လန်ချန်း-မဲခေါင် ပူးပေါင်းဆောင်ရွက်မှုသည် အာဆီယံနိုင်ငံသစ်နှင့် နိုင်ငံဟောင်းကြား ဖွံ့ဖြိုးတိုးတက်ရေး ကွာဟချက်ကို ကျဉ်းမြောင်းစေကြောင်း ကမ္ဘောဒီးယား ဒုတိယဝန်ကြီးချုပ်က ပြောကြား

စက်တင်ဘာ ၅ ရက်က ကမ္ဘောဒီးယားနိုင်ငံဆိုင်ရာ တရုတ်သံအမတ်ကြီး Wang Wenbin နှင့် ကမ္ဘောဒီးယား ဒုတိယဝန်ကြီးချုပ်နှင့် နိုင်ငံခြားရေးနှင့် နိုင်ငံတကာ ပူးပေါင်းဆောင်ရွက်ရေး ဝန်ကြီး Song Jinda တို့သည် ဖနွမ်းပင်မြို့တွင် ၂၀၂၄ နှစ်ပတ်လည် လန်ချန်း-မဲခေါင် ပူးပေါင်းဆောင်ရွက်ရေး အထူးရန်ပုံငွေ ကမ္ဘောဒီးယား စီမံကိန်း သဘောတူညီချက်ကို လက်မှတ်ရေးထိုးခဲ့ကြသည်။ လန်ချန်း-မဲခေါင် ပူးပေါင်းဆောင်ရွက်ရေး အထူးရန်ပုံငွေ ကမ္ဘောဒီးယား စီမံကိန်း ရှစ်ခုသည် လန်ချန်း-မဲခေါင် ရက်သတ္တပတ်၊ မိုင်းရှင်းလင်းရေး ပူးပေါင်းဆောင်ရွက်မှု၊ ဂေဟ-ခရီးသွားလုပ်ငန်း၊ အသက်မွေးဝမ်းကျောင်းပညာ၊ လယ်ယာကဏ္ဍ ဖွံ့ဖြိုးတိုးတက်ရေး စသည့်နယ်ပယ်ပေါင်းစုံတွင် ထောက်ပံ့ငွေ အမေရိကန်ဒေါ်လာ ၂ သန်း ရရှိခဲ့သည်။

Wang Wenbin က တရုတ်နိုင်ငံသည် လန်ချန်း-မဲခေါင်မူဘောင်အောက်တွင် နယ်ပယ်အသီးသီးတွင် ပူးပေါင်းဆောင်ရွက်မှုကို ပိုမိုနက်ရှိုင်းစွာ ဆက်လက်ဆောင်ရွက်သွားရန်၊ အထူးသဖြင့် ပိုမိုများပြားသော၊ သေးငယ်သော်လည်း လှပသောပရောဂျက်များကို ဆောင်ရွက်ရန်၊ ပူးပေါင်းဆောင်ရွက်မှု၏ ရလဒ်များသည် ကမ္ဘောဒီးယားနိုင်ငံ၏ စီးပွားရေးလူမှု‌ရေးဖြိုးတိုးတက်အောင် ပိုမိုကောင်းမွန်စွာ အထောက်အကူပြုနိုင်စေရန်၊ ဒေသခံပြည်သူများ ပိုမိုအကျိုးရှိစေရန် ဆန္ဒရှိကြောင်း ပြောကြားပါသည်။

Song Jinda သည် မကြာသေးမီက ထိုင်းနိုင်ငံတွင် ကျင်းပခဲ့သည့် လန်ချန်း-မဲခေါင် ပူးပေါင်းဆောင်ရွက်ရေးဆိုင်ရာ နဝမအကြိမ်မြောက် နိုင်ငံခြားရေးဝန်ကြီးများ အစည်းအဝေး၏ ရလဒ်များကို တန်ဖိုးထားကြောင်း ပြောကြားခဲ့ပါသည်။ ငြိမ်းချမ်းသာယာဝပြောပြီး ရေရှည်တည်တံ့သော လန်ချန်း-မဲခေါင်နိုင်ငံများ အေးအတူ ပူအမျှ အသိုက်အဝန်းကို တည်ဆောက်ရန်အတွက် ဒေသတွင်းရှိ ဘက်စုံနှင့် ပူးပေါင်းလုပ်ဆောင်ရန် ကမ္ဘောဒီးယား၏ သန္နိဋ္ဌာန်ကို ၎င်းက ထပ်လောင်းပြောကြားခဲ့သည်။

လက်ရှိတွင် အာဆီယံအဖွဲ့ဝင် ၁၀ နိုင်ငံ ရှိပြီး ၎င်းတို့အနက် မြန်မာ၊ ဗီယက်နမ်၊ လာအိုနှင့် ကမ္ဘောဒီးယားတို့သည် အာဆီယံနိုင်ငံသစ်များ ဖြစ်ကြောင်း၊ လန်ချန်း-မဲခေါင် ပူးပေါင်းဆောင်ရွက်ရေး ယန္တရားသည် ဒေသတွင်းနိုင်ငံများ၏ စီးပွားရေး ဖွံ့ဖြိုးတိုးတက်မှုကို မြှင့်တင်ပေးရုံသာမက နိုင်ငံအသီးသီးရှိ ပြည်သူများ၏ လူနေမှုအဆင့်အတန်းကို မြှင့်တင်ပေးရုံသာမက ပိုမိုအရေးကြီးသည်မှာ အာဆီယံနိုင်ငံသစ်များနှင့် အာဆီယံနိုင်ငံဟောင်းများကြား ဖွံ့ဖြိုးတိုးတက်မှုကွာဟချက်ကို ကျဉ်းမြောင်းသွားစေနိုင်ကြောင်း ၎င်းက ပြောကြားခဲ့ပါသည်။