ມາເລເຊຍຮຽກຮ້ອງໃຫ້ນຳພາການພັດທະນາຂອງອາຊຽນໃນອະນາຄົດດ້ວຍການປະດິດສ້າງໃໝ່ ແລະ ປະສານງານກັນ
CRI, November 26, 2025
Size：
ວັນທີ 25 ພະຈິກນີ້, ຢູ່ນະຄອນຫຼວງກົວລາລຳເປີຂອງມາເລເຊຍ, ທ່ານຟາດິລາ ຢູຊົຟ ຮອງນາຍົກລັດຖະມົນຕີມາເລເຊຍກ່າວວ່າ: ອາຊຽນພວມຢວ່າງບາດກ້າວເຂົ້າສູ່ 10 ປີສຳຄັນທີ່ຕັດສິນທິດທາງກ້າວເດີນໃນອະນາຄົດ, ບັນດາປະເທດໃນພາກພື້ນຕ້ອງເພີ່ມຄວາມໜຽວແໜ້ນ ແລະ ຊຸກຍູ້ການພັດທະນາແບບຍືນຍົງ ດ້ວຍການປະດິດສ້າງໃໝ່ດ້ານວິທະຍາສາດເຕັກໂນໂລຊີ.
ທ່ານຟາດິລາ ຢູຊົຟໄດ້ກ່າວປາໄສໃນພິທີໄຂກອງປະຊຸມສຸດຍອດວ່າດ້ວຍການຮ່ວມມືແລະການພັດທະນາວິທະຍາສາດເຕັກໂນໂລຊີອາຊຽນປີ 2025 ທີ່ຈັດຂຶ້ນໃນມື້ດຽວກັນວ່າ: ປັດຈຸບັນນີ້, ວິທະຍາສາດເຕັກໂນໂລຊີທົ່ວໂລກໄດ້ຮັບການບຸກທະລຸຢ່າງວ່ອງໄວ, ໂຄງປະກອບເສດຖະກິດມີການປັບປ່ຽນຢ່າງເລິກເຊິ່ງ, ຄວາມສາມັກຄີປະສານງານກັນ ແລະ ຊົມໃຊ້ຜົນງານດ້ານການປະດິດສ້າງໃໝ່ ແມ່ນຄວາມຮຽກຮ້ອງຕ້ອງການທີ່ຈຳເປັນໃນການຊຸກຍູ້ການພັດທະນາຂອງພາກພື້ນອາຊຽນ.
ທ່ານຟາດິລາ ຢູຊົຟຮຽກຮ້ອງໃຫ້ບັນດາປະເທດສະມາຊິກອາຊຽນເພີ່ມທະວີການລົງທຶນໃນດ້ານການຄົ້ນຄວ້າວິທະຍາສາດຍຸດທະສາດຕື່ມອີກ, ເລັ່ງຊຸກຍູ້ການຄົ້ນຄວ້າພັດທະນາ ແລະ ການປະຍຸກໃຊ້ເຕັກໂນໂລຊີທີ່ສຳຄັນທາງດ້ານການຄ້າ ພ້ອມທັງດຶງດູດອົງການຄົ້ນຄວ້າວິທະຍາສາດ ແລະ ຜູ້ມີຄວາມຮູ້ຄວາມສາມາດລະດັບສູງມາພັດທະນາຢູ່ອາຊຽນ.