ກອງປະຊຸມເວທີເປິກສາຫາລືການຮ່ວມມືອົງການປົກຄອງແມ່ນ້ຳລ້ານຊ້າງ-ແມ່ນ້ຳຂອງ 2025 ຈັດຂຶ້ນຢູ່ນະຄອນຕ້າລີແຂວງຢຸນນານຈີນ
lmcchina.org, November 28, 2025
Size：
ວັນທີ 19 ພະຈິກ 2025, ກອງປະຊຸມເວທີເປິກສາຫາລືການຮ່ວມມືອົງການປົກຄອງ ແມ່ນ້ຳລ້ານຊ້າງ-ແມ່ນ້ຳຂອງ 2025 ພ້ອມດ້ວຍ ກອງປະຊຸມສົນທະນາລະຫວ່າງຕົວເມືອງວັດທະນະທຳປະຫວັດສາດທີ່ມີຊື່ສຽງໄດ້ຈັດຂຶ້ນຢູ່ນະຄອນຕ້າລີແຂວງຢຸນນານຈີນ.
ທ່ານຫວາງນິງ ເລຂາຄະນະພັກແຂວງຢຸນນານ, ທ່ານຢາງວ້ານມິງ ປະທານສະມາຄົມມິດຕະພາບກັບຕ່າງປະເທດປະຊາຊົນຈີນ, ທ່ານວຽງສະຫວັດ ສີພັນດອນ ເລຂາຄະນະພັກແຂວງຫຼວງນ້ຳທາຂອງລາວ, ທ່ານຟານຫຸຍຫງອກ（Phan Huy Ngọc）ປະທານຄະນະກຳມະການປະຊາຊົນແຂວງຕວຽນກວາງຫວຽດນາມ ແລະ ຜູ້ຮັບຜິດຊອບພາກສ່ວນ ອົງການປົກຄອງທ້ອງຖິ່ນຕ່າງໆທີ່ກ່ຽວຂ້ອງພ້ອມດ້ວຍທູຕານຸທູດຂອງປະເທດລຸ່ມແມ່ນ້ຳຂອງປະຈຳຈີນລວມທັງໝົດ 200 ກວ່າຄົນໄດ້ເຂົ້າຮ່ວມກອງປະຊຸມຄັ້ງນີ້.
ທ່ານຫວາງນິງ ກ່າວວ່າ: ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຜ່ານການພັດທະນາມາເປັນເວລາ 10 ປີ, ໄດ້ກາຍເປັນສາຍເຊື່ອມຕໍ່ຄຳທີ່ຊົມໃຊ້ໂອກາດຮ່ວມກັນ, ສາຍເຊື່ອມຕໍ່ສີຂຽວທີ່ອະນຸລັກສິ່ງແວດລ້ອມທຳມະຊາດຮ່ວມກັນ, ສາຍເຊື່ອມຕໍ່ຈິດໃຈປະຊາຊົນທີ່ສ້າງຄວາມສຸກຮ່ວມກັນ, ປະຊາຄົມຮ່ວມຊາຕາກຳຂອງປະເທດແມ່ນ້ຳລ້ານຊ້າງ-ແມ່ນ້ຳຂອງພັດທະນາໄປຢ່າງຟົດຟື້ນ, ການຮ່ວມມືລະຫວ່າງທ້ອງຖິ່ນໄດ້ຮັບໝາກຜົນຢ່າງອຸດົມສົມບູນ. ແຂວງຢຸນນານຈີນຈະເຊີດຊູນ້ຳໃຈແມ່ນ້ຳລ້ານຊ້າງ-ແມ່ນ້ຳຂອງ, ເພີ່ມທະວີການແລກປ່ຽນລະຫວ່າງທ້ອງຖິ່ນ, ປະກອບສ່ວນກຳລັງແຮງເຂົ້າໃນການເປີດ 10 ປີຄຳຮອບໃໝ່ໃຫ້ແກ່ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.
ທ່ານຢາງວ້ານມິງ ກ່າວວ່າ: ໃນໄລຍະ 10 ປີຜ່ານມາ, ຜົນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ນຳເອົາຜົນປະໂຫຍດມາໃຫ້ແກ່ປະຊາຊົນ 6 ປະເທດ. ຫວັງວ່າທ້ອງຖິ່ນຕ່າງໆຂອງປະເທດແມ່ນ້ຳລ້ານຊ້າງ-ແມ່ນ້ຳຂອງຈະເພີ່ມທະວີຄວາມສາມັກຄີ ແລະ ການປະສານງານ, ປັບປຸງພື້ນຖານທີ່ໜັກແໜ້ນໃຫ້ແກ່ປະຊາຄົມຮ່ວມຊາຕາກຳແມ່ນ້ຳລ້ານຊ້າງ-ແມ່ນ້ຳຂອງ; ຍຶດໝັ້ນການປະດິດສ້າງໃໝ່, ກຳແໜ້ນໂອກາດການພັດທະນາທີ່ຫັນເປັນດິຈິຕອນ, ຫັນເປັນອັດສະລິຍະ ແລະ ຫັນເປັນສີຂຽວ, ຍົກສູງຄຸນນະພາບ ແລະ ປະສິດທິພາບໃຫ້ແກ່ການຮ່ວມມືລະຫວ່າງທ້ອງຖິ່ນຂອງປະເທດແມ່ນ້ຳລ້ານຊ້າງ-ແມ່ນ້ຳຂອງ. ຝ່າຍຕ່າງໆທີ່ເຂົ້າຮ່ວມກອງປະຊຸມມີຄວາມເຫັນເປັນເອກະພາບກັນວ່າ: ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ຮັບການຊຸກຍູ້ໃຫ້ກ້າວໄປຂ້າງໜ້າຢ່າງຕິດແທດຕົວຈິງ ແລະ ມີປະສິດທິພາບສູງ, ອົງການປົກຄອງທ້ອງຖິ່ນຮ່ວມມືກັນຢ່າງໃກ້ຊິດ, ຊຶ່ງໄດ້ສ້າງຜົນປະໂຫຍດຕົວຈິງໃຫ້ແກ່ປະຊາຊົນທ້ອງຖິ່ນຕ່າງໆ. ທ່ານກ່າວຕື່ມວ່າ: ອົງການປົກຄອງທ້ອງຖິ່ນຂອງປະເທດຕ່າງໆຈະເສີມຂະຫຍາຍທ່າແຮງຂອງຕົນຢ່າງເຕັມທີ່, ເຂົ້າຮ່ວມການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ດ້ວຍຫຼາຍຮູບແບບ, ລົງເລິກການແລກປ່ຽນ ແລະ ການຮ່ວມມື, ເພີ່ມທະວີການໄປມາຫາສູ່ກັນດ້ານເສດຖະກິດການຄ້າ, ຍົກລະດັບການຮ່ວມມືໃນຂົງເຂດຕ່າງໆ ເຊັ່ນ: ກະສິກຳ, ການທ່ອງທ່ຽວ, ດ່ານເຂົ້າ-ອອກເມືອງ, ສື່ມວນຊົນ, ເມືອງແຮກສ່ຽວ, ການອະນຸລັກມໍລະດົກວັດທະນະທຳ ແລະອື່ນໆຢ່າງບໍ່ຢຸດຢັ້ງ, ປະກອບສ່ວນອັນໃໝ່ເຂົ້າໃນການສ້າງປະຊາຄົມຮ່ວມຊາຕາກຳຂອງປະເທດແມ່ນ້ຳລ້ານຊ້າງ-ແມ່ນ້ຳຂອງ.