ကမ္ဘောဒီးယား-တရုတ် ခရီးသွားနှစ်က ပြည်သူအချင်းချင်း ကူးလူးဆက်ဆံမှုများကို တစ်ဆင့်တိုး၍ မြှင့်တင်ပေး

ကမ္ဘောဒီးယားနိုင်ငံ ဖနွမ်းပင်မြို့တွင် ကျင်းပသည့် က‌မ္ဘောဒီးယား-တရုတ် ခရီးသွားနှစ် (၂၀၂၅) တရားဝင်စတင်သည့် အခမ်းအနား၌ ကမ္ဘောဒီးယား အနုပညာရှင်များ ဖျော်ဖြေတင်ဆက်နေပုံကို ၂၀၂၅ ခုနှစ် မေ ၂၃ ရက်က တွေ့ရစဉ် (ဆင်ဟွာ)

ဧပြီလ၌ စတင်သည့် ကမ္ဘောဒီးယား-တရုတ် ခရီးသွားနှစ် (၂၀၂၅) မှာ စီးပွားရေး၊ ကုန်သွယ်ရေး၊ ယဉ်ကျေးမှုနှင့် ပြည်သူအချင်းချင်း ကူးလူးဆက်ဆံမှုတို့တွင် နှစ်နိုင်ငံ ပူးပေါင်းဆောင်ရွက်မှုများကို ကြီးကြီးမားမား မြှင့်တင်ပေးနိုင်မည်ဟု မျှော်လင့်ထားကြသည်။
ထိုအစီအစဉ်အရ နှစ်ဖက်အနေဖြင့် ၎င်းတို့နိုင်ငံသားများအား တစ်နိုင်ငံနှင့်တစ်နိုင်ငံ အပြန်အလှန် ကူးလူးသွားလာရေးကို အားပေးတိုက်တွန်းခြင်း၊ ခရီးစဉ်လမ်းကြောင်းများကို အတူတကွ ဖော်ထုတ်ခြင်း၊ ခရီးသွားလုပ်ငန်း မြှင့်တင်ခြင်း၊ ခရီးသွားလာမှု ဘေးကင်းလုံခြုံရေးအတွက် ပူး‌ပေါင်းဆောင်ရွက်မှု ခိုင်မာအောင်လုပ်ဆောင်ခြင်းတို့ကို ဖော်ဆောင်ခဲ့ကြသည်။
လန်ချန်း-မဲခေါင် မြစ်ကြောင်းတစ်လျှောက်ရှိ နိုင်ငံများမှ လျှောက်ထားခွင့်ရှိသူများအား တစ်ကြိမ်လာရောက်လည်ပတ်လျှင် အများဆုံးအနေဖြင့် ရက်ပေါင်း ၁၈၀ နေထိုင်ခွင့်ပြုသည့် အကြိမ်ကြိမ် ဝင်ထွက်သွားလာနိုင်သော ငါးနှစ်ဗီဇာဖြစ်သည့် လန်ချန်း-မဲခေါင် ဗီဇာအား တရုတ်နိုင်ငံက ၂၀၂၄ ခုနှစ် နိုဝင်ဘာလတွင် စတင်ထုတ်ပေးခဲ့ရာ ယင်းဗီဇာကို အသုံးပြု၍ ကမ္ဘောဒီးယားနိုင်ငံနှင့် တရုတ်နိုင်ငံအကြား ခရီးသွားလာရေး လွယ်ကူအဆင်ပြေစေရန် ဆောင်ရွက်နိုင်ခဲ့သည်။
ထို့ပြင် ဈေးကွက်၏ လိုအပ်ချက်အရ ကမ္ဘောဒီးယားနိုင်ငံနှင့် တရုတ်နိုင်ငံတို့အကြား ခရီးသည်တင် ခရီးစဉ်နှင့် ကုန်စည်သယ်ယူပို့ဆောင်သည့် လေယာဉ်ခရီးစဉ် အခေါက်ရေ တိုးမြှင့်ရေးနှင့် လမ်းကြောင်းသစ်များ တိုးချဲ့ပြေးဆွဲရေးအတွက် လေကြောင်းလိုင်းများကို အားပေးတိုက်တွန်းခဲ့သည်။
