ກອງປະຊຸມສຳມະນາການສ້າງແລວປະດິດສ້າງໃໝ່ພາກພື້ນແມ່ນ້ຳລ້ານຊ້າງ-ແມ່ນ້ຳຂອງ ຈັດຂຶ້ນຢ່າງເປັນທາງການ

ວັນທີ 11 ພະຈິກ 2025, ກອງປະຊຸມສຳມະນາກ່ຽວກັບການສ້າງແລວປະດິດສ້າງໃໝ່ພາກພື້ນແມ່ນ້ຳລ້ານຊ້າງ-ແມ່ນ້ຳຂອງ ຫຼື LM ຄັ້ງທີ 2 ຈັດຂຶ້ນຢູ່ນະຄອນຄຸນໝິງ ແຂວງຢູນນານ ມີຜູ້ແທນຈາກລັດຖະບານ, ສະຖາບັນການຄົ້ນຄວ້າວິທະຍາສາດ ແລະ ວິສາຫະກິດຂອງ 6 ປະເທດ LM ເຂົ້າຮ່ວມ ເພື່ອຮ່ວມກັນເປິກສາຫາລືກ່ຽວກັບແນວທາງການຮ່ວມມືໃນການປະດິດສ້າງໃໝ່ດ້ານເຕັກນິກວິທະຍາສາດ ພ້ອມທັງໄດ້ປະກາດ “ຂໍ້ລິເລີ່ມ ວ່າດ້ວຍການຮ່ວມມືດ້ານເຕັກນິກວິທະຍາສາດກ່ຽວກັບການແລກປ່ຽນຂໍ້ມູນຂ່າວສານຂ້າມແດນ LM” ຊຶ່ງໄດ້ເພີ່ມກຳລັງຊຸກຍູ້ໃໝ່ໃຫ້ແກ່ການສ້າງແລວປະດິດສ້າງໃໝ່ໃນພາກພື້ນ.

ກອງປະຊຸມໄດ້ສະເໜີວ່າ: ໃນ 3 ປີຕໍ່ໜ້າ, ທຸກຝ່າຍຈະສຸມໃສ່ຊຸກຍູ້ການຮ່ວມມືໃນ 3 ຂົງເຂດຫຼັກ ຄື: “ສີຂຽວ, ດີຈີຕອນ ແລະ ບຸກຄະລາກອນ”, ໂດຍປິ່ນອ້ອມການນຳໃຊ້ພະລັງງານສະອາດ, ການປົກປັກຮັກສາລະບົບນິເວດ ແລະ ເຕັກນິກດ້ານການບັນລຸການປອດການລະບາຍກາກບອນ, ຈະລົງເລິກການຮ່ວມມືລະຫວ່າງການຜະລິດ, ການສຶກສາຮ່ຳຮຽນ ແລະ ການຄົ້ນຄວ້າ, ພ້ອມທັງຮ່ວມກັນສ້າງພື້ນຖານໂຄງລ່າງດີຈີຕອນທີ່ໜ້າເຊື່ອຖື; ຈະດຳເນີນການຄົ້ນຄວ້າ ແລະ ພັດທະນາຮ່ວມກັນໃນຂົງເຂດຕ່າງໆ ເຊັ່ນ: ປັນຍາປະດິດ ແລະ ບລັອກເຊນ, ສ້າງຂອບຊີ້ນຳໃຫ້ແກ່ການແລກປ່ຽນຂໍ້ມູນຂ່າວສານໃນພາກພື້ນ, ເຮັດໃຫ້ຜົນປະໂຫຍດຈາກການຫັນປ່ຽນຮູບແບບການພັດທະນາ ສາມາດເປັນຜົນດີຕໍ່ການປັບປຸງຊີວິດການເປັນຢູ່ຂອງປະຊາຊົນ; ພ້ອມດຽວກັນ, ຍັງເປັນການຂະຫຍາຍຂອບເຂດຂອງແຜນການແລກປ່ຽນນັກວິທະຍາສາດໜຸ່ມ LM, ອີງໃສ່ເວທີຕ່າງໆ ເຊັ່ນ: ເວທີເປິກສາຫາລືລະຫວ່າງນັກວິທະຍາສາດ ເທິງຊົ່ງ (Tengchong), ສ້າງຕັ້ງກົນໄກການຈັດຊຸດຝຶກອົບຮົມ ແລະ ສຳມະນາຢ່າງເປັນປົກກະຕິ ເພື່ອບຳລຸງສ້າງບຸກຄະລາກອນທີ່ມີຄວາມສາມາດໃນຫຼາຍດ້ານ ຄື: ມີຄວາມຮູ້ຫຼາຍກ່ຽວກັບສະພາບຕົວຈິງຂອງພາກພື້ນ ແລະ ມີຄວາມຊຳນານດ້ານເຕັກນິກທີ່ກ້າວໜ້າ.