ມະຫາວິທະຍາໄລຊົນເຜົ່າຢູນນານຈັດການ “ປະ​ຊຸມວິ​ຊາ​ການແມ່ນ້ຳລ້ານຊ້າງ-ແມ່ນ້ຳຂອງ” ໃນລະຫວ່າງສັບປະດາແມ່ນ້ຳລ້ານຊ້າງ-ແມ່ນ້ຳຂອງ 2025

ເມື່ອບໍ່ດົນມານີ້, ມະຫາວິທະຍາໄລຊົນເຜົ່າຢູນນານໄດ້ຈັດກິດຈະກຳຢ່າງເປັນລະບົບພາຍໃຕ້ສັບປະດາແມ່ນ້ຳລ້ານຊ້າງ-ແມ່ນ້ຳຂອງ ຫຼື LM 2025 ແລະ ໃນບັນດາກິດຈະກໍາດັ່ງກ່າວ ການ “ປະຊຸມວິຊາການ LM” ຊຶ່ງເປັນກິດຈະກຳທີ່ໄດ້ຮັບຄວາມສົນໃຈຫຼາຍທີ່ສຸດ ໄດ້ເລີ່ມດຳເນີນການຢ່າງເປັນທາງການ ມີຜູ້ຕາງໜ້າຈາກສະມາຊິກສະພາບໍລິຫານປະຈຳການຂອງພັນທະມິດການສຶກສາວິຊາຊີບ LM ແລະ ສະມາຊິກໃໝ່ຂອງພັນທະມິດ ກໍຄື ຜູ້ຮັບຜິດຊອບຂອງພາກສ່ວນທີ່ກ່ຽວຂ້ອງ, ຜູ້ຕາງໜ້າຄູອາຈານ ແລະ ນັກສຶກສາຈາກມະຫາວິທະຍາໄລຊົນເຜົ່າຢູນນານໄດ້ເຂົ້າຮ່ວມງານດັ່ງກ່າວ.

ທ່ານ ຫວັງສີຫຼຽງ (Wang Qiliang), ອະທິການບໍດີ ມະຫາວິທະຍາໄລຊົນເຜົ່າຢູນນານ ມີຄຳເຫັນວ່າ: ການເລີ່ມດຳເນີນການຂອງການ “ປະຊຸມວິຊາການ LM” ແມ່ນບາດກ້າວສຳຄັນຂອງມະຫາວິທະຍາໄລໃນການຊຸກຍູ້ການຮ່ວມມືດ້ານອາຊີວະສຶກສາລະຫວ່າງບັນດາປະເທດ LM. ມະຫາວິທະຍາໄລຊົນເຜົ່າຢູນນານ ໃນຖານະເປັນປະທານສະພາບໍລິຫານປະຈຳການຂອງພັນທະມິດການສຶກສາວິຊາຊີບ LM, ຈະວາງແຜນການລວມຢ່າງຮອບດ້ານ, ເຕົ້າໂຮມກຳລັງແຮງຂອງທຸກຝ່າຍ ແລະ ຊຸກຍູ້ໃຫ້ການ “ປະຊຸມວິຊາການ LM” ສາມາດດຳເນີນງານຢ່າງມີປະສິດທິພາບສູງຕາມຫຼັກວິທະຍາສາດ, ໂດຍສຸມໃສ່ການສ້າງຮູບແບບໃໝ່ “ອາຊີວະສຶກສາກ້າວໄປສູ່ຕ່າງປະເທດ” ທີ່ມີເອກະລັກສະເພາະຂອງແຂວງຢູນນານ ເພື່ອປະກອບສ່ວນກຳລັງແຮງຂອງພາກເອກະຊົນເຂົ້າໃນການພັດທະນາອາຊີວະສຶກສາໃນພາກພື້ນ.

ໃນສະຖານທີ່ຈັດງານ, ທ່ານ ຫວັງສີຫຼຽງ ໄດ້ມອບປ້າຍສະມາຊິກສະພາບໍລິຫານໃຫ້ແກ່ຜູ້ເຂົ້າຮ່ວມພັນທະມິດການສຶກສາວິຊາຊີບ LM ໃໝ່ 7 ແຫ່ງ ລວມທັງວິທະຍາໄລເຕັກນິກວິຊາຊີບການລົດໄຟຄຸນໝິງ, ກຸ່ມບໍລິສັດສະຖາບັນການອອກແບບ ແຂວງຢູນນານ ຊຶ່ງເປັນການເພີ່ມທະວີກຳລັງແຮງຂອງພັນທະມິດອີກບາດກ້າວໜຶ່ງ ແລະ ເພີ່ມພູນຄູນສ້າງພະລັງຊີວິດໃໝ່ໃຫ້ແກ່ການຮ່ວມມືດ້ານອາຊີວະສຶກສາ LM.

ນອກຈາກພິທີເລີ່ມດຳເນີນການຂອງການ “ປະຊຸມວິຊາການ LM” ແລ້ວ, ສັບປະດາ LM ຄັ້ງນີ້ຍັງໄດ້ຈັດຫຼາຍກິດຈະກຳທີ່ໜ້າສົນໃຈ. ໃນນັ້ນ, ການວາງສະແດງຜົນງານການບຳລຸງສ້າງບຸກຄະລາກອນ “ວິຊາຊີບ + ພາສາທີ່ບໍ່ນຳໃຊ້ທົ່ວໄປຢູ່ໃນທົ່ວໂລກ” ຄົບຮອບ 10 ປີ ເປັນການວາງສະແດງແບບລວມສູນເຖິງຜົນງານອັນອຸດົມສົມບູນຂອງມະຫາວິທະຍາໄລຊົນເຜົ່າຢູນນານໃນການບຳລຸງສ້າງບຸກຄະລາກອນທີ່ມີເອກະລັກສະເພາະ; ກອງປະຊຸມແລກປ່ຽນກ່ຽວກັບກໍລະນີການຮຽນການສອນດ້ານການບຳລຸງສ້າງບຸກຄະລາກອນ “ວິຊາຊີບ + ພາສາທີ່ບໍ່ນຳໃຊ້ທົ່ວໄປຢູ່ໃນທົ່ວໂລກ” ລະຫວ່າງມະຫາວິທະຍາໄລທີ່ເປັນສະມາຊິກຂອງພັນທະມິດການສຶກສາວິຊາຊີບ LM ໄດ້ສະໜອງເວທີການແລກປ່ຽນບົດຮຽນ ແລະ ດຳເນີນການຮ່ວມມືໃຫ້ແກ່ບັນດາມະຫາ ວິທະຍາໄລທີ່ກ່ຽວຂ້ອງ; ງານຕະຫຼາດນັດອາຫານ ແລະ ເຄື່ອງຫັດຖະກຳ LM ໄດ້ຊ່ວຍເພີ່ມທະວີຄວາມຮັບຮູ້ຂອງຄູອາຈານ ແລະ ນັກສຶກສາກ່ຽວກັບວັດທະນະທຳຂອງບັນດາປະເທດຢູ່ຕາມເຂດ LM ໂດຍຜ່ານກິດຈະກຳສຳຜັດກັບວັດທະນະທຳທີ່ອຸດົມສົມບູນ ແລະ ຫຼາກຫຼາຍ.