တရုတ်နိုင်ငံက ကမ္ဘာ့စီးပွားရေးတွင် “စည်ပင်ဝပြောသည့်နေရာ” အဖြစ် ဆက်လက်တည်ရှိနေဟု ဝန်ကြီးချုပ် လီချန် ပြောကြား

တရုတ်နိုင်ငံ မြို့တော်ပေကျင်း၌ အာရှအခြေခံအဆောက်အအုံ ရင်းနှီးမြှုပ်နှံမှုဘဏ် (AIIB) စီမံအုပ်ချုပ်ရေး ဘုတ်အဖွဲ့ဝင်များ၏ ၁၀ ကြိမ်မြောက် နှစ်ပတ်လည်အစည်းအဝေး ဖွင့်ပွဲအခမ်းအနား၌ တက်ရောက်၊ မိန့်ခွန်းပြောကြားနေသည့် တရုတ်နိုင်ငံ ဝန်ကြီးချုပ် လီချန်အား ၂၀၂၅ ခုနှစ် ဇွန် ၂၆ ရက်က တွေ့ရစဉ် (ဆင်ဟွာ)

တရုတ်နိုင်ငံ၏ စီးပွားရေးမှာ ကမ္ဘာ့စီးပွားရေးတွင် စည်ပင်ဝပြောသည့် နေရာတစ်ခုအဖြစ် ဆက်လက်တည်ရှိနေမည်ဖြစ်ကာ အလွန်ကြီးမားကျယ်ပြန့်သော တရုတ်နိုင်ငံ၏ ဈေးကွက်အား ချဲ့ထွင်ခြင်း၊ အဆင့်မြှင့်တင်ခြင်းက သိသာထင်ရှားသော အကျိုးအမြတ်များကို ဆက်လက်ဖြစ်ထွန်းစေမည်ဖြစ်ပြီး အခြားနိုင်ငံများအတွက်လည်း ပိုမိုကြီးမားသော ကုန်သွယ်မှုနှင့် ရင်းနှီးမြှုပ်နှံမှု အခွင့်အလမ်းများကို ဖန်တီးပေးလျက်ရှိကြောင်း တရုတ်နိုင်ငံ ဝန်ကြီးချုပ် လီချန်က ဇွန် ၂၆ ရက်၌ ပြောကြားခဲ့သည်။
ကမ္ဘာတစ်ဝန်း ဖွံ့ဖြိုးတိုးတက်မှု အခွင့်အလမ်းသစ်များ ဖန်တီးပေးရန် ရည်ရွယ်သည့် လုပ်ဆောင်မှုအဖြစ် တရုတ်နိုင်ငံက အဆင့်မြင့်တံခါးဖွင့်လှစ်ရေး၊ ကမ္ဘာ့စီးပွားရေးနှင့် နက်နက်ရှိုင်းရှိုင်း ဆက်လက်ပေါင်းစည်းရေး ကတိကဝတ်ကို ထပ်လောင်းအတည်ပြုကြောင်း အာရှအခြေခံအဆောက်အအုံ ရင်းနှီးမြှုပ်နှံမှုဘဏ် (AIIB) စီမံအုပ်ချုပ်ရေး ဘုတ်အဖွဲ့ဝင်များ၏ ၁၀ ကြိမ်မြောက် နှစ်ပတ်လည်အစည်းအဝေး ဖွင့်ပွဲအခမ်းအနား၌ လီက ပြောကြားခဲ့သည်။
AIIB အား စတင်တည်ထောင်ရာ၌ သမ္မတ ရှီကျင့်ဖိန်က AIIB အား “ပရော်ဖက်ရှင်နယ်ပီသ၍ ထိရောက်အကျိုးရှိသော၊ သန့်ရှင်းသော နိုင်ငံစုံပါဝင်သည့် ဖွံ့ဖြိုးရေးဘဏ်” အမျိုးအစားသစ်တစ်ခုအဖြစ် ဖော်ဆောင်ရန် အဆိုပြုခဲ့သည်ဟု လီက အလေးအနက်ပြောကြားခဲ့သည်။
လွန်ခဲ့သော ဆယ်စုနှစ်အတွင်း AIIB အဖွဲ့ဝင်နိုင်ငံ အရေအတွက်မှာ ၅၇ နိုင်ငံမှ ၁၁၀ အထိ တိုးပွားလာခဲ့ကြောင်း လီက ပြောကြားခဲ့ပြီး အဆိုပါဘဏ်အနေဖြင့် အဖွဲ့ဝင်နိုင်ငံများ၏ ဘုံဖွံ့ဖြိုးတိုးတက်မှုကို အားဖြည့်ပံ့ပိုးမှု၊ ကမ္ဘာလုံးဆိုင်ရာ ဘဏ္ဍာရေးစီမံခန့်ခွဲမှု စံနမူနာသစ်များကို ရှေ့ဆောင်လမ်းပြမှု၊ နိုင်ငံတကာ၌ နိုင်ငံစုံ ပူးပေါင်းဆောင်ရွက်ရေး စံနမူနာသစ် ချမှတ်မှုတို့အတွက်လည်း ချီးကျူးပြောဆိုခဲ့သည်။
ကမ္ဘာလုံးဆိုင်ရာ ဖွံ့ဖြိုးတိုးတက်မှုမှာ စိန်ခေါ်မှုများနှင့် ရင်ဆိုင်နေရသည့်အတွက် AIIB အနေဖြင့် အဖွဲ့ဝင်နိုင်ငံများ၏ ဖွံ့ဖြိုးတိုးတက်မှုအတွက် အားပေးထောက်ကူမှုများ တိုးမြှင့်သင့်ကြောင်း ယင်း၏ အနာဂတ်ဖွံ့ဖြိုးတိုးတက်မှုနှင့် စပ်လျဉ်း၍ လီက ပြောကြားခဲ့သည်။
“ခမ်းနားထည်ဝါတဲ့ ဆယ်စုနှစ်ကာလသစ်တစ်ခုကို စတင်ရာမှာ AIIB ကို အထောက်အကူပေးဖို့၊ အဖွဲ့ဝင်နိုင်ငံတွေရဲ့ စဉ်ဆက်မပြတ် ဖွံ့ဖြိုးတိုးတက်မှုကို မြှင့်တင်ဖို့နဲ့ လူသားမျိုးနွယ် အေးအတူပူအမျှ အသိုက်အဝန်းထူထောင်မှု ရှေ့ဆက်ဖော်ဆောင်ရေးကို ပိုမိုထိရောက်စွာ အားဖြည့်ပံ့ပိုးဖို့ သက်ဆိုင်ရာနိုင်ငံအားလုံးနဲ့ ပူးပေါင်းဆောင်ရွက်သွားဖို့ တရုတ်နိုင်ငံက အသင့်ရှိပါတယ်” ဟု လီက ဆိုသည်။
“ဖွံ့ဖြိုးတိုးတက်မှုအတွက် ချိတ်ဆက်ဆောင်ရွက်ခြင်း၊ သာယာဝပြောမှုအတွက် ပူးပေါင်းဆောင်ရွက်ခြင်း” ဟူသော ခေါင်းစဉ်ဖြင့် ကျင်းပခဲ့သည့် ယခုနှစ် အစည်းအဝေးအား တရုတ်နိုင်ငံ ဘဏ္ဍာရေးဝန်ကြီးဌာန၊ ပေကျင်းမြူနီစီပယ်အစိုးရနှင့် AIIB တို့ ပူးပေါင်း၍ ကမကထပြုကျင်းပခဲ့ခြင်းဖြစ်သည်။