မြန်မာနိုင်ငံ၏ စီးပွားရေးနှင့် လူမှုဖွံ့ဖြိုးတိုးတက်ရေးတွင် တရုတ်လုပ်ငန်းများ၏ အခန်းကဏ္ဍ ပိုမိုတိုးမြင့်လာရန် ရည်မှန်း

မြန်မာနိုင်ငံ တရုတ်စက်မှုလက်မှုလုပ်ငန်းရှင်များအသင်း (CECCM) အဖွဲ့သစ် တာဝန်ထမ်းဆောင်ခြင်းအခမ်းအနားနှင့် တရုတ်-မြန်မာ စီးပွားရေးနှင့်ကူးသန်းရောင်းဝယ်ရေး ပူးပေါင်းဆောင်ရွက်မှု ဖလှယ်ရေးအခမ်းအနားတွင် အမှာစကားပြောကြားနေသော မြန်မာနိုင်ငံ အမျိုးသားစီမံကိန်း၊ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ဒုတိယဝန်ကြီး ဦးသန့်စင်လွင်အား ၂၀၂၆ ခုနှစ် စက်တင်ဘာ ၂၉ ရက်က တွေ့ရစဉ်

မြန်မာနိုင်ငံ၏ စီးပွားရေးနှင့် လူမှုရေးကဏ္ဍများတွင် မကြာသေးမီနှစ်များအတွင်း တရုတ်စီးပွားရေးလုပ်ငန်းများက  ၎င်းတို့၏ လုပ်ငန်းအခြေချမှုများကို ပိုမိုချဲ့ထွင်လာခဲ့ကြသလို အခြေခံအဆောက်အအုံ၊ စွမ်းအင်သစ်၊ ဘဏ္ဍာရေးနှင့် အခြားကဏ္ဍများ၌ တရုတ်-မြန်မာ ကော်ပိုရိတ်ပူးပေါင်းဆောင်ရွက်မှုအပေါ် ပြည်တွင်းစီးပွားရေးအသိုင်းအဝိုင်းများ၏ ယုံကြည်မှုကိုလည်း မြှင့်တင်ပေးလျက်ရှိကြောင်း သိရသည်။

အပြန်အလှန်အကျိုးရှိပြီး အပြန်အလှန်မှီခိုအားထားမှုရှိသော တရုတ်-မြန်မာ ပူးပေါင်းဆောင်ရွက်မှုမှာ အစိုးရအဆင့်နှင့် စီးပွားရေးလုပ်ငန်းအဆင့်အထိ နှစ်ရပ်စလုံးတွင် သိသာထင်ရှားသော တိုးတက်မှုများ ရရှိခဲ့ကြောင်း အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ဒုတိယဝန်ကြီး ဦးသန့်စင်လွင်က ပြောကြားခဲ့သည်။

တရုတ်နိုင်ငံသည် မြန်မာနိုင်ငံ၏ ကာလရှည်ကြာ အကြီးဆုံးကုန်သွယ်ဖက်နိုင်ငံဖြစ်သကဲ့သို့ မြန်မာနိုင်ငံသို့ နိုင်ငံခြားရင်းနှီးမြှုပ်နှံမှု အများဆုံးပြုလုပ်သည့်နိုင်ငံလည်း ဖြစ်ကြောင်း ၎င်းက မှတ်ချက်ပြုခဲ့သည်။ “မြန်မာနိုင်ငံအနေနဲ့ အမျိုးသားစီးပွားရေး ဖွံ့ဖြိုးတိုးတက်မှုကို အားဖြည့်ပေးဖို့ နိုင်ငံခြားရင်းနှီးမြှုပ်နှံသူတွေကို ဆွဲဆောင်ရေးအတွက် ကြိုးပမ်းနေတဲ့အချိန်မှာ တရုတ်နိုင်ငံက မြန်မာနိုင်ငံရဲ့ ရင်းနှီးမြှုပ်နှံမှုမြှင့်တင်ရေး ဦးစားပေးစာရင်းရဲ့ ထိပ်ဆုံးမှာရှိနေပါတယ်” ဟု ဦးသန့်စင်လွင်က ထပ်လောင်းပြောကြားခဲ့သည်။

ရန်ကုန်မြို့တွင် စက်တင်ဘာ ၂၉ ရက်က ကျင်းပခဲ့သော မြန်မာနိုင်ငံ တရုတ်စက်မှုလက်မှုလုပ်ငန်းရှင်များအသင်း (CECCM) အဖွဲ့သစ် တာဝန်ထမ်းဆောင်ခြင်း အခမ်းအနားနှင့် တရုတ်-မြန်မာ စီးပွားရေးနှင့် ကူးသန်းရောင်းဝယ်ရေးပူးပေါင်းဆောင်ရွက်မှု ဖလှယ်ရေးအခမ်းအနားတွင် ဦးသန့်စင်လွင်က အထက်ပါအတိုင်းမှတ်ချက်ပြုပြောကြားခဲ့ခြင်း ဖြစ်သည်။ 

ထို့ပြင် မြန်မာနိုင်ငံ၏ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ ညွှန်ကြားရေးမှူး ဒေါ်ယဉ်ယဉ်နွယ်က တရုတ်-မြန်မာ စီးပွားရေးစင်္ကြံနှင့် ကျောက်ဖြူ ရေနက်ဆိပ်ကမ်း တို့ကို ကိုးကား၍ ထိုကဲ့သို့သော နှစ်နိုင်ငံပူးပေါင်းဆောင်ရွက်မှုများက ယင်းစင်္ကြံတစ်လျှောက်ရှိ ထောက်ပံ့ပို့ဆောင်ရေး၊ သိုလှောင်ရုံနှင့် သယ်ယူပို့ဆောင်ရေး ကွန်ရက်များကို အဆင့်မြှင့်တင်ခြင်း၊ မဟာဗျူဟာမြောက် ဒေသတွင်းပင်လယ်ရေကြောင်း ကုန်သွယ်မှုလမ်းကြောင်းများကို ဖွင့်လှစ်ခြင်းနှင့် စက်မှုဇုန်များ ဖွံ့ဖြိုးတိုးတက်ရေးကို အားပေးထောက်ကူခြင်း စသည်တို့မှတစ်ဆင့် အပြန်အလှန် အကျိုးစီးပွားများနှင့် စီးပွားရေးဖွံ့ဖြိုးတိုးတက်မှုကို အဆင့်မြှင့်တင်ပေးလျက်ရှိကြောင်း ပြောကြားခဲ့သည်။

တရုတ်နိုင်ငံ၏ ရင်းနှီးမြှုပ်နှံမှုများသည် မြန်မာနိုင်ငံအတွင်းရှိ ဒေသခံစက်မှုလုပ်ငန်းကဏ္ဍ၌ အလုပ်အကိုင်အခွင့်အလမ်းများ ဖန်တီးပေးနိုင်ခဲ့သည့်အပြင် နည်းပညာပူးပေါင်းဆောင်ရွက်မှုကိုလည်း မြှင့်တင်ပေးနိုင်ခဲ့ပြီး ကုန်ထုတ်လုပ်မှုစွမ်းဆောင်ရည်ကိုလည်း တိုးတက်စေခဲ့ကြောင်း မြန်မာနိုင်ငံ ရင်းနှီးမြှုပ်နှံမှုဝန်ဆောင်မှုစင်တာမှ ဒါရိုက်တာ U Gu Tar April က ပြောကြားခဲ့သည်။ ထို့အပြင် တရုတ်နိုင်ငံ၏ စွမ်းအင်ကဏ္ဍရင်းနှီးမြှုပ်နှံမှုများကြောင့် လျှပ်စစ်မီးရရှိနိုင်မှု မြှင့်တင်ပေးပြီး ဒေသတွင်း ထုတ်လုပ်မှုစွမ်းရည်လည်း မြင့်တက်လာကြောင်း ၎င်းက ထောက်ပြခဲ့သည်။

ထို့အပြင် ရှေ့ဆက်၍လည်း ပြည်တွင်းစီးပွားရေးအသိုင်းအဝိုင်းများအနေဖြင့် အစိမ်းရောင်စွမ်းအင်၊ ဘဏ္ဍာရေးနှင့် အခြားကဏ္ဍများတွင် နှစ်ဖက်အကျိုးကျေးဇူးများပြားသော ပူးပေါင်းဆောင်ရွက်မှု မြှင့်တင်ရန် မြန်မာနိုင်ငံ၌ စီးပွားရေးလုပ်ငန်းဆောင်ရွက်နေသော တရုတ်ကုမ္ပဏီများနှင့် ပိုမိုနီးကပ်စွာ မိတ်ဖက်ဆောင်ရွက်ရန် စိတ်ဝင်စားလျက်ရှိသည်။ 

မြန်မာနိုင်ငံသည် စွမ်းအင်သစ် ဖွံ့ဖြိုးတိုးတက်ရေးကို မြှင့်တင်ဆောင်ရွက်နေခြင်းဖြစ်သလို တရုတ်နိုင်ငံအနေဖြင့်လည်း ယင်းကဏ္ဍ၌ ကမ္ဘာ့ဦးဆောင်နိုင်ငံ တစ်နိုင်ငံအဖြစ် ရပ်တည်လျက်ရှိပေသည်။ “ကျွန်မတို့အနေနဲ့ နေရောင်ခြည်စွမ်းအင်၊ လျှပ်စစ်ယာဉ်တွေနဲ့ နေရောင်ခြည်စွမ်းအင်ဆိုင်ရာ ထုတ်ကုန်တွေ စတဲ့ကဏ္ဍတွေမှာ ပူးပေါင်းဆောင်ရွက်နိုင်ပါတယ်” ဟု ဒေါ်ယဉ်ယဉ်နွယ်က ပြောကြားခဲ့သည်။

ဘဏ္ဍာရေးချိတ်ဆက်မှုနှင့်စပ်လျဉ်း၍လည်း မြန်မာနိုင်ငံ၌ တရုတ်ယွမ်ငွေ (RMB) အသုံးပြုနိုင်မည့် အလားအလာရှိသော လုပ်ငန်းကဏ္ဍများတွင် CMP စီးပွားရေးလုပ်ငန်းများ၏ ငွေပေးချေမှုများ၊ ကုန်စည် အမြောက်အမြား ရောင်းဝယ်ရာ၌ ငွေပေးချေမှုများနှင့် လက်လီဘဏ်လုပ်ငန်းများ စသည်တို့ပါဝင်ကြောင်း တရုတ် စက်မှုနှင့် ကူးသန်းရောင်းဝယ်ရေးဘဏ် (ICBC) ထံမှ သိရသည်။

စက်တင်ဘာ ၂၉ ရက်တွင် ကျင်းပသော ထိုအခမ်းအနား၌ ICBC ဘဏ်က CECCM ၏ အသစ်ရွေးချယ်ခံရသော ဥက္ကဋ္ဌအဖွဲ့အစည်းအဖြစ် တာဝန်ယူခဲ့သည်။ အနာဂတ်ကာလတွင် ဘဏ္ဍာရေးကွန်ရက်ချိတ်ဆက်မှု၊ အခြေခံအဆောက်အအုံ ချိတ်ဆက်မှု၊ စက်မှုလုပ်ငန်း အဆင့်မြှင့်တင်မှုနှင့် ကုန်သွယ်မှု ချောမွေ့စွာ လည်ပတ်နိုင်မှုူတို့ကို အလေးထားဆောင်ရွက်ခြင်းဖြင့် တရုတ်နိုင်ငံနှင့် မြန်မာနိုင်ငံအကြား စီးပွားရေးနှင့် ကုန်သွယ်ရေးပေါင်းကူးတံတားကို ပိုမိုခိုင်မာအောင် ဆောင်ရွက်သွားမည်ဖြစ်ကြောင်း အဆိုပါ ဘဏ်ခွဲအကြီးအကဲ လျိုမင် က ပြောကြားခဲ့သည်။

“သဘာဝသယံဇာတအရင်းအမြစ်တွေ လုပ်သားအင်အား ပေါများကြွယ်ဝတဲ့ မြန်မာနိုင်ငံရဲ့ ဈေးကွက်အလားအလာကို ဒေသတွင်း စီးပွားရေးပေါင်းစည်းမှု အရှိန်မြင့်တက်လာတာနဲ့အမျှ ပိုမိုဖော်ထုတ်အသုံးချနိုင်မှာဖြစ်ပါတယ်” ဟု လျို က ပြောကြားခဲ့သည်။

မြန်မာနိုင်ငံ ရန်ကုန်မြို့တွင် မြန်မာ့မော်တော်ကားနှင့် အပိုပစ္စည်းပြပွဲ ၂၀၂၅ ၌ BYD ပြခန်းသို့ လာရောက်လေ့လာသူများအား ၂၀၂၅ ခုနှစ်စက်တင်ဘာ၁၂ ရက်က တွေ့ရစဉ်