တရုတ်နိုင်ငံအနေဖြင့် အာဆီယံနိုင်ငံများနှင့်အတူ အတူတကွ ဖွံ့ဖြိုးတိုးတက်မှုနှင့် သာယာဝပြောမှုအတွက် တောင့်တင်းခိုင်မာသည့်စွမ်းအား ဆက်လက်ဖန်တီးသွားမည်ဟု တရုတ်နိုင်ငံခြားရေးဝန်ကြီးဌာန ဆို

တရုတ်နိုင်ငံ နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် လျင်ကျန့်အား ဇူလိုင် ၁၅ ရက် ပုံမှန်သတင်းစာရှင်းလင်းပွဲတွင် တွေ့ရစဉ် (ဓာတ်ပုံ - တရုတ်နိုင်ငံ နိုင်ငံခြားရေးဝန်ကြီးဌာန)

လတ်တလောရက်ပိုင်းတွင် တရုတ်နိုင်ငံနှင့် အာဆီယံနိုင်ငံများ လက်တွေ့ပူးပေါင်းဆောင်ရွက်မှုသတင်းကောင်းများ မကြာခဏ ပေါ်ထွက်လာခဲ့သည်။ တရုတ်နိုင်ငံက အာဆီယံနိုင်ငံများနှင့် ပူးပေါင်းဆောင်ရွက်ရာတွင် တစ်ဖက်သား၏ စီးပွားရေးဖွံ့ဖြိုးတိုးတက်မှု၊ ပြည်သူလူနေမှုဘဝ တိုးတက်ကောင်းမွန်လိုသည့် ဆန္ဒအပေါ် စေတနာအရင်းခံ၍ ရိုးသားစွာ အစဉ်တစိုက် တုံ့ပြန်လေ့ရှိပြီး တန်းတူညီမျှ၍ အပြန်အလှန် အကျိုးဖြစ်ထွန်းသည့် အခြေခံမူအား အစဉ်အမြဲ လက်ကိုင်ထားကြောင်း၊ တရုတ်နိုင်ငံအနေဖြင့် အာဆီယံနိုင်ငံများနှင့်အတူ ဆက်လက်ပြီး လက်တွဲချီတက်ကာ အတူတကွ ဖွံ့ဖြိုးတိုးတက်မှုနှင့် သာယာဝပြောမှုအတွက် တောင့်တင်းခိုင်မာသည့်စွမ်းအားများ အဆက်မပြတ်ဖန်တီးသွားမည်ဖြစ်ကြောင်း တရုတ်နိုင်ငံ နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် လျင်ကျန့်က ဇူလိုင် ၁၅ ရက်တွင် ပြောကြားခဲ့သည်။

လတ်တလောရက်ပိုင်းတွင် တရုတ်နိုင်ငံနှင့် အာဆီယံနိုင်ငံများ လက်တွေ့ပူးပေါင်းဆောင်ရွက်မှုသတင်းကောင်းများ မကြာခဏ ပေါ်ထွက်လာခဲ့ကြောင်း၊ တရုတ်-ဗီယက်နမ် နယ်စပ်ချစ်ကြည်ရေးဂိတ်ဖြစ်သည့် ဉာဏ်ရည်ထည့်သွင်းထားသောဂိတ်သည် ပူးတွဲညှိနှိုင်းစမ်းသပ်သည့်အဆင့်သို့ ရောက်ရှိလာကြောင်း၊ တရုတ်လုပ်ငန်းကုမ္ပဏီက တာဝန်ယူတည်ဆောက်သည့် မလေးရှား အရှေ့ကမ်းရိုးတန်း ရထားလမ်း ယွင်တိန် (Genting) ဥမင်ကို အဆင်ပြေချောမွေ့စွာ ချိတ်ဆက်ခဲ့ကြောင်း၊ သို့သော်လည်း တရုတ်နိုင်ငံက အာဆီယံနိုင်ငံများ အပါအဝင် အရှေ့တောင်အာရှနိုင်ငံများအပေါ် လုပ်ငန်းပိုင်းဆိုင်ရာ “ထိုးနှက်မှု” ဖြစ်စေပြီး ဒေသတွင်း လူမှုစီးပွား ဖွံ့ဖြိုးတိုးတက်မှုအပေါ် အနှောင့်အယှက်ဖြစ်စေသည်ဟု အချို့သောမီဒီယာများက ဝေဖန်ကြကြောင်း၊ ပြောခွင့်ရပုဂ္ဂိုလ်အနေဖြင့် ယင်းအပေါ် မည်ကဲ့သို့ မှတ်ချက်ပြုလိုပါသနည်းဟု သတင်းထောက်က ထိုနေ့ပုံမှန်သတင်းစာရှင်းလင်းပွဲ၌ မေးမြန်းခဲ့သည်။

