(တရုတ်နိုင်ငံ စီးပွားရေးစကားဝိုင်းဆွေးနွေးပွဲ) အမျိုးသားအဆင့် စီးပွားရေးဖွံ့ဖြိုးမှုဇုန်များက နိုင်ငံခြားရင်းနှီးမြှုပ်နှံမှုကို ဆွဲဆောင်ရာ၌ အဓိကအခန်းကဏ္ဍမှ ပါဝင်လျက်ရှိ

လွန်ခဲ့သော နှစ်ပေါင်း ၄၀ ကျော်အကြာ စတင်တည်ထောင်ချိန်မှစ၍ တရုတ်နိုင်ငံ၏ အမျိုးသားအဆင့် စီးပွားရေးဖွံ့ဖြိုးမှုဇုန်များက တံခါးဖွင့်လှစ်မှုကို ထိပ်တန်းဦးစားပေးအနေဖြင့် လုပ်ဆောင်ခဲ့ပြီး ပြည်ပကုန်သွယ်ရေးနှင့် နိုင်ငံခြားရင်းနှီးမြှုပ်နှံမှု ဆွဲဆောင်ရာ၌ “ပထမဆုံး ခြေလှမ်း” ဖြစ်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန တာဝန်ရှိသူ ကျီရှောင်ဖုန်းက ပြောကြားခဲ့သည်။

ဆယ်စုနှစ် လေးခုအတွင်း အဆိုပါ ဇုန်များသည် ကိုယ်ပိုင်တိုးတက်မှုကို စဉ်ဆက်မပြတ် ကြိုးပမ်းမြှင့်တင်လျက်ရှိပြီး အရည်အသွေးမြင့်၍ ဥပဒေအခြေပြုသည့် စီးပွားရေးလုပ်ငန်း ပတ်ဝန်းကျင်တစ်ရပ်အား ဖန်တီးပေးရန် အားထားဆောင်ရွက်လျက်ရှိကြောင်း ဆင်ဟွာသတင်းဌာနက ကြီးမှူးကျင်းပသော “တရုတ်စီးပွားရေး စကားဝိုင်းဆွေးနွေးပွဲ” All Media တွေ့ဆုံဆွေးနွေးပွဲကြီး၏ လတ်တလောထုတ်လွှင့်ခဲ့သော အပိုင်းတွင် ကျီက ပြောကြားခဲ့သည်။

၂၀၂၄ ခုနှစ် နှစ်ကုန်ပိုင်းမတိုင်မီအထိ တရုတ်နိုင်ငံတွင် အမျိုးသားစီးပွားရေး ဖွံ့ဖြိုးတိုးတက်မှုဇုန် ၂၃၂ ခု ထူထောင်နိုင်ခဲ့ရာ နိုင်ငံခြားရင်းနှီးမြှုပ်နှံမှု ကုမ္ပဏီ ၆၀,၀၀၀ ကျော်အား အတူတကွလက်ခံနိုင်ခဲ့သည်။

ယင်းကုမ္ပဏီများအနက် ဂျပန်အီလက်ထရွန်းနစ်ကုမ္ပဏီကြီးဖြစ်သော Panasonic သည် တရုတ်ဈေးကွက်သို့ အစောဆုံးဝင်ရောက်ခဲ့သော နိုင်ငံခြားရင်းနှီးမြှုပ်နှံသူဖြစ်သည်။ ယနေ့ခတ်တွင် ယင်းလုပ်ငန်းမှာ တရုတ်နိုင်ငံ အရှေ့ပိုင်း ကျန်းဆူးပြည်နယ်ရှိ စူးကျိုးစက်မှုဥယျာဉ်၌ လုပ်ငန်းခွဲသုံးခု ရှိလာပြီဖြစ်သည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်သော နှစ်စဉ်အဆင့်သတ်မှတ်အရ စူးကျိုးစက်မှုဥယျာဉ်သည် ၂၀၂၄ ခုနှစ် နှစ်ကုန်ပိုင်း၌ ဖွံ့ဖြိုးတိုးတက်မှုအဆင့်အရ တရုတ်နိုင်ငံရှိ အမျိုးသားအဆင့် ဖွံ့ဖြိုးမှုဇုန်များအားလုံးအကြား ပထမအဆင့်တွင် ကိုးနှစ်ဆက်တိုက် ဦးဆောင်ရပ်တည်လျက်ရှိကြောင်း သိရသည်။