ထို့အတူ ကမ္ဘောဒီးယားနိုင်ငံနှင့် တရုတ်နိုင်ငံတို့မှာ အဓွန့်ရှည်ကြာသော သမိုင်းကြောင်းရှိသည့် ရှေးကျသော ယဉ်ကျေးမှုများကို ပိုင်ဆိုင်ထားကာ ကမ္ဘာတစ်ဝန်းရှိ ယဉ်ကျေးမှုအမျိုးမျိုးနှင့် လူသားမျိုးနွယ်တို့၏ ဘုံစံတန်ဖိုးများအပေါ် အလေးထားပုံချင်း၊ ယဉ်ကျေးမှုအမွေအနှစ်နှင့် ဆန်းသစ်တီထွင်မှုအတွက် ကတိကဝတ်ပြုထားပုံချင်းလည်း တူညီကြပေသည်။
ကမ္ဘောဒီးယားနိုင်ငံမှာ ဆီရမ်ရိ(ပ်) ပြည်နယ်ရှိ ယူနက်စကိုစာရင်းဝင် အန်ကော ရှေးဟောင်းသုတေသန ဥယျာဉ်ကြောင့်လည်းကောင်း၊ ကမ္ဘာတစ်ဝန်းရှိ ပင်လယ်ကမ်းခြေ နှစ်သက်သူများက ကျယ်ကျယ်ပြန့်ပြန့် အသိအမှတ်ပြုထားသော သဘာဝအတိုင်း တည်ရှိနေသည့် ကမ်းရိုးတန်းဧရိယာများကြောင့်လည်းကောင်း လူသိများထင်ရှားလှသည်။
ထို့ပြင် ခရီးသွားများအနေဖြင့် ကမ္ဘာ့အကြီးဆုံးထဲတွင် ပါဝင်သော လမုတောအုပ်၊ မဲခေါင်မြစ်တစ်လျှောက်မှ ရင်သပ်ရှုမောဖွယ် သဘာဝရှုမျှော်ခင်းများ၊ တိုနယ်ဆပ်ရေကန်၏ ဇီဝမျိုးစုံမျိုးကွဲ များပြားစုံလင်မှု၊ ရှားပါး မဲခေါင်-ဧရာဝတီလင်းပိုင်များနှင့် အခြားသော တစ်မူထူးခြားသည့် ခရီးစဉ်ဒေသ အများအပြားအပြင် ကြွယ်ဝသော ယဉ်ကျေးမှုဆိုင်ရာ ရိုးရာအစဉ်အလာများ၊ ဓလေ့ထုံးတမ်းများနှင့် အလွန်စွဲမက်ဖွယ်ကောင်းသော ကမ္ဘောဒီးယား အစားအစာတို့ကိုပါ လေ့လာခံစားနိုင်မည်ဖြစ်သည်။
ထို့အတူ တရုတ်နိုင်ငံသည်လည်း ယင်း၏ သမိုင်းကြောင်းဆိုင်ရာ အရေးပါမှု၊ Forbidden City ဟု လူသိများသည့် နန်းတော်ပြတိုက်ကဲ့သို့ အထင်ကရ အဆောက်အအုံများနှင့် ပေကျင်းမြို့ရှိ မဟာတံတိုင်းကြီး စသည်တို့ကြောင့် ထင်ရှားကျော်ကြားလှသည်။
ခရီးသွားလုပ်ငန်းဆိုသည်မှာ အပြန်အလှန်နားလည်မှုနှင့် ယဉ်ကျေးမှုချင်း ကူးလူးဖလှယ်မှုတို့ကို မြှင့်တင်အားပေးသည့် အလွန်အရေးပါသော ပေါင်းကူးတံတားတစ်စင်း ဖြစ်သည့်အားလျော်စွာ ကမ္ဘောဒီးယား-တရုတ် ခရီးသွားနှစ် (၂၀၂၅) မှာလည်း နှစ်နိုင်ငံလုံးမှ ခရီးသွားများအား အပြန်အလှန်နားလည်မှု နက်နက်ရှိုင်းရှိုင်းရှိရေး၊ ပညာရေးနှင့် လူမှုရေးဆိုင်ရာ ပူးပေါင်းဆောင်ရွက်မှုအတွက် လမ်းကြောင်းသစ်များ ဖွင့်လှစ်ရေး၊ နှစ်နိုင်ငံပြည်သူများကြားက သံယောဇဉ်များ ခိုင်မာစေရေးအတွက် ပိုမိုတွန်းအားပေးနိုင်မည်ဖြစ်သည်။
၂၀၂၅ ခုနှစ် ဇန်နဝါရီလမှ ဩဂုတ်လအတွင်း ကမ္ဘောဒီးယားနိုင်ငံသို့ တရုတ်ခရီးသွားဧည့်သည် စုစုပေါင်း ၇၈၄,၉၆၅ ဦး လာရောက်လည်ပတ်ခဲ့ရာ ယမန်နှစ်ကာလတူထက် ၄၅.၇ ရာခိုင်နှုန်း မြင့်တက်ခဲ့သည်ဟု ကမ္ဘောဒီးယား ခရီးသွားလုပ်ငန်းဝန်ကြီးဌာန၏ ထုတ်ပြန်ချက်အရ သိရသည်။
သို့ဖြစ်၍ ကမ္ဘောဒီးယား-တရုတ် ခရီးသွားနှစ် (၂၀၂၅) အစီအစဉ်မှတစ်ဆင့် ၂၀၂၅ ခုနှစ် တစ်နှစ်တာအတွင်း ကမ္ဘောဒီးယားသို့ တရုတ်ခရီးသွားဧည့်သည် တစ်သန်းကျော် လာရောက်လည်ပတ်ဖွယ်ရှိကာ ကမ္ဘောဒီးယား၏ စီးပွားရေးတိုးတက်မှုနှင့် ခရီးသွားလုပ်ငန်း ဖွံ့ဖြိုးတိုးတက်မှုကို ကြီးကြီးမားမား မြှင့်တင်ပေးနိုင်သည်ဟု ခန့်မှန်းထားကြသည်။
အချုပ်အားဖြင့်ဆိုသော် ကမ္ဘောဒီးယား-တရုတ် ခရီးသွားနှစ် (၂၀၂၅) မှာ သံမဏိကဲ့သို့ခိုင်မြဲသော ကမ္ဘောဒီးယား-တရုတ် ချစ်ကြည်ရင်းနှီးမှုကို ပိုမိုခိုင်မာစေကာ နှစ်နိုင်ငံကြား ခရီးသွားလုပ်ငန်းဆိုင်ရာ ပူးပေါင်းဆောင်ရွက်မှုကိုလည်း အခန်းကဏ္ဍသစ် ဖွင့်လှစ်ပေးခဲ့သည်။
ရပ်ဝန်းနှင့် ပိုးလမ်းမ အဆိုပြုချက်၊ ကမ္ဘာလုံးဆိုင်ရာ ဖွံ့ဖြိုးတိုးတက်မှုအစီအမံ၊ ကမ္ဘာလုံးဆိုင်ရာ လုံခြုံရေးအစီအမံ၊ ကမ္ဘာလုံးဆိုင်ရာ ယဉ်ကျေးမှုအစီအမံ၊ ကမ္ဘာလုံးဆိုင်ရာ စီမံခန့်ခွဲမှုအစီအမံ စသည့် တရုတ်နိုင်ငံ၏ ကမ္ဘာလုံးဆိုင်ရာ အစီအမံများနှင့်အတူ ကမ္ဘောဒီးယား-တရုတ် ခရီးသွားနှစ် (၂၀၂၅) သည်လည်း ခေတ်သစ် ကမ္ဘောဒီးယား-တရုတ် ထာဝရ အေးအတူပူအမျှ အသိုက်အဝန်း ထူထောင်ရာတွင် ပိုမိုအားကောင်းသော တွန်းအားများကို ဖြည့်တင်းပေးမည်ဖြစ်ပေသည်။