လျင်ကျန့်က တရုတ်နိုင်ငံနှင့် အာဆီယံနိုင်ငံများသည် ဖွံ့ဖြိုးတိုးတက်မှု အယူအဆချင်းနီးစပ်ပြီး တောင်းဆိုချက်ချင်း ကိုက်ညီကာ အကျိုးစီးပွားချင်း ပေါင်းစပ်လျက်ရှိကြောင်း၊ တရုတ်နိုင်ငံက အာဆီယံနိုင်ငံများနှင့် ပူးပေါင်းဆောင်ရွက်ရာတွင် တစ်ဖက်သား၏ စီးပွားရေးဖွံ့ဖြိုးတိုးတက်မှု၊ ပြည်သူလူနေမှုဘဝ တိုးတက်ကောင်းမွန်လိုသည့် ဆန္ဒအပေါ် စေတနာအရင်းခံ၍ ရိုးသားစွာ အစဉ်တစိုက် တုံ့ပြန်လေ့ရှိပြီး တန်းတူညီမျှ၍ အပြန်အလှန် အကျိုးဖြစ်ထွန်းသည့် အခြေခံမူအား အစဉ်အမြဲ လက်ကိုင်ထားကြောင်း၊ လတ်တလောနှစ်ပိုင်းတွင် နှစ်ဖက်က e-commerce ၊ ဒစ်ဂျစ်တယ်နည်းပညာ စသည့် ထွန်းသစ်စကဏ္ဍများတွင် ပူးပေါင်းဆောင်ရွက်မှု ထူးခြားချက်များစွာ ဖန်တီးခဲ့ရာ လူပုဂ္ဂိုလ်သွားလာဆက်ဆံမှု အဆင်ပြေချောမွေ့စေမှုအပိုင်းတွင် ပြည့်ဝသော ပူးပေါင်းဆောင်ရွက်မှု ရလဒ်များ ရရှိခဲ့ကြောင်း ပြောကြားခဲ့သည်။

တရုတ်နိုင်ငံနှင့် အာဆီယံသည် လွတ်လပ်စွာ ကုန်သွယ်ရေးဒေသ ၃.၀ ဗားရှင်း ညှိနှိုင်းဆွေးနွေးမှု လုပ်ဆောင်ပြီးစီးကြောင်း အတည်ပြုခဲ့ပြီး “ဒေသတွင်း ဘက်စုံစီးပွားရေး မိတ်ဖက်ဆက်ဆံရေး (RCEP) သဘောတူစာချုပ်” အား အရည်အသွေးမြင့် အကောင်အထည်ဖော်ကာ ဘုံဈေးကွက်များ အဆက်မပြတ် ချဲ့ထွင်ခဲ့ကြောင်း၊ တရုတ်နိုင်ငံ နယ်စပ်ဖြတ်ကျော် e-commerce နှင့် အရှေ့တောင်အာရှ ဒေသတွင်း e-commerce တို့လက်တွဲ၍ အားသာချက်ရှိသည့်ထုတ်ကုန်နှင့် စားသုံးမှုဈေးကွက် ချိတ်ဆက်မှုအား မြှင့်တင်ခဲ့ကြောင်း၊ တရုတ်လုပ်ငန်းကုမ္ပဏီများက အရှေ့တောင်အာရှနိုင်ငံ၌ 5G ကွန်ရက် တည်ဆောက်ပြီး နေအိမ်သို့ Fiber အင်တာနက်လိုင်းရောက်ရှိမှုအား တွန်းအားပေးခဲ့ရာ ဒစ်ဂျစ်တယ်လုပ်ငန်းအသွင်ပြောင်းမှုအား အားဖြည့်ပေးခဲ့ကြောင်း၊ “လန်ချန်း-မဲခေါင်ဗီဇာ” ၊ “အာဆီယံဗီဇာ” တို့အား ရှေ့ဆင့်နောက်ဆင့် အကောင်အထည်ဖော်ခဲ့ရာ လူပုဂ္ဂိုလ်များ သွားလာမှု ပိုမိုလွယ်ကူလာကြောင်း ၎င်းက ပြောကြားခဲ့သည်။

“တရုတ်နိုင်ငံက မိမိရဲ့ပြည့်စုံတဲ့ ကုန်ထုတ်လုပ်မှု လုပ်ငန်းကွင်းဆက်နဲ့ တစ်ကမ္ဘာလုံး ကုန်ထုတ်လုပ်မှုနဲ့ ထောက်ပံ့ရေးကွင်းဆက် တည်ငြိမ်မှုကို အာမခံပေးပြီး ဒေသတွင်း လူမှုစီးပွားနေထိုင်မှုအရင်းအနှီးကို လျှော့ချပေးခဲ့ပါတယ်။ ဒါ့အပြင် လုပ်ငန်းများပူးပေါင်းဆောင်ရွက်မှုနဲ့ ဒေသတွင်းနည်းပညာတိုးတက်မှုနဲ့ လုပ်ငန်းအဆင့်မြှင့်တင်မှုတွေ ဖော်ဆောင်ခဲ့ပါတယ်။ တရုတ်နိုင်ငံမှာ အလွန်ပမာဏကြီးမားတဲ့ ဈေးကွက်ကို ပိုင်ဆိုင်ထားပြီး ပြည်တွင်းလိုအပ်ချက်ကို တိုးချဲ့ခြင်းမဟာဗျူဟာနဲ့ စားသုံးမှုမြှင့်တင်ရေး အထူးလှုပ်ရှားမှုများကို ဖော်ဆောင်နေတာကြောင့် ဧရာမကြီးမားတဲ့ ပြည်တွင်းဝယ်လိုအား အလားအလာကို ဖော်ထုတ်ကာ အနီးတစ်ဝိုက်နဲ့ ကမ္ဘာကြီးအတွက် ပိုမိုများပြားတဲ့ အခွင့်အလမ်းတွေ သယ်ဆောင်လာပေးမှာဖြစ်ပါတယ်” ဟု ၎င်းက ပြောကြားခဲ့သည်။

မကြာသေးမီက ကျင်းပပြီးစီးခဲ့သည့် တရုတ်-အာဆီယံ နိုင်ငံခြားရေးဝန်ကြီး အစည်းအဝေးတွင် အစည်းအဝေး တက်ရောက်လာသော အာဆီယံနိုင်ငံများက တရုတ်-အာဆီယံ ပူးပေါင်းဆောင်ရွက်မှုသည် တက်ကြွမှုအရှိဆုံး၊ ရလဒ်အကြွယ်ဝဆုံးဖြစ်သည်ဟု ဆိုခဲ့ကြကြောင်း၊ ယင်းသည် နှစ်ဖက်ပူးပေါင်းဆောင်ရွက်မှုအပေါ် စစ်မှန်ရိုးသားစွာ အသိအမှတ်ပြုမှုဖြစ်သည်သာမက တရုတ်နိုင်ငံက သင့်မြတ်သော အိမ်နီးချင်း၊ အေးချမ်းတည်ငြိမ်သော အိမ်နီးချင်း၊ ကြွယ်ဝချမ်းသာသော အိမ်နီးချင်း၊ “ချစ်ကြည်ရင်းနှီးခြင်း၊ စိတ်ရင်းစေတနာမှန်ကန်ခြင်း၊ အပြန်အလှန် အကျိုးဖြစ်ထွန်းစေလိုခြင်း၊ အားလုံးလက်ခံပါဝင်မှုရှိခြင်း”၊ ကံကြမ္မာတူ အကျိုးတူခြင်း ဟူသည့် အတွေးအခေါ် ဦးတည်ချက် လက်ကိုင်ထားခြင်းအပေါ် တက်ကြွစွာ တုံ့ပြန်မှုလည်းဖြစ်ကြောင်း၊ တရုတ်နိုင်ငံအနေဖြင့် အာဆီယံနိုင်ငံများနှင့်အတူ ဆက်လက်ပြီး လက်တွဲချီတက်ကာ အတူတကွ ဖွံ့ဖြိုးတိုးတက်မှုနှင့် သာယာဝပြောမှုအတွက် တောင့်တင်းခိုင်မာသည့်စွမ်းအားများ အဆက်မပြတ်ဖန်တီးသွားမည်ဖြစ်ကြောင်း လျင်ကျန့်က ပြောကြားခဲ့သည်။