“စက်မှုဥယျာဉ်တွေတည်ရှိမှု၊ စက်မှုလုပ်ငန်းကွင်းဆက်နဲ့ မူဝါဒပံ့ပိုးမှုက ကျွန်တော်တို့ကို အလွန်ပဲ ဆွဲဆောင်မှုဖြစ်စေပါတယ်။ စူးကျိုးမှာတင်မကဘဲ တရုတ်တစ်နိုင်ငံလုံးမှာလည်း ကျွန်တော်တို့ရဲ့ ရင်းနှီးမြှုပ်နှံမှုနဲ့ ဖွံ့ဖြိုးတိုးတက်မှုတွေကို ကျယ်ကျယ်ပြန့်ပြန့် အကျိုးပြုပါတယ်” ဟု Panasonic China ၏ ဥက္ကဋ္ဌ ဖြစ်သူ ကျောက်ပင်တိက ပြောခဲ့သည်။

အစိုးရ-စီးပွားရေး ဖလှယ်မှုများကဲ့သို့ ကျွမ်းကျင်မှုမြင့်မားသော ဝန်ဆောင်မှုများပေးခြင်းဖြင့် စက်မှုဥယျာဉ်သည် ကုမ္ပဏီများအား လုပ်ငန်းလည်ပတ်မှုဆိုင်ရာ ထိရောက်မှုကို မြှင့်တင်ရေး အထောက်အကူဖြစ်စေရန်နှင့် နောက်ဆုံးပေါ် မူဝါဒအစီအမံများအကြောင်း သိရှိစေရန် စိတ်နှစ်မြှုပ်လုပ်ကိုင်လျက်ရှိကြောင်း ကျောက်က ဆိုသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက မေလတွင် အမျိုးသားအဆင့် ဖွံ့ဖြိုးမှုဇုန်များ၌ ပြုပြင်ပြောင်းလဲမှုနှင့် တီထွင်ဆန်းသစ်မှု တစ်ဆင့်တိုး နက်ရှိုင်းရေးအတွက် လုပ်ငန်းအစီအစဉ်ကို ထုတ်ဖော်ကြေညာခဲ့ရာ ယင်းမှာ အဆင့်မြင့် တံခါးဖွင့်လှစ်မှု မြှင့်တင်ရာ၌ ယင်းဇုန်များ၏ အခန်းကဏ္ဍ အားကောင်းမှုရှိစေရန် တရုတ်နိုင်ငံ၏ နောက်ဆုံးလုပ်ဆောင်မှုများအနက် တစ်ခုလည်း ဖြစ်သည်။

“ကျွန်တော်တို့ဟာ တရုတ်နိုင်ငံရဲ့ ပြုပြင်ပြောင်းလဲမှုနဲ့ တံခါးဖွင့်လှစ်မှုရဲ့ သက်သေတွေ ဖြစ်သလို အကျိုးခံစားနေရသူတွေလည်း ဖြစ်ပါတယ်။ အရည်အသွေးမြင့် ဖွံ့ဖြိုးတိုးတက်မှုဆီ ကူးပြောင်းနေတဲ့ နိုင်ငံဖြစ်တဲ့အလျောက် ကျွန်တော်တို့အနေနဲ့ ဒီမှာပဲ လက်ရှိတိုးတက်မှုတွေအတွက် အခိုင်အမာ ဆက်ရှိနေမှာပါ” ဟု ကျောက်က ဆိုသည်။