ທ່ານຮອງນາຍົກລັດຖະມົນຕີແຫ່ງລາຊະອານາຈັກກຳປູເຈຍ: ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຊ່ວຍໃນການຫຼຸດຊ່ອງວ່າງການພັດທະນາຂອງປະເທດອາຊຽນໃໝ່ ແລະ ເກົ່າ

ວັນທີ 5 ກັນຍາ, ທ່ານ ຫວັ່ງເວີນປິ່ນ (Wang Wenbin), ເອກອັກຄະລັດຖະທູດ ແຫ່ງ ສປ ຈີນ ປະຈຳ ລາຊະອານາຈັກກຳປູເຈຍ, ທ່ານ Sok Chenda Sophea, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ລາຊະອານາຈັກກຳປູເຈຍ ໄດ້ຮ່ວມລົງນາມໃນສັນຍາໂຄງການປະເທດກຳປູເຈຍ ພາຍໃຕ້ ກອງທຶນພິເສດການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ (LM) ປະຈຳປີ 2024 ທີ່ນະຄອນຫຼວງພະນົມເປັນ.

8 ໂຄງການຂອງປະເທດກຳປູເຈຍ ພາຍໃຕ້ກອງທຶນພິເສດການຮ່ວມມື LM ທີ່ຮັບການລົງນາມໃນມື້ນັ້ນ ແມ່ນໄດ້ຮັບການຊ່ວຍເຫຼືອດ້ານທຶນຮອນທັງໝົດ 2 ລ້ານໂດລາສະຫະລັດ, ເຊິ່ງກວມເອົາຫຼາຍຂົງເຂດ ເຊັ່ນ "ສັບປະດາ LM", ການຮ່ວມມືດ້ານການເກັບກູ້ລະເບີດ, ການທ່ອງທ່ຽວລະບົບນິເວດ, ອາຊີວະສຶກສາ, ການພັດທະນາກະສິກຳ ເປັນຕົ້ນ.

ທ່ານ ຫວັ່ງເວີນປິ່ນ ໄດ້ກ່າວວ່າ ຝ່າຍຈີນຍິນດີຮ່ວມກັບຝ່າຍກຳປູເຈຍສືບຕໍ່ລົງເລິກການຮ່ວມມືໃນຫຼາຍຂົງເຂດ ພາຍໃຕ້ຂອບ LM ຢ່າງຕໍ່ເນື່ອງ, