လက်ရေးလှအနုပညာမှ စားသောက်ဖွယ်ရာများအထိ တရုတ်ယဉ်ကျေးမှု အငွေ့အသက်များကို မြန်မာနိုင်ငံတွင် ကျင်းပသည့် တရုတ်နှစ်သစ်ကူး‌နွေဦးပွဲတော် အခမ်းအနား၌ စုံလင်စွာပြသထား

မြန်မာနိုင်ငံ ရန်ကုန်မြို့ အင်လျားကန်ဘေး မြက်ခင်းပြင်တွင် ကျင်းပသော တရုတ်နှစ်သစ်ကူးနွေဦးပွဲတော် အခမ်းအနား မြင်ကွင်းကို ၂၀၂၅ ခုနှစ် ဇန်နဝါရီ ၂၃ ရက်က တွေ့ရစဉ် (ဆင်ဟွာ)

မြန်မာနိုင်ငံ ရန်ကုန်မြို့ အင်းလျားကန်ဘေး မြက်ခင်းပြင်တွင် တရုတ်နှစ်သစ်ကူးပွဲတော် အထိမ်းအမှတ် တရုတ်ယဉ်ကျေးမှုအငွေ့အသက် အမျိုးမျိုးဖြင့် ပြည့်နှက်နေသော တောက်ပသည့် အနီရောင်ပြခန်းအများအပြားကို ခင်းကျင်းထားသည်။

မြန်မာနိုင်ငံဆိုင်ရာ တရုတ်သံရုံးက ကြီးမှူးကျင်းပသော အဆိုပါ အခမ်းအနားကို မြန်မာနိုင်ငံရှိ တရုတ်အဖွဲ့အစည်းမှ ကိုယ်စားလှယ်များ၊ မြန်မာနိုင်ငံသားများ၊ သံရုံးဝန်ထမ်းများနှင့် နိုင်ငံတကာဧည့်သည်တော်များ တက်ရောက်ခဲ့ကြသည်။

“ဒီနှစ် မြန်မာနိုင်ငံမှာ ကျင်းပတဲ့ တရုတ်နှစ်သစ်ကူးအခမ်းအနားက တကယ်ကို ထူးခြားပါတယ်” ဟု ပြခန်းများကို လေ့လာကြည့်ရှုနေသော အခမ်းအနားတက်ရောက်သူ ဦးဝင်းတင်က ပြောခဲ့သည်။
“ဒီနှစ်က ထူးခြားတယ်။ ဘာလို့လဲဆိုတော့ တရုတ်နွေဦးပွဲတော်နဲ့ မြန်မာတို့ရဲ့ သင်္ကြန်ရေသဘင်ပွဲတော်တို့ကို ယူနက်စကိုက ဒြပ်မဲ့ယဉ်ကျေးမှုအမွေအနှစ်စာရင်းမှာ ထည့်သွင်းခဲ့တယ်။ ပြီးတော့ မြန်မာအစိုးရကလည်း ဒီနှစ်ကစပြီး တရုတ်နှစ်သစ်ကူးနေ့ကို အများပြည်သူရုံးပိတ်ရက်အဖြစ် တရားဝင်သတ်မှတ်လိုက်တယ်” ဟု ၎င်းက ဆိုသည်။

ပြခန်းပေါင်း ၄၀ ခန့်ဖြင့် ဒေသအသီးသီး၏ အရသာရှိလှသော စားသောက်ဖွယ်ရာများမှ စိတ်ဝင်စားဖွယ် ဒြပ်မဲ့ယဉ်ကျေးမှု အမွေအနှစ်အထိ ခင်းကျင်းပြသထားရာ ဧည့်သည်တော်များက တရုတ်ရိုးရာအမျိုးမျိုးကို ကိုယ်တိုင်မြည်းစမ်း၊ ခံစားကြည့်ရှုခွင့် ရရှိခဲ့ကြသည်။

ယူနန်၊ စီချွမ်း၊ ဆန်းတုန်း၊ ကွမ်တုန်းနှင့် ဟဲနန် စသည့် ပြည်နယ်အသီးသီးမှ စိတ်ဝင်စားဖွယ် စားသောက်ဖွယ်ရာများနှင့်အတူ လက်ရေးလှ၊ ပန်းချီ၊ ကြွေထည်၊ တရုတ်ဗျပ်စောင်းနှင့် ဆေးရောင်ခြယ်ယပ်တောင် (lacquer fan)တို့ကိုလည်း ပြသထားသည်။

အဆိုပါ အခမ်းအနားပွဲ တက်ရောက်လာသူများတွင် ရန်ကုန်နိုင်ငံခြားဘာသာတက္ကသိုလ်၊ တရုတ်ဘာသာမေဂျာမှ အသက် ၂၂ နှစ်အရွယ် ကျောင်းသူ မငြိမ်းစုသာလည်း ပါဝင်သည်။ “ဒီမှာ တရုတ်ယဉ်ကျေးမှုတွေကို တွေ့မြင်ရတာက တီဗီ ဒါမှမဟုတ် အင်တာနက်မှာ မြင်ရတာထက် ပိုပြီးတော့ ပျော်စရာကောင်းတယ်” ဟု မငြိမ်းစုသာက သူငယ်ချင်းများနှင့် တရုတ်ရိုးရာအစားအစာများကို သုံးဆောင်ရင်း ပြောခဲ့သည်။

တရုတ်နှစ်သစ်ကူးအခမ်းအနားပွဲများ တက်ရောက်ခဲ့သည်မှာ သုံးကြိမ်ရှိပြီဖြစ်ကြောင်း၊ ယခုမှာမူ တရုတ်သံရုံးက ကြီးမှူးကျင်းပသည့် အခမ်းအနားကို ပထမဆုံးအကြိမ်တက်ရောက်ခြင်းဖြစ်ကြောင်း မငြိမ်းစုသာက ဆိုသည်။

“ပြခန်းတွေမှာ ဂိမ်းကစားရတာ၊ တရုတ် lacquer ယပ်တောင်ဆေးရောင်ခြယ်တာတွေကို သဘောကျတယ်” ဟု ၎င်းက ပြောခဲ့သည်။

၎င်းအနေဖြင့် ခင်းကျင်းပြသထားသော တရုတ်အစားအစာအားလုံးကို မြည်းစမ်းခဲ့ပြီးစီချွမ်း စားဖွယ်စုံကို အနှစ်သက်ဆုံးဖြစ်ကြောင်း မငြိမ်းစုသာက ဖြည့်စွက်ပြောခဲ့သည်။ “တရုတ်လက်ဖက်ရည်ကြမ်း ယဉ်ကျေးမှုကို သဘောကျတယ်။ လက်ဖက်ရည်ကြမ်းက တရုတ်နိုင်ငံမှာ ကြီးကျယ်ခမ်းနားပြီး အရေးပါတဲ့ ယဉ်ကျေးမှုကို ဖော်ဆောင်တယ်” ဟု ၎င်းက ပြောပြခဲ့သည်။

တရုတ်နှစ်သစ်ကူးပွဲတော် အခမ်းအနားတွင် ဝူရှူးဖြင့် ဖျော်ဖြေတင်ဆက်သူ အသက် ၁၆ နှစ်အရွယ် မောင်ကြယ်ဇင်ဝိုင်းက တရုတ်နှစ်သစ်ကူးအခမ်းအနားများက အစဉ်အမြဲ စိတ်လှုပ်ရှားဖွယ်ကောင်းသည်ဟု ဆိုသည်။ “သူတို့က အမြဲလှုပ်ရှားနေကြတာ။ ကျွန်တော်တော့ ပျင်းချိန်ကိုမရဘူး” ဟု ၎င်းက ပြောခဲ့သည်။

မောင်ကြယ်ဇင်ဝိုင်းသည် ပြခန်းများကို လှည့်ပတ်ကြည့်ကာ စားသောက်ဖွယ်ရာများ သုံးဆောင်၍ ဂိမ်းများကစားပြီးနောက် ဝူရှူး ဖျော်ဖြေတင်ဆက်မှုကို စိတ်အားထက်သန်စွာ ပါဝင်ခဲ့သည်။ “ဒီလိုမျိုး အခမ်းအနားပွဲတွေမှာ ဖျော်ဖြေတင်ဆက်ရတာ ကျွန်တော် အနှစ်သက်ဆုံးအပိုင်းပဲ” ဟု မောင်ကြယ်ဇင်ဝိုင်းက ဆိုပြီး ၎င်းအနေဖြင့် အသက် ၆ နှစ်အရွယ်ကတည်းက ဝူရှူးကို ကစားခဲ့ခြင်းဖြစ်ကာ ဂျက်ကီချန်းကို လေးစားအားကျရကြောင်း ပြောပြခဲ့သည်။

မိသားစုနှင့်အတူ ပွဲတော်သို့ လာရောက်သော အသက် ၁၁ နှစ်အရွယ် Leon က တရုတ်နှစ်သစ်ကူးအခမ်းအနားပွဲက “စိတ်လှုပ်ရှားဖွယ်” ကောင်းကြောင်း ပြောပြခဲ့သည်။ အဆိုပါ အခမ်းအနားပွဲအတွင်း ဆေးရောင်ခြယ်ခြင်း၊ အအေးသောက်ခြင်း၊ တိရစ္ဆာန်ရုပ်ပုံ စက္ကူညှပ်ခြင်း၊ ပုစွန်နှင့် ကြက်သား ဟင်းလျာများကို သုံးဆောင်ခြင်းဖြင့် အချိန်ကုန်ဆုံးခဲ့သည်ဟု ဆိုသည်။ “တရုတ်နှစ်သစ်ကူးမှာ အကြိုက်ဆုံးအပိုင်းကတော့ ချစ်တဲ့သူတွေနဲ့ အတူတူနေရတာပါ” ဟု Leon က ပြောခဲ့သည်။

အဆိုပါ အခမ်းအနားရှိ ဒြပ်မဲ့ယဉ်ကျေးမှု အမွေအနှစ်ပြခန်းများအနက် လျောင်နင် ဒြပ်မဲ့ယဉ်ကျေးမှု အမွေအနှစ်ပြခန်းတွင် ယဉ်ကျေးမှုဆိုင်ရာပစ္စည်း ၂၂ ခုကို ခင်းကျင်းပြသခဲ့သည်။

ပြခန်းတွင် ပြသသူ အသက် ၃၀ နှစ်အရွယ် မဌေးဌေးနွယ်က ဆေးရောင်ခြယ်ထားသော ဘူးသီးကို ကိုင်လျက် “ဒါက တရုတ်လို ‘Hulu’ လို့ခေါ်တယ်။ ကံကောင်းခြင်းနဲ့ ကြွယ်ဝမှုရဲ့ သင်္ကေတဖြစ်ပါတယ်” ဟု ရှင်းပြသည်။
တရုတ်ရိုးရာ စက္ကူအလှညှပ်ပြခန်းတွင်လည်း လာရောက်လေ့လာသူများပြားခဲ့သည်။

အမျိုးအစားစုံလင်သော ယဉ်ကျေးမှုဆိုင်ရာ ခင်းကျင်းပြသမှုကို နှစ်သက်သော အသက် ၃၈ နှစ်အရွယ် ကိုနေဦးက “တရုတ်ယဉ်ကျေးမှုတွေ အစုံအလင်ကို တစ်နေရာထဲမှာ တွေ့ရတာ ထူးခြားပြီး စိတ်ဝင်စားစရာကောင်းတယ်။ ကျွန်တော့်အကြိုက်ဆုံး တရုတ်အစားအစာကတော့ ဖက်ထုပ်ပါပဲ” ဟု ပြောခဲ့သည်။

ယခုလို အခမ်းအနားပွဲများက ယဉ်ကျေးမှုဖလှယ်ခြင်းကို အားပေးမြှင့်တင်ပြီး မြန်မာနိုင်ငံနှင့် တရုတ်နိုင်ငံကြား ချစ်ကြည်ရင်းနှီးမှု ခိုင်မာစေကြောင်း ကိုနေဦးက ဖြည့်စွက်ပြောပြခဲ့သည်။

ပျော်ရွှင်ဖွယ်ရာ ပွဲတော်အငွေ့အသက်များအပြင် အဆိုပါ အခမ်းအနားက မြန်မာနိုင်ငံနှင့် တရုတ်နိုင်ငံကြား ချစ်ကြည်ရင်းနှီးမှု အဓွန့်ရှည်တည်တံ့ရေးအတွက်လည်း အဓိပ္ပာယ်ပြည့်ဝသော ပေါင်းကူးတံတားအဖြစ် အကျိုးဆောင်လျက်ရှိသည်။

“တရုတ်နှစ်သစ်ကူး အခမ်းအနားတွေက မြန်မာနိုင်ငံမှာ ခေတ်အဆက်ဆက်ကျင်းပခဲ့ကြတာပါ။ အနီရောင်စာအိတ်တွေ၊ တရုတ်အစားအစာတွေက ကျွန်တော်တို့နဲ့ ရင်းနှီးကျွမ်းဝင်ပြီးသားပဲလေ။ ဒီနှစ်က မြန်မာနိုင်ငံနဲ့ တရုတ်နိုင်ငံကြား သံတမန်ဆက်ဆံရေး ထူထောင်တဲ့ ၇၅ နှစ်မြောက် နှစ်ပတ်လည်လည်း ဖြစ်တယ်” ဟု အခမ်းအနားပွဲ တက်ရောက်လာသူ ဦးဝင်းတင်က ဆိုသည်။

“ယဉ်ကျေးမှုတွေက ကူးလူးဆက်နွှယ်‌တာပါ။ မြန်မာတို့ရဲ့ သင်္ကြန်ရေသဘင်ပွဲတော်ကို တရုတ်လူမျိုးတွေ ပါဝင်ဆင်နွှဲကြသလိုပဲ တရုတ်နှစ်သစ်ကူးမှာလည်း ကျွန်‌တော်တို့ ဆင်နွှဲကြတာမျိုးပေါ့။ ဒါတွေက ယဉ်ကျေးမှုဆိုင်ရာ ရင်းနှီးမှုကို ခိုင်မာအားကောင်းစေသလို ချစ်ကြည်ရေးကိုလည်း မြှင့်တင်ပေးတယ်လေ” ဟု ၎င်းက ဖြည့်စွက်ပြောခဲ့သည်။

မြွေနှစ်ဖြစ်သော ၂၀၂၅ ခုနှစ် တရုတ်နှစ်သစ်ကူးသည် ဇန်နဝါရီ ၂၉ ရက်တွင် ကျရောက်မည်ဖြစ်ပြီး မြန်မာနိုင်ငံ၌ တရုတ်နှစ်သစ်ကူးနေ့ကို အများပြည်သူရုံးပိတ်ရက်အဖြစ် ပထမဆုံးအကြိမ် တရားဝင်သတ်မှတ်လိုက်ခြင်းလည်း ဖြစ်သည်။ (Xinhua)