တရုတ်နိုင်ငံ သမ္မတ ရှီကျင့်ဖိန်က လာမည့် “ရွှေရောင်နှစ် ၃၀” အတွက် APEC ပူးပေါင်းဆောင်ရွက်မှုဆိုင်ရာ အဆိုပြုချက်များ အကြံပြု

တရုတ်နိုင်ငံ သမ္မတ ရှီကျင့်ဖိန်သည် ဒေသတွင်း ပူးပေါင်းဆောင်ရွက်မှု မြှင့်တင်ရာတွင် ဆန်းသစ်မှုရှိသော၊ ပွင့်လင်းမှုရှိသော စိမ်းလန်း၍ အားလုံးပါဝင်မှုရှိသော ဖွံ့ဖြိုးတိုးတက်မှုကို အခိုင်အမာဖမ်းဆုပ်ရန်နှင့် ဒေသတွင်း နောက်ထပ် “ရွှေရောင် နှစ် ၃၀” ကို ကြိုဆိုရန် အာရှ-ပစိဖိတ် စီးပွားရေးပူးပေါင်းဆောင်ရွက်မှု (APEC) အဖွဲ့ဝင်နိုင်ငံများကို နိုဝင်ဘာ ၁၇ ရက်က တိုက်တွန်းခဲ့ကြောင်း သိရသည်။

APEC သည် စီးပွားရေးခေါင်းဆောင်များ ပုံမှန်အစည်းအဝေးယန္တရား ထူထောင်ချိန်မှစ၍ ပွင့်လင်းမှုနှင့် ဖွံ့ဖြိုးတိုးတက်မှု၏ ကမ္ဘာ့ရှေ့တန်းမျက်နှာစာတွင် အစဉ်အမြဲရပ်တည်လျက်ရှိကြောင်း သမ္မတ ရှီက Moscone စင်တာ၌ ကျင်းပသော ၃၀ ကြိမ်မြောက် APEC စီးပွားရေးခေါင်းဆောင်များ အစည်းအဝေး မိန့်ခွန်းအတွင်း ထည့်သွင်းပြောကြားခဲ့သည်။

APEC အဖွဲ့ဝင်နိုင်ငံများအနေဖြင့် တီထွင်ဆန်းသစ်မှုဖြင့် မောင်းနှင်သော ဖွံ့ဖြိုးတိုးတက်မှုကို လက်ခံယုံကြည်ရန် ရှီက တိုက်တွန်းခဲ့သည်။ သိပ္ပံနှင့် နည်းပညာအဆင့်မြှင့်တင်မှု လမ်းကြောင်းများကို လိုက်လျှောက်ရန်၊ သိပ္ပံနှင့် နည်းပညာကဏ္ဍတွင် ကူးလူးဆက်ဆံမှုများနှင့် ပူးပေါင်းဆောင်ရွက်မှု ပိုမိုတက်ကြွစွာ မြှင့်တင်ရန်နှင့် သိပ္ပံနှင့် နည်းပညာဆိုင်ရာ တိုးတက်မှုအတွက် ပွင့်လင်း၊ မျှတ၊ ညီမျှကာ ခွဲခြားဆက်ဆံမှုမရှိသော ပတ်ဝန်းကျင်တစ်ခု အတူတကွ တည်ဆောက်ရန် အရေးကြီးကြောင်း ရှီက ပြောကြားခဲ့သည်။

ဖွံ့ဖြိုးတိုးတက်မှုတွင် ပွင့်လင်းမှုရှိရေး ကတိကဝတ်ကလည်း အရေးကြီးကြောင်း သမ္မတ ရှီက အလေးထားပြောခဲ့သည်။
APEC အဖွဲ့ဝင်နိုင်ငံများအနေဖြင့် လွတ်လပ်၍ ပွင့်လင်းမှုရှိသော ကုန်သွယ်မှုနှင့် ရင်းနှီးမြှုပ်နှံမှု မြှင့်တင်ရန်၊ ကမ္ဘာ့ကုန်သွယ်ရေးအဖွဲ့ (WTO) ဗဟိုပြုထားသည့် နိုင်ငံစုံပူးပေါင်းဆောင်ရွက်မှုကုန်သွယ်စနစ်ကို ထောက်ခံရန်နှင့် အားကောင်းလာစေရန်၊ ကမ္ဘာလုံးဆိုင်ရာ စက်မှုလုပ်ငန်းနှင့် ထောက်ပံ့ကွင်းဆက်များ ပွင့်လင်း တည်ငြိမ်မှုကို ထိန်းသိမ်းရန် ရှီက တိုက်တွန်းခဲ့သလို APEC အဖွဲ့ဝင်နိုင်ငံများအနေဖြင့် စီးပွားရေးနှင့် ကုန်သွယ်ရေး ကိစ္စရပ်များတွင် နိုင်ငံရေးသက်ဝင်မှု၊ လက်နက်သဖွယ်အသုံးချမှု သို့မဟုတ် လုံခြုံရေးအကြောင်းပြ သတ်မှတ်ပြဋ္ဌာန်းမှုရန် မည်သည့်ကြိုးပမ်းမှုမျိုးကိုမဆို ပြောဆိုလုပ်ဆောင်ရမည်မဟုတ်ကြောင်း ရှီက တိုက်တွန်းခဲ့သည်။

အစိမ်းရောင် ဖွံ့ဖြိုးတိုးတက်မှုအတွက် ကတိကဝတ်ကလည်း မရှိမဖြစ် လိုအပ်ကြောင်း တရုတ်နိုင်ငံ သမ္မတက ပြောခဲ့သည်။

လူသားနှင့် သဘာဝတရားကြား သဟဇာတဖြစ်မှုကို ဆက်လက်မြှင့်တင်ရန်၊ အစိမ်းရောင်နှင့် ကာဗွန်လျော့နည်း ဖွံ့ဖြိုးတိုးတက်မှုဆီသို့ ကူးပြောင်းမှု အရှိန်မြှင့်တင်ရန် ဆက်လက်ဆောင်ရွက်ရေးမှာ လွန်စွာအရေးပါကြောင်း သိရသည်။
ထို့ပြင် အားလုံးအတွက် အကျိုးကျေးဇူးများ မျှဝေပေးနိုင်မည့် အားလုံးပါဝင်မှုရှိသော ဖွံ့ဖြိုးတိုးတက်မှုအတွက် ကတိကဝတ်ကိုလည်း သမ္မတ ရှီက တိုက်တွန်းခဲ့သည်။

စဉ်ဆက်မပြတ် ဖွံ့ဖြိုးတိုးတက်မှုဆိုင်ရာ ကုလသမဂ္ဂ ၂၀၃၀ အစီအစဉ်ကို ပြည့်ဝစွာ အကောင်အထည်ဖော်ရန်၊ ဖွံ့ဖြိုးတိုးတက်မှုကို ဦးစားပေးဗဟိုချက်အဖြစ် နိုင်ငံတကာအစီအစဉ်တွင် ပြန်လည်ထားရှိရန်၊ မိမိတို့၏ ဖွံ့ဖြိုးတိုးတက်မှု မဟာဗျူဟာများတွင် ကြီးမားသော စုပေါင်းအကျိုးရလဒ်များ ဖော်ထုတ်ရန်နှင့် ကမ္ဘာ့ဖွံ့ဖြိုးတိုးတက်မှု ကွာဟချက်ကို ဖြေရှင်းရေး အတူတကွ ဆောင်ရွက်ရန် အရေးကြီးကြောင်း ရှီက ဆိုသည်။

တရုတ်နိုင်ငံအနေဖြင့် ခေတ်မီအသွင်ပြောင်းမှု လမ်းကြောင်းမှတစ်ဆင့် နယ်ပယ်အားလုံး၌ ကြီးကျယ်ခမ်းနားသောနိုင်ငံနှင့် တရုတ်အမျိုးသားဖွံ့ဖြိုးတိုးတက်မှု တည်ဆောက်ရေး၏ မြင့်မြတ်သော ရည်မှန်းချက်ကို အဆင့်မြှင့်တင်လျက်ရှိပြီး ငြိမ်းချမ်းသော ဖွံ့ဖြိုးတိုးတက်မှုလမ်းကြောင်းသို့ ဆက်လက်ကတိပြု ဆောင်ရွက်သွားမည် ဖြစ်ကြောင်း ရှီက မှတ်ချက်ပြုခဲ့သည်။

တရုတ်နိုင်ငံ ခေတ်မီအသွင်ပြောင်းမှုသည် နိုင်ငံများအားလုံး ခေတ်မီအသွင်ပြောင်းခြင်းဆိုင်ရာ ကြီးမားသော အခွင့်အလမ်းများကို ကမ္ဘာကြီးအတွက် ပိုမိုကျယ်ပြန့်စွာ ဆောင်ကြဉ်းပေးလျက်ရှိကြောင်း၊ ၎င်းအနေဖြင့် အာရှ-ပစိဖိတ် ပူးပေါင်းဆောင်ရွက်မှုနှင့် ဒေသတွင်း နောက်ထပ် “ရွှေရောင်နှစ် ၃၀” အတွက် အောင်မြင်မှုအသစ်များ ဆောင်ရွက်ရန် အသင့်ရှိကြောင်း သမ္မတ ရှီကျင့်ဖိန်က ဖြည့်စွက်ပြောကြားခဲ့သည်။ (Xinhua)