ປະເທດສະມາຊິກອາຊຽນລົງນາມໃນ “ສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນ”

ແຫຼ່ງຂ່າວຈາກກອງເລຂາອາຊຽນແຈ້ງໃຫ້ຮູ້ວ່າ: ກອງປະຊຸມລັດຖະມົນຕີກະຊວງຍຸຕິທໍາອາຊຽນຄັ້ງທີ 13 ໄດ້ຈັດຂຶ້ນຢູ່ນະຄອນຫຼວງມານີລາປະເທດຟິລິບປິນໃນວັນທີ 14 ພະຈິກນີ້, ໂອກາດດັ່ງກ່າວ, ປະເທດສະມາຊິກອາຊຽນໄດ້ລົງນາມໃນ “ສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນ”.

ອີງຕາມຖະແຫຼງການຮ່ວມຂອງກອງປະຊຸມຄັ້ງນີ້ໃຫ້ຮູ້ວ່າ: ກອງປະຊຸມໄດ້ສະແດງຄວາມຊົມເຊີຍຕໍ່ວຽກງານຂອງກອງປະຊຸມເຈົ້າໜ້າທີ່ຕຸລາການລະດັບສູງອາຊຽນ ກໍຄື ວຽກວງານຂອງໜ່ວຍງານສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນທີ່ຂຶ້ນກັບກອງປະຊຸມດັ່ງກ່າວ. ພິເສດແມ່ນໄດ້ສໍາເລັດການເຈລະຈາສົນທິສັນຍາດັ່ງກ່າວ. ກອງປະຊຸມສະແດງຄວາມຍິນດີຕໍ່ການລົງນາມໃນສົນທິສັນຍາຄັ້ງນີ້, ພ້ອມທັງຄອງຄອຍປະເທດສະມາຊິກອາຊຽນທັງໝົດຈະສໍາເລັດຂັ້ນຕອນດ້ານກົດໝາຍພາຍໃນຂອງປະເທດໃຜລາວໂດຍໄວ. 

ຖະແຫຼງການລະບຸວ່າ: “ສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນ” ຈະສະໜັບສະໜູນ ແລະ ສ້າງຄວາມສະດວກຢ່າງແຂງແຮງໃຫ້ແກ່ຄວາມພະຍາຍາມ ແລະ ຄວາມສາມາດໃນການຕ້ານການກໍ່ອາດຊະຍາກໍາຂ້າມຊາດ ກໍຄື ການເພີ່ມທະວີການປົກຄອງຕາມກົດໝາຍ ແລະ ດ້ານຕຸລາການຂອງອາຊຽນ.