ဒစ်ဂျစ်တယ် စာတတ်မြောက်မှုက မြန်မာနိုင်ငံရှိ လူများကို အထောက်အကူပြုလျက်ရှိ

ရန်ကုန်မြို့၌ မိုဘိုင်းဖုန်းအသုံးပြုနေသည့် လူငယ် ၂ ဦးအားတွေ့ရစဉ် (ဆင်ဟွာ)

မြန်မာနိုင်ငံ၊ ဧရာဝတီတိုင်းဒေသကြီး၊ ဘိုကလေးမြို့နယ်တွင်နေထိုင်သည့် အသက် ၄၉ နှစ်အရွယ်ရှိ ဒေါ်မေသောင်းက ၎င်း၏ ဖုန်းကင်မရာကို မျက်နှာရှေ့တွင် ချိန်ညှိလိုက်သည်။ မိုင်ပေါင်းထောင်နှင့်ချီ၍ ဝေးကွာသော နေရာရှိ သမီးဖြစ်သူ၏ ပုံရိပ်က တယ်လီဖုန်းစခရင်တွင် ပေါ်လာသောအခါတွင် ၎င်း၏မျက်နှာ တောက်ပသွားခဲ့သည်။
“တခြားနိုင်ငံတစ်ခုကို ရောက်နေတဲ့ ကျွန်မသမီးနဲ့ မျက်နှာချင်းဆိုင်စကားပြောရလိမ့်မယ်လို့ ကျွန်မတစ်ခါမှ မတွေးဖူးဘူး” ဟု ၎င်းက ရွှင်လန်းတောက်ပနေသောမျက်လုံးများဖြင့် ပြောသည်။
လွန်ခဲ့သည့် တစ်နှစ်ကအထိ ဒေါ်မေသောင်းက အခြေခံအားဖြင့် မည်ကဲ့သို့ဖုန်းခေါ်ဆိုရမည်ဆိုခြင်းထက် အနည်းငယ်သာ ပို၍ သိရှိခဲ့သည်။ သို့သော် ၎င်း၏ အသက် ၁၅ နှစ်အရွယ် သားဖြစ်သူ၏ စိတ်ရှည်လက်ရှိ သင်ပြပေးခြင်းကြောင့် တယ်လီဖုန်းဖြင့် video chat ပြောနည်းကို ဒေါ်မေသောင်း သိရှိခဲ့သည်။ ဒေါ်မေသောင်း၏ သားဖြစ်သူက video chat ပြောနည်းကို တစ်ဆင့်ချင်း ရှင်းပြခဲ့ကြောင်း ၎င်းက ရယ်မော၍ ပြောကြားခဲ့သည်။
“ပထမကတော့ ခလုတ်တွေမှားနှိပ်မိပြီး ဖုန်းခေါ်တာကျကျသွားတယ်။ ဒါပေမဲ့ တဖြည်းဖြည်း ကျွန်မ တတ်သွားခဲ့တယ်။ အခုတော့ ကျွန်မလွမ်းတဲ့အချိန်တိုင်း သမီးရဲ့ မျက်နှာပြုံးပြုံးလေးကို မြင်တွေ့နိုင်ပြီလေ” ဟု ၎င်းကပြောသည်။
၎င်း၏ ဖြစ်ရပ်သည် မြန်မာနိုင်ငံတွင် ဒစ်ဂျစ်တယ် စာတတ်မြောက်မှုမှတစ်ဆင့် ခရီးဝေးကွာမှုများကို ပေါင်းကူးတံတားခင်းပေးခြင်း၊ အခွင့်အလမ်းများ ဖန်တီးပေးခြင်းနှင့် မျိုးဆက်အသီးသီးမှ လူများကို အထောက်အကူပြုလျက်ရှိသည့် ဖြစ်ရပ်များစွာအနက်မှ တစ်ခုမျှသာဖြစ်သည်။
ရန်ကုန်မြို့တွင် နေထိုင်သော အသက် ၃၃ နှစ်အရွယ် ရုံးဝန်ထမ်း ကိုအောင်မင်းသည် ဒစ်ဂျစ်တယ်ကျွမ်းကျင်မှုဖြင့် ၎င်း၏အသက်မွေးဝမ်းကျောင်းလုပ်ငန်းကို မည်ကဲ့သို့ ပြောင်းလဲနိုင်သည်ဆိုသည့်အချက်ကို ရှာဖွေတွေ့ရှိခဲ့သည်။ ဥာဏ်ရည်တုနည်းပညာ (AI) နှင့် ပတ်သက်သည့် ရက်တို အွန်လိုင်းသင်တန်းအပြီးမှာ ၎င်းနေ့စဉ်ဘဝတွင် အဆိုပါ AI နည်းပညာကို စတင်အသုံးပြုလျက်ရှိကြောင်း သိရသည်။
“အရင်က ကျွန်တော်ကိုယ်တိုင် အစီရင်ခံစာတွေရေးတဲ့အခါ နာရီနဲ့ ချီပြီးကြာခဲ့တယ်” ဟု ၎င်းကရှင်းပြခဲ့သည်။ အခုကတော့ AI ကိုပြောပြီး ဂရပ်ဖစ်နဲ့ ဇယားတွေကို မိနစ်ပိုင်းအတွင်း ကျွန်တော်လုပ်နိုင်ခဲ့ပြီ။ ကျွန်တော့်အတွက် ရှည်လျားတဲ့ စာရွက်စာတမ်းတွေကိုလည်း အကျဉ်းချုပ်ရေးသားနိုင်တယ်။ ကျွန်တော်အလုပ်မှာ ပိုပြီးယုံကြည်မှုရှိလာတယ်။ ကျွန်တော့်ဘေးမှာ လက်ထောက်တစ်ယောက်ရှိနေသလိုပါပဲ”ဟု ၎င်းကပြောသည်။
ကျောင်းသားများအတွက် ဒစ်ဂျစ်တယ် စာတတ်မြောက်မှုသည် ကမ္ဘာကြီးထဲသို့ ဝင်ရောက်ရန် တံခါးတစ်ပေါက်ဖြစ်လာခဲ့သည်။ ဧရာဝတီတိုင်းဒေသကြီး၊ မအူပင်မြို့နယ်တွင်နေထိုင်သူ အသက် ၂၀ အရွယ် တတိယနှစ် တက္ကသိုလ်ကျောင်းသူ မစုမွန်က ၎င်း၏ညနေခင်းများကို တယ်လီဖုန်းဖြင့် အွန်လိုင်းဆွေးနွေးဟောပြောပွဲများတက်၍ ဒစ်ဂျစ်တယ်စာစောင်များကို လေ့လာသင်ယူခဲ့သည်။
“အရင်တုန်းကတော့ ကျွန်မတို့ စာကြည့်တိုက်မှာပဲ စာအုပ်တွေဖတ်နိုင်ခဲ့တာ”ဟု ၎င်းက ဆိုသည်။ “အခုကတော့ ကျွန်မအခန်းထဲကနေ နိုင်ငံတကာ ဆွေးနွေးပွဲတွေ တက်နိုင်ပါပြီ။ နိုင်ငံခြားက သူငယ်ချင်းတွေလည်း ဂရုဖွဲ့ပြီး အင်္ဂလိပ်စာ လေ့ကျင့်နိုင်တယ်” ဟု ၎င်းက ဆိုသည်။
ရရှိသည့် အကျိုးကျေးဇူးများသည် စာသင်ခန်းများနှင့် ရုံးခန်းများမှ ရရှိတာထက် သာလွန်သည်။ ဧရာဝတီတိုင်းဒေသကြီး၊ ဘိုကလေးမြို့နယ်ရှိ ရွာလေးတစ်ရွာတွင်နေထိုင်သော အသက် ၂၆ နှစ်အရွယ် တောင်သူ ကိုထက်နိုင်သည် မိုးလေဝသခန့်မှန်းချက်များနှင့် ဆန်ဈေးနှုန်းများကို သိရှိရန် ၎င်း၏ စမတ်ဖုန်းကို အသုံးပြုခဲ့သည်။
“ကျွန်တော်က ဈေးနှုန်းတွေကို မှန်းဆတာ ဒါမှမဟုတ် သတင်းနားထောင်ဖို့အတွက် ဖုန်းကို အသုံးပြုခဲ့တယ်” ဟု ၎င်းက ဆိုသည်။ “အခုတော့ ဘယ်အချိန်မှာ စိုက်ပျိုးရမလဲဆိုတာ ဘယ်အချိန်မှာ အကောင်းဆုံးဈေးနဲ့ ရောင်းရမလဲဆိုတာ သိနေပါပြီ။ ပိုမိုကောင်းမွန်တဲ့ ဆုံးဖြတ်ချက်တွေ ချနိုင်တာကြောင့် ဝင်ငွေတွေ တိုးတက်လာပါပြီ”ဟု ကိုထက်နိုင်က ပြောသည်။
နိုင်ငံတကာ စာတတ်မြောက်ရေးနေ့ အခမ်းအနားကို စက်တင်ဘာ ၈ ရက်က ရန်ကုန်မြို့၌ ကျင်းပခဲ့သည်။ အဆိုပါ အခမ်းအနားတွင် စာစီစာကုံးဆုများရရှိခဲ့သော ကျောင်းသား၊ ကျောင်းသူများအား ဆုချီးမြှင့်ခဲ့ကြောင်း နိုင်ငံပိုင် မြန်မာ့အသံနှင့် ရုပ်မြင်သံကြားမှ သတင်းထုတ်ပြန်ခဲ့သည်။

နိုင်ငံတကာ စာတတ်မြောက်ရေးနေ့ကို မြန်မာနိုင်ငံတွင် ကျင်းပခြင်းအားဖြင့် စာတတ်မြောက်မှု၏ အဓိပ္ပါယ်ကို သိသာထင်ရှားစေကြောင်း သိရသည်။ ယနေ့ခေတ်တွင် စာဖတ်ခြင်းနှင့် စာရေးခြင်းအတွက်သာမက အက်ပ် (App) များကို မည်ကဲ့သို့ ကိုင်တွယ်ဆောင်ရွက်ရန်၊ အွန်လိုင်းအချက်အလက်များကို မည်ကဲ့သို့ လေ့လာပိုင်းဖြတ်ရန်နှင့် လက်တွေ့ဘဝစိန်ခေါ်မှုများကို ကိုင်တွယ်ဖြေရှင်းရန်ဒစ်ဂျစ်တယ်ကိရိယာများကို မည်ကဲ့သို့ အသုံးပြုရန် စသည့်အကြောင်းအရာများလည်း သိနားလည်လာခဲ့သည်။
မြန်မာနိုင်ငံရှိ လူအများအတွက် ဒစ်ဂျစ်တယ် စာတတ်မြောက်မှုသည် အတတ်ပညာတစ်ခုထက် ပိုကြောင်း သိရသည်။ ယင်းမှာ မိသားစု၊ အခွင့်အလမ်းနှင့် တစ်ချိန်က စိတ်ကူးမယဉ်နိုင်သော အနာဂတ်အတွက် လှေကားထစ်တစ်ခုဖြစ်လာခဲ့သည်။