ເປີດຊຸດຝຶກອົບຮົມການຍົກລະດັບຄວາມສາມາດດ້ານດີຈີຕອນຢູ່ພາກເໜືອຂອງລາວ

ວັນທີ 18 ພະຈິກນີ້, ພິທີເປີດ “ການຝຶກອົບຮົມເຕັກນິກຂ້າມຊາດແມ່ນໍ້າຂອງແມ່ນໍ້າລ້ານຊ້າງ-ຊຸດຝຶກອົບຮົມການຍົກລະດັບຄວາມສາມາດດ້ານດີຈີຕອນຢູ່ພາກເໜືອຂອງລາວ” ໄດ້ຈັດຂຶ້ນຢູ່ນະຄອນຫຼວງພະບາງ.

ອາຈານສອນຢູ່ສະຖາບັນການສຶກສາຊັ້ນສູງ, ເຈົ້າໜ້າທີ່ຝ່າຍບໍລິຫານ ແລະອື່ນໆຢູ່ພາກເໜືອຂອງລາວທັງໝົດ 40 ຄົນໄດ້ເຂົ້າຮ່ວມການຝຶກອົບຮົມ. ຊຸດຝຶກອົບຮົມຄັ້ງນີ້ສຸມໃສ່ຄວາມຕ້ອງການດ້ານການຍົກລະດັບຄວາມສາມາດດ້ານດີຈີຕອນໃຫ້ແກ່ກຸ່ມຄົນທີ່ກ່ຽວຂ້ອງ, ໂດຍໄດ້ປິ່ນອ້ອມຄວາມຕ້ອງການຕົວຈິງໃນການວາງແຜນເນື້ອໃນການສອນທີ່ລວມທັງຂົງເຂດຕ່າງໆ ເຊັ່ນ: ຄວາມຮູ້ທົ່ວໄປຂອງປັນຍາປະດິດ ຫຼື AI ແລະ ສະພາບແວດລ້ອມຂອງເນື້ອໃນທີ່ຜະລິດໂດຍ AI ຫຼື AIGC, AI ເພີ່ມປະສິດທິພາບໃຫ້ແກ່ການປະຕິບັດງານ, AI ປະກອບສ່ວນເຂົ້າໃນການສິດສອນ, ຄົ້ນຄວ້າ ແລະ ການຕັດສິນນະໂຍບາຍທີ່ນໍາໃຊ້ຂໍ້ມູນຂ່າວສານເປັນແຮງຂັບເຄື່ອນ ເປັນຕົ້ນ.

ຂ່າວແຈ້ງໃຫ້ຮູ້ວ່າ: ພາຍຫຼັງສຳມະນາກອນສໍາເລັດການຝຶກອົບຮົມ ແລະ ຜ່ານການສອບເສັງແລ້ວ, ຈະໄດ້ຮັບໃບຢັ້ງຢືນທີ່ຜ່ານການຮັບຮອງຈາກມະຫາວິທະຍາໄລສອງຝ່າຍລາວ-ຈີນ. ໂຄງການດັ່ງກ່າວຈະດໍາເນີນຕໍ່ໄປຢ່າງຕໍ່ເນື່ອງ ເພື່ອປະກອບສ່ວນສ້າງບຸກຄະລາກອນທີ່ມີຄວາມຮູ້ຄວາມສາມາດ ແລະ ການສະໜັບສະໜູນດ້ານສະຕິປັນຍາຢ່າງຕໍ່ເນື່ອງເຂົ້າໃນການຫັນເປັນດີຈີຕອນຂອງລາວ.