ကမ္ဘောဒီးယားနိုင်ငံနှင့် မြန်မာနိုင်ငံတို့က နှစ်နိုင်ငံပူးပေါင်းဆောင်ရွက်မှု မြှင့်တင်ရန် သဘောတူစာချုပ် ၄ ခု လက်မှတ်ရေးထိုး

ကမ္ဘောဒီးယားနိုင်ငံ ဖနွမ်းပင်မြို့ရှိ ငြိမ်းချမ်းရေးနန်းတော်၌ ကမ္ဘောဒီးယားနိုင်ငံဝန်ကြီးချုပ် ဟွန်မန်နက် (ရှေ့တန်း၊ ယာဘက်ဒုတိယ) နှင့်ခရီးစဉ်ရောက်ရှိနေသော မြန်မာနိုင်ငံသမ္မတ ဦးမင်းအောင်လှိုင် (ရှေ့တန်း၊ ယာဘက်တတိယ) တို့ လက်မှတ်ရေးထိုးပွဲအခမ်းအနားကိုအတူသက်သေပြုတက်ရောက်ကြသည်ကို ၂၀၂၆ ခုနှစ် စက်တင်ဘာလ ၁၁ ရက်က တွေ့ရစဉ်

ကမ္ဘောဒီးယားနိုင်ငံနှင့် မြန်မာနိုင်ငံတို့သည် ကုန်သွယ်ရေး၊ ရင်းနှီးမြှုပ်နှံမှု၊ ယဉ်ကျေးမှုနှင့် မီဒီယာကဏ္ဍများတွင် နှစ်နိုင်ငံပူးပေါင်းဆောင်ရွက်မှုကို ခိုင်မာအားကောင်းစေရန် စက်တင်ဘာ ၁၁ ရက်တွင် သဘောတူစာချုပ် လေးခုကို လက်မှတ်ရေးထိုးခဲ့ကြောင်း ကမ္ဘောဒီးယား ဝန်ကြီးချုပ် ဟွန်မန်နက်က ပြောကြားခဲ့သည်။ 

အဆိုပါ လက်မှတ်ရေးထိုးပွဲအခမ်းအနားကို ဖနွမ်းပင်မြို့ရှိ ငြိမ်းချမ်းရေးနန်းတော်၌ ဟွန်မန်နက်နှင့် ခရီးစဉ်ရောက်ရှိနေသော မြန်မာနိုင်ငံ သမ္မတ ဦးမင်းအောင်လှိုင်တို့၏ နှစ်နိုင်ငံဆွေးနွေးပွဲအပြီးတွင် ကျင်းပခဲ့ခြင်းဖြစ်သည်။ 

ဟွန်မန်နက်က လူမှုမီဒီယာပလက်ဖောင်း၌ သဘောတူညီချက်အကြောင်းအရာများကို အသေးစိတ်ဖော်ပြခဲ့ရာ ၎င်းတို့အနက် နှစ်ထပ်အခွန်ကောက်ခံမှု ဖယ်ရှားရေး၊ အပြန်အလှန်ရင်းနှီးမြှုပ်နှံမှုများ မြှင့်တင်ရေးနှင့် ကာကွယ်ရေး၊ ယဉ်ကျေးမှုဆိုင်ရာ ပူးပေါင်းဆောင်ရွက်မှု ပြင်ဆင်ချက်၊ မီဒီယာနှင့် သတင်းအချက်အလက်ဆိုင်ရာ နားလည်မှုစာချွန်လွှာ (MoU) တို့ ပါဝင်သည်။ 

ဦးမင်းအောင်လှိုင်သည် နှစ်ရက်ကြာ နိုင်ငံတော်အဆင့် ခရီးစဉ်အဖြစ် စက်တင်ဘာ ၁၁ ရက် နံနက်ပိုင်းတွင် ကမ္ဘောဒီးယားမြို့တော်သို့ ရောက်ရှိခဲ့သည်။ ထိုနေ့အစောပိုင်းတွင် ၎င်းသည် ကမ္ဘောဒီးယား အထက်လွှတ်တော်ဥက္ကဋ္ဌနှင့် ယာယီနိုင်ငံတော်အကြီးအကဲဖြစ်သူ ဆမ်ဒက် တက်ချို ဟွန်ဆန်နှင့် အဆင့်မြင့်ဆွေးနွေးပွဲများ ပြုလုပ်ခဲ့သည်။ 

မြန်မာနိုင်ငံ သမ္မတသည် စက်တင်ဘာ ၁၂ ရက်တွင် ကမ္ဘောဒီးယားနိုင်ငံ အနောက်မြောက်ဘက် ဆီယမ်ရိ(ပ်)ပြည်နယ်ရှိ ယူနက်စကို (UNESCO) စာရင်းဝင်ဖြစ်သော အန်ကော ရှေးဟောင်းသုတေသနဥယျာဉ်သို့ သွားရောက်လေ့လာကာ ၎င်း၏ခရီးစဉ်ကို အဆုံးသတ်ရန် စီစဉ်ထားကြောင်း သိရသည်။

ကမ္ဘောဒီးယားနိုင်ငံ ဖနွမ်းပင်မြို့၌ ကမ္ဘောဒီးယားအထက်လွှတ်တော်ဥက္ကဋ္ဌနှင့် ယာယီနိုင်ငံတော်အကြီးအကဲ ဆမ်ဒက် တက်ချို ဟွန်ဆန်ကဧည့်ခံကျင်းပသည့် ကြိုဆိုရေးအခမ်းအနားသို့ မြန်မာနိုင်ငံ သမ္မတ ဦးမင်းအောင်လှိုင် (ဝဲ) တက်ရောက်လာသည်ကို ၂၀၂၆ ခုနှစ် စက်တင်ဘာ၁၁ရက်က တွေ့ရစဉ်