ပထမဆုံးအကြိမ် လန်ချန်း-မဲခေါင်နိုင်ငံများ သိပ္ပံနည်းပညာ ဆန်းသစ်တီထွင်မှုပြိုင်ပွဲ စတင်ကျင်းပ

ယခုရက်ပိုင်းများတွင် "လန်ချန်း-မဲခေါင်ဒေသ၌ ဉာဏ်ပညာ စုဝေး၍ မျှဝေသောအနာဂတ်ကို ဖန်တီးခြင်း"ခေါင်းစဉ်ဖြင့် ပထမဆုံးအကြိမ် လန်ချန်း-မဲခေါင်နိုင်ငံများ သိပ္ပံနှင့် နည်းပညာ ဆန်းသစ်တီထွင်မှုပြိုင်ပွဲ၏ပဏာမအဆင့်ကို တရုတ်နိုင်ငံ ယူနန်ပြည်နယ်၊ ရှန်ဟိုင်းမြို့နှင့် ထိုင်းနိုင်ငံ ဘန်ကောက်မြို့တို့တွင် တစ်ပြိုင်နက်တည်း စတင်ခဲ့သည်။ ပြိုင်ပွဲသည် လန်ချန်း-မဲခေါင်ဒေသမှ ဆန်းသစ်တီထွင်မှုဆိုင်ရာဉာဏ်ပညာများကို စုဆောင်းရန်၊ သိပ္ပံနည်းပညာ ပူးပေါင်းဆောင်ရွက်မှုနှင့် ရလဒ်များ အသွင်ပြောင်းလဲခြင်းကို နက်ရှိုင်းစေရန်နှင့် ဒေသတွင်း ဖွံ့ဖြိုးတိုးတက်မှုအနာဂတ်သစ်ကို ပူးတွဲတည်ဆောက်ရန် ရည်ရွယ်ပါသည်။

ယခုပြိုင်ပွဲသည် လန်ချန်း-မဲခေါင်ခြောက်နိုင်ငံမှ ရှေ့ပြေးသိပ္ပံနည်းပညာ ဆန်းသစ်တီထွင်မှု ပရောဂျက်များကို ကျယ်ကျယ်ပြန့်ပြန့် ဖိတ်ခေါ်စုစည်းလျက်ရှိပြီး ၎င်းပရောဂျက်များ၏ မူရင်းအရင်းအမြစ်များမှာ တက္ကသိုလ်များ၊ သုတေသနအဖွဲ့အစည်းများနှင့် ကုမ္ပဏီလုပ်ငန်းများအထိ ကျယ်ပြန့်စွာ ပါဝင်သည်။ ပြိုင်ပွဲသည် ဇီဝဆေးပညာ၊ ခေတ်မီစိုက်ပျိုးရေး၊ ကုန်ကြမ်းပစ္စည်းအသစ်များ၊ ဥာဏ်ရည်တုနှင့် အစိမ်းရောင် ရေရှည်ဖွံ့ဖြိုးတိုးတက်မှု စသည့် ဒေသတွင်း ဘုံအာရုံစိုက်သော အဓိကထုတ်လုပ်မှုနယ်ပယ်များကို အဓိကထားသည်။ လုပ်ငန်းအုပ်စုနှင့် အဖွဲ့အုပ်စု ဟူ၍ လမ်းကြောင်းနှစ်သွယ် ခွဲခြားထားပြီး ပဏာမအဆင့်၊ ဆီမီးဖိုင်နယ်နှင့် ဗိုလ်လုပွဲ ဟူ၍ အဆင့်သုံးဆင့်ဖြင့် အနိုင်ရရှိသူများကို ရွေးချယ်မည်ဖြစ်သည်။ ပြိုင်ပွဲ စတင်မှတ်ပုံတင်ချိန်မှစ၍ ခြောက်နိုင်ငံမှ အရည်အသွေးမြင့် ပရောဂျက်အများအပြား ပါဝင်လာခဲ့ပြီး ၎င်းတို့အနက် ပြည်ပပရောဂျက်များ၏ အချိုးအစားမှာ သိသိသာသာ မြင့်မားနေကာ အဆိုပါပြိုင်ပွဲ၏ နိုင်ငံတကာဆိုင်ရာသက်ရောက်မှုအား ထင်ဟပ်လျက်ရှိပါသည်။

ပြိုင်ပွဲ၏ပဏာမအဆင့်တွင် "အွန်လိုင်း အမည်မသိ အကဲဖြတ်ရွေးချယ်ခြင်း"ယန္တရားကို အသုံးပြုခဲ့ပြီး အကဲဖြတ်အဖွဲ့တွင် လန်ချန်း-မဲခေါင်ခြောက်နိုင်ငံမှ ဝါရင့်သောနည်းပညာကျွမ်းကျင်သူ၊ သက်ဆိုင်ရာလုပ်ငန်း ဩဇာရှိပုဂ္ဂိုလ်များနှင့် ရင်းနှီးမြှုပ်နှံသူများ စုစုပေါင်း ၄၅ ဦး ပါဝင်ခဲ့သည်။ အကဲဖြတ်ရွေးချယ်မှုသည် အွန်လိုင်း အမည်မသိ အကဲဖြတ်ရွေးချယ်သည့်စနစ်ကို အသုံးပြု၍ ပရောဂျက်ပိုင်ရှင်အချက်အလက်အားလုံးကို လျှို့ဝှက်ထားသည့်အခြေအနေအောက်တွင် ပရောဂျက်၏ နည်းပညာဆန်းသစ်မှု၊ ဈေးကွက်အသုံးချအလားအလာနှင့် ဒေသဖွံ့ဖြိုးရေးအတွက် အထောက်အကူပြုမှုတန်ဖိုး စသည့်ရှုထောင့်များမှ ဆန်းစစ်အကဲဖြတ်ခြင်းဖြင့် ပြိုင်ပွဲရလဒ်များ၏ ဓမ္မဓိဋ္ဌာန်ကျမှုနှင့် တရားမျှတမှုကို သေချာစေပါသည်။ ပဏာမအဆင့်မှ ရွေးချယ်ခံရသူများစာရင်းကို ပြိုင်ပွဲ၏ဝက်ဘ်ဆိုက်တွင် တရားဝင်ကြေညာမည်ဖြစ်ပါသည်။