ເກີດເຫດທາງຍົກລະດັບທີ່ກຳລັງກໍ່ສ້າງພັງທະລາຍຢູ່ນະຄອນຫຼວງບາງກອກປະເທດໄທ ເຮັດໃຫ້ມີຜູ້ເສຍຊີວິດຢ່າງໜ້ອຍ 5 ຄົນ
CGTN, March 17, 2025
Size：
ວັນທີ 15 ມີນານີ້ ເຈົ້າໜ້າທີ່ລັດຖະບານໄທກ່າວຢືນຢັນວ່າ: ທາງຍົກລະດັບສາຍໜຶ່ງທີ່ກຳລັງກໍ່ສ້າງຢູ່ນະຄອນຫຼວງບາງກອກ ໄດ້ເກີດອຸບັດເຫດພັງທະລາຍໃນຕອນຮຸ່ງເຊົ້າມື້ດຽວກັນ ເຮັດໃຫ້ມີຜູ້ເສຍຊີວິດຢ່າງໜ້ອຍ 5 ຄົນ.
ອີງຕາມແຫຼ່ງຂ່າວຈາກສື່ມວນຊົນໄທຫຼາຍສຳນັກລາຍງານໃຫ້ຮູ້ວ່າ: ອຸບັດຕິເຫດຄັ້ງນີ້ເກີດຂຶ້ນໃນເວລາປະນານ 2 ໂມງຂອງ ວັນທີ 15 ມີນານີ້, ເວລານັ້ນ, ຄານເບຕົງເສີມເຫຼັກທີ່ກຳມະກອນກຳລັງເທເບຕົງກໍ່ສ້າງຢູ່ນັ້ນໄດ້ຫັກພັງລົງກະທັນຫັນ.
ທ່ານ ສຸຣິຍະ ຈິງຣຸ່ງເຣືອງກິດ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງຄົມມະນາຄົມໄທທີ່ເດີນທາງໄປກວດກາສະພາບການຢູ່ສະຖານທີ່ເກີດເຫດນັ້ນໄດ້ຢືນຢັນວ່າ ອຸບັດຕິເຫດຄັ້ງນີ້ ເຮັດໃຫ້ມີຜູ້ເສຍຊີວິດຢ່າງໜ້ອຍ 5 ຄົນ, ໃນນີ້ ລວມທັງພະນັກງານຄົນໄທ 3 ຄົນ, ກຳມະກອນມຽນມາ 2 ຄົນ, ນອກນີ້ຍັງມີຜູ້ໄດ້ຮັບບາດເຈັບຢ່າງໜ້ອຍ 24 ຄົນ.
ພາຍຫຼັງອຸບັດຕິເຫດເກີດຂຶ້ນແລ້ວ, ເສັ້ນທາງຢູ່ໃກ້ສະຖານທີ່ເກີດເຫດໄດ້ຖືກປິດການສັນຈອນເປັນການຊົ່ວຄາວ.
ແຫຼ່ງຂ່າວຈາກ: CGTN