မြန်မာနိုင်ငံက ရင်းနှီးမြှုပ်နှံမှုစီမံကိန်းသစ် ၁၄ ခု အတည်ပြု၊ အလုပ်အကိုင် ၃,၃၃၆ ခု ဖန်တီးပေးနိုင်

မြန်မာနိုင်ငံ ရန်ကုန်မြို့ရှိ အထည်ချုပ်စက်ရုံတစ်ရုံတွင် ပြည်ပတင်ပို့မည့်အထည်များ ချုပ်နေသည့် ဝန်ထမ်းများကို ၂၀၂၃ ခုနှစ် မေ ၁၂ ရက်ကတွေ့ရစဉ်

မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) က ရင်းနှီးမြှုပ်နှံမှုစီမံကိန်းသစ် ၁၄ ခုကို အတည်ပြုခဲ့ကြောင်း နိုင်ငံပိုင်နေ့စဉ်ထုတ် The Global New Light of Myanmar သတင်းစာက ဩဂုတ် ၁၅ ရက်တွင် သတင်းဖော်ပြခဲ့သည်။

MIC က နေပြည်တော်တွင် ဩဂုတ် ၁၄ ရက်က ကျင်းပသည့် အစည်းအဝေး၌ လက်ရှိရင်းနှီးမြှုပ်နှံမှုများ၏ အရင်းအနှီးတိုးမြှင့်မှုမှ နိုင်ငံခြားရင်းနှီးမြှုပ်နှံမှုစီမံကိန်းသစ် နှစ်ခုနှင့် စက်မှုလုပ်ငန်း၊ ဝန်ဆောင်မှုလုပ်ငန်း၊ လျှပ်စစ်ဓာတ်အားနှင့် အိမ်ရာကဏ္ဍများ၌ ပြည်တွင်းရင်းနှီးမြှုပ်နှံမှုစီမံကိန်းသစ် ၁၂ ခုကို အတည်ပြုခဲ့ကြောင်း အဆိုပါသတင်းတွင် ဖော်ပြထားသည်။

ထို့ပြင် စုပေါင်းရင်းနှီးမြှုပ်နှံမှုအနေဖြင့် နိုင်ငံခြားရင်းနှီးမြှုပ်နှံမှုများအတွက် အမေရိကန်ဒေါ်လာ ၁၄၀.၄၇၄ သန်းရှိပြီး ပြည်တွင်းစီမံကိန်းများအတွက် ကျပ်ငွေ ၁.၁၇၈၇ ထရီလီယံကျော်ရှိကြောင်း၊ ယင်းစီမံကိန်းများမှာ အလုပ်အကိုင် ၃,၃၃၆ ခုကို ဖန်တီးပေးနိုင်မည်ဟု မျှော်မှန်းထားကြောင်း သတင်း၌ ဖော်ပြထားသည်။

MIC အနေဖြင့် ပြည်တွင်းနှင့် နိုင်ငံခြား ရင်းနှီးမြှုပ်နှံသူများထံမှ ရင်းနှီးမြှုပ်နှံမှုစီမံကိန်း အဆိုပြုချက်များကို ကြီးကြပ်ကွပ်ကဲခြင်းနှင့် အတည်ပြုခြင်းတို့ကို ဆောင်ရွက်ပေးလျက်ရှိကာ မြန်မာနိုင်ငံ ရင်းနှီးမြှုပ်နှံမှုဥပဒေအရ လက်ရှိရင်းနှီးမြှုပ်နှံသူများကိုလည်း ဝန်ဆောင်မှုများ ပေးလျက်ရှိကြောင်း သတင်း၌ ဖြည့်စွက်ဖော်ပြထားသည်။