနှင့်ပိုးလမ်းမ မိတ်ဖက်နိုင်ငံများနှင့် စီးပွားရေးပူးပေါင်းဆောင်ရွက်မှုများ နက်နက်ရှိုင်းရှိုင်းရှိခဲ့

တရုတ်နိုင်ငံ အရှေ့ပိုင်း ကျန်းဆူးပြည်နယ် နန်ကျင်းမြို့ရှိ နန်ကျင်းဆိပ်ကမ်း လုံထန် ကုန်သေတ္တာတင်ချဆိပ်ခံတံတားအား ၂၀၂၅ ခုနှစ် ဒီဇင်ဘာ ၃၁ ရက်က တွေ့ရစဉ် (ဆင်ဟွာ)

တရုတ်နိုင်ငံ၏ စက်မှုနှင့် ကူးသန်းရောင်းဝယ်ရေး‌လုပ်ငန်းများသည် ၂၀၂၅ ခုနှစ်တွင် ကုန်သွယ်ရေး၊ ရင်းနှီးမြှုပ်နှံမှုနှင့် စက်မှုလုပ်ငန်းကဏ္ဍများ၌ ရပ်ဝန်းနှင့်ပိုးလမ်းမ မိတ်ဖက်နိုင်ငံများနှင့် လက်တွေ့ပူးပေါင်းဆောင်ရွက်မှုများ နက်နက်ရှိုင်းရှိုင်းရှိခဲ့သည်ဟု တရုတ်နိုင်ငံ နိုင်ငံတကာကုန်သွယ်မှု မြှင့်တင်ရေးကောင်စီက ထုတ်ပြန်သော အချက်အလက်များအရ သိရသည်။
လွန်ခဲ့သောနှစ်အတွင်း အဆိုပါကောင်စီက ရပ်ဝန်းနှင့်ပိုးလမ်းမ မိတ်ဖက်နိုင်ငံများသို့ ခရီးစဉ် ၂၂၈ ခု အပါအဝင် စီးပွားရေးကိုယ်စားလှယ်အဖွဲ့ခရီးစဉ် ၄၀၇ ခု စီစဉ်ခဲ့ကာ တရုတ်စီးပွားရေးအသိုင်းအဝိုင်းအတွက် ချိတ်ဆက်ဆောင်ရွက်မှု ခိုင်မာအားကောင်းစေရန် ပံ့ပိုးပေးခဲ့ကြောင်း သိရသည်။

အဆိုပါ ကောင်စီသည် ၂၀၂၅ ခုနှစ်အတွင်း ရပ်ဝန်းနှင့်ပိုးလမ်းမ မိတ်ဖက်နိုင်ငံ ၄၃ နိုင်ငံတွင် ပြည်ပပြပွဲပြသမှု အစီအစဉ်ပေါင်း ၇၀၇ ခုကို ခွင့်ပြုပေးခဲ့ကာ ပြပွဲဧရိယာအားဖြင့် စတုရန်းမီတာ ၃၆၀,၀၀၀ ရှိခဲ့ပြီး ကုမ္ပဏီပေါင်း ၂၆,၅၀၀ ခန့် ပါဝင်ပြသခဲ့သည်။
ကုန်သွယ်မှု အဆင်ပြေချောမွေ့စေရေးအတွက် တရုတ်နိုင်ငံ၏ နိုင်ငံလုံးဆိုင်ရာ ကုန်သွယ်မှုမြှင့်တင်ရေးစနစ်က ၂၀၂၅ ခုနှစ် ပထမ ၁၁ လအတွင်း ရပ်ဝန်းနှင့်ပိုးလမ်းမ မိတ်ဖက်နိုင်ငံများအတွက် မူလထောက်ခံချက် ၄.၉၉ သန်းနှင့် စီးပွားရေးဆိုင်ရာထောက်ခံချက် ၅၅၉,၆၀၀ တို့ကို ထုတ်ဝေပေးခဲ့သည်ဟု ယင်းကောင်စီထံမှ သိရသည်။
“မိမိတို့အနေနဲ့ ၂၀၂၆ ခုနှစ်မှာလည်း ရပ်ဝန်းနဲ့ပိုးလမ်းမ မိတ်ဖက်နိုင်ငံတွေဆီ သွားရောက်မယ့် တရုတ်စီးပွားရေး ကိုယ်စားလှယ်အဖွဲ့ ခရီးစဉ်တွေကို ဆက်လက်စီစဉ်သွားမှာပါ” ဟု အဆိုပါကောင်စီ၏ ပြောရေးဆိုခွင့်ရှိသူ ဝမ်ဝန်ရှိုက်က ပြောကြားခဲ့သည်။