ກອງປະຊຸມຮ່ວມມືດ້ານກະສິກຳ ແລະ ການຫຼຸດຜ່ອນຄວາມທຸກຍາກຈີນ-ອາຊຽນ 2025 ຈະຈັດຂຶ້ນຢູ່ນະຄອນນານນິງເຂດກວາງຊີຈີນ
CRI, September 18, 2025
Size：
ພະແນກກະສິກຳ ແລະ ຊົນນະບົດເຂດປົກຄອງຕົນເອງເຜົ່າຈ້ວງກວາງຊີຂອງຈີນເປີດເຜີຍໃນວັນທີ 13 ກັນຍານີ້ວ່າ, ກອງປະຊຸມຮ່ວມມືດ້ານກະສິກຳ ແລະ ຫຼຸດຜ່ອນຄວາມທຸກຍາກຈີນ-ອາຊຽນ 2025 ຈະຈັດຂຶ້ນຢູ່ນະຄອນນານນິງເຂດກວາງຊີຈີນໃນວັນທີ 18 ກັນຍານີ້. ກອງປະຊຸມພາຍໃຕ້ຫົວຂໍ້ “ຮ່ວມກັນປຶກສາຫາລືກ່ຽວກັບກະສິກຳອັດສະລິຍະ ແລະ ການຫຼຸດຜ່ອນຄວາມທຸກຍາກ, ຮ່ວມກັນພັດທະນາກຳລັງການຜະລິດໃນຄຸນນະພາບໃໝ່”, ເປົ້າໝາຍແມ່ນເພື່ອລົງເລິກການຮ່ວມມືຢ່າງແທ້ຈິງລະຫວ່າງຈີນກັບປະເທດສະມາຊິກອາຊຽນໃນຂົງເຂດກະສິກຳອັດສະລິຍະ, ຫຼຸດຜ່ອນຄວາມທຸກຍາກ ແລະຂົງເຂດອື່ນໆ, ເພີ່ມພະລັງແຮງໃໝ່ໃຫ້ແກ່ການພັດທະນາກະສິກຳ ແລະ ຊົນນະບົດຂອງພາກພື້ນ.
ກອງປະຊຸມຈະເຊື້ອເຊີນຜູ້ຕາງໜ້າພາກສ່ວນກະສິກຳຈາກປະເທດສະມາຊິກອາຊຽນ, ທູຕານຸທູດອາຊຽນປະຈຳຈີນ ແລະ ຜູ້ຕາງໜ້າອົງການຈັດຕັ້ງສາກົນທີ່ກ່ຽວຂ້ອງ, ເຈົ້າໜ້າທີ່ກະຊວງກະສິກຳ ແລະ ຊົນນະບົດຈີນ ແລະອົງການປົກຄອງທ້ອງຖິ່ນຈີນ 20 ກວ່າແຂວງ (ເຂດປົກຄອງຕົນເອງຫຼືກຳແພງນະຄອນ), ຜູ້ຊ່ຽວຊານ ແລະ ຜູ້ແທນວິສາຫະກິດຕ່າງໆເຂົ້າຮ່ວມ, ເພື່ອດຳເນີນການສົນທະນາລະດັບສູງ ແລະ ແລກປ່ຽນກັນດ້ານອຸດສາຫະກຳ.
ຝ່າຍຕ່າງໆທີ່ເຂົ້າຮ່ວມກອງປະຊຸມຈະປຶກສາຫາລືກ່ຽວກັບການປະສານງານຂ້າມຊາດກ່ຽວກັບເຕັກນິກກະສິກຳອັດສະລິຍະ, ພັດທະນາກຳລັງການຜະລິດໃນຄຸນນະພາບໃໝ່, ການຮ່ວມມືໂຄງການຫຼຸດຜ່ອນຄວາມທຸກຍາກທີ່ສ້າງຜົນປະໂຫຍດທົ່ວເຖິງ ແລະຫົວຂໍ້ສຳຄັນອື່ນໆ, ເພື່ອຊ່ວຍສ້າງສາຍພົວພັນຄູ່ຮ່ວມມືດ້ານກະສິກຳໃນພາກພື້ນທີ່ແໜ້ນແຟ້ນກວ່າເກົ່າ.