China Media Group နှင့် မြန်မာနိုင်ငံ စာရေးဆရာအသင်းတို့ "အွန်လိုင်းစာပေမှတစ်ဆင့် တရုတ်နိုင်ငံအကြောင်း သိရှိနားလည်ခြင်း" ဆွေးနွေးပွဲကို ပူးတွဲ ကျင်းပ

 China Media Group အာရှနှင့်အာဖရိကစင်တာ၊ မြန်မာနိုင်ငံ စာရေးဆရာအသင်းနှင့် ရန်ကုန်တရုတ်ယဉ်ကျေးမှုစင်တာတို့ ပူးတွဲ ကျင်းပသော "အွန်လိုင်းစာပေမှတစ်ဆင့် တရုတ်နိုင်ငံအကြောင်း သိရှိနားလည်ခြင်း" ဆွေးနွေးပွဲကို ဒီဇင်ဘာလ ၈ ရက်နေ့က မြန်မာနိုင်ငံ ရန်ကုန်မြို့၌ ကျင်းပခဲ့ပါသည်။ မြန်မာနိုင်ငံဆိုင်ရာ တရုတ်သံရုံးမှ ယဉ်ကျေးမှု သံမှူး လီချန်ကိုသည် ဆွေးနွေးပွဲသို့ တက်ရောက်ပြီး အမှာစကား ပြောကြားခဲ့သည်။ မြန်မာနိုင်ငံ စာရေးဆရာအသင်းနှင့် မြန်မာနိုင်ငံ သတင်း မီဒီယာကောင်စီ ဥက္ကဋ္ဌ မြင်းမူမောင်နိုင်မိုးသည် ဗီဒီယိုဖြင့် အမှာစကား ပြောကြားခဲ့သည်။ မြန်မာနိုင်ငံ နာမည်ကြီး အွန်လိုင်းစာရေးဆရာနှင့် လူငယ် စာရေးဆရာ စုစုပေါင်း ၅၀ ကျော်တို့သည် တရုတ်နိုင်ငံ စီးပွားရေးနှင့် လူမှုရေး အရည်အသွေးမြင့်မားစွာ ဖွံ့ဖြိုးတိုးတက်မှုနှင့် အွန်လိုင်းစာပေ ဖွံ့ဖြိုးတိုးတက်မှု၊ အွန်လိုင်းစာပေ၏ တရုတ်နှင့်မြန်မာ လူငယ်များကြား ယဉ်ကျေးမှု ကူးလူးဖလှယ်ရေးတွင် အရေးကြီးသော အခန်းကဏ္ဍ၊ ကမ္ဘာလုံးဆိုင်ရာ ယဉ်ကျေးမှု အဆိုပြုချက် ဖော်ဆောင်ရာတွင် တရုတ်နှင့်မြန်မာ အွန်လိုင်း စာပေ ကူးလူးဖလှယ်မှုနှင့် ပူးပေါင်းဆောင်ရွက်မှု စသဖြင့်ကို နက်နက်ရှိုင်းရှိုင်း ဆွေးနွေးခဲ့ကြပါသည်။

   သံမှူး လီချန်က ယခုအကြိမ် ဆွေးနွေးပွဲသည် တရုတ်နှင့်မြန်မာ နှစ်နိုင်ငံ အွန်လိုင်းစာပေ ကူးလူးဖလှယ်မှုနှင့် အပြန်အလှန် လေ့လာသင်ယူမှုကို အထောက်အကူ ပြုမည် ဖြစ်ပြီး နှစ်နိုင်ငံ လူငယ်များကြား အပြန်အလှန် နားလည်မှုနှင့် ချစ်ကြည်ရေး အစဉ်အလာ ခိုင်ခံ့စေရေးကို တွန်းအားပေးမည် ဖြစ်ကြောင်း ပြောကြားခဲ့ပါသည်။

  မြန်မာနိုင်ငံ စာရေးဆရာအသင်းနှင့် မြန်မာနိုင်ငံ သတင်း မီဒီယာကောင်စီ ဥက္ကဋ္ဌ မြင်းမူမောင်နိုင်မိုးက လူသားကံကြမ္မာတူ အသိုက်အဝန်း ရည်မှန်းချက်ကို ဖော်ဆောင်ရန်အတွက် နှစ်ဖက်တို့သည် စာပေနှင့် ယဉ်ကျေးမှု ကူးလူးဖလှယ်ရေးကို တစ်ဆင့်တိုး မြှင့်တင်ပြီး အတွေးအခေါ်များ ကူးလူးဖလှယ်ခြင်းဖြင့် နှစ်နိုင်ငံ ကံကြမ္မာတူ အသိုက်အဝန်း တည်ဆောင်ရေးအတွက် ပိုမို ကျယ်ပြန့်သော လမ်းကြောင်းတစ်ရပ်ကို ရှာကြံရမည် ဖြစ်ကြောင်း ပြောကြားခဲ့ပါသည်။