တရုတ်နိုင်ငံ တောင်ပိုင်း ဟိုင်ခိုမြို့နှင့် ဗီယက်နမ်နိုင်ငံ Nha Trang မြို့သို့ တိုက်ရိုက်လေကြောင်းလိုင်းသစ် ချိတ်ဆက်

တရုတ်နိုင်ငံ တောင်ပိုင်း ဟိုင်နန်ပြည်နယ် ဟိုင်ခိုမြို့ရှိ ဟိုင်ခိုမေလန်အပြည်ပြည်ဆိုင်ရာလေဆိပ်၌ ပြည်တွင်းဝင်ရောက်သည့်ခရီးသည်များ နယ်စပ်ဖြတ်ကျော်စစ်ဆေးရေးလုပ်ငန်းစဥ်များ လုပ်ဆောင်လျက်ရှိသည်ကို ၂၀၂၅ ခုနှစ် အောက်တိုဘာ ၁၅ ရက်က တွေ့ရစဥ် (ဆင်ဟွာ)

တရုတ်နိုင်ငံ တောင်ဘက်ပိုင်း ကျွန်းပြည်နယ်ဟိုင်နန်၏ မြို့တော်ဟိုင်ခိုနှင့် ဗီယက်နမ်နိုင်ငံ Nha Trang သို့ တိုက်ရိုက်လေကြောင်းလိုင်းအသစ် နိုဝင်ဘာ ၂၄ ရက်က စတင်လိုက်ကြောင်း သိရသည်။
ဟိုင်နန်လေကြောင်းလိုင်းမှ ဘိုးရင်း ၇၃၇ လေယာဥ်ဖြင့် ပြေးဆွဲမည့်လမ်းကြောင်းသစ်တွင် တနင်္လာ၊ ဗုဒ္ဓဟူး၊ သောကြာနေ့များ၌ အသွားအပြန်ပုံမှန်ပြေးဆွဲသွားမည်ဖြစ်သည်။
ဟိုင်ခိုမြို့မှ ပေကျင်းစံတော်ချိန် ညနေ ၁၀း၄၅ နာရီတွင် ထွက်ခွာကာ Nha Trang သို့ ဒေသစံတော်ချိန် ည ၁၁း၄၅ နာရီ ရောက်ရှိမည်ဖြစ်ပြီး Nha Trang မြို့မှ နောက်တစ်နေ့ ဒေသစံတော်ချိန် နံနက် ၁း၁၀ နာရီတွင် ပြန်လည် ထွက်ခွာကာ ဟိုင်ခိုမြို့သို့ ပေကျင်းစံတော်ချိန် နံနက် ၄း၁၀ နာရီတွင် ရောက်ရှိမည်ဖြစ်သည်။

အဆိုပါ လမ်းကြောင်းသစ်သည် ခရီးသည်များကို လာမည့်ခရစ္စမတ်နှင့် နှစ်သစ်ကူးရက်ကာလအတွင်း နယ်စပ်ဖြတ်ကျော် ခရီးသွားလာမှုတွင် ပိုမိုရွေးချယ်နိုင်မည့်အပြင် ဟိုင်ခိုနှင့် အရှေ့တောင်အာရှအကြား စီးပွားရေး၊ ကုန်သွယ်ရေး၊ ခရီးသွားလုပ်ငန်းနှင့် ယဥ်ကျေးမှုဖလှယ်ရေး လေကြောင်းဆက်သွယ်မှု တံတားသစ်တစ်စင်း တည်ဆောက်ခြင်းလည်းဖြစ်ကြောင်း သိရသည်။
ဟိုင်ခိုမေလန်အပြည်ပြည်ဆိုင်ရာလေဆိပ်သည် ဆိုးလ်မြို့နှင့် ဟိုချီမင်းမြို့ အပါအဝင် မြို့များနှင့်ချိတ်ဆက်သည့် အပြည်ပြည်ဆိုင်ရာလေကြောင်းလိုင်းများ ဖွင့်လှစ်မှုနှင့် ပြန်လည်ပြေးဆွဲမှုများ အားလုံးကို တိုးမြှင့်ရန်ဆောင်ရွက်လျက်ရှိပြီး အာဆီယံဒေသများနှင့် စီးပွားရေး၊ ကုန်သွယ်ရေး ပူးပေါင်းဆောင်ရွက်မှုများနှင့် ဖလှယ်မှုများ တိုးမြှင့်ရန် ဆက်လက်လုပ်ဆောင်နေကြောင်း သိရသည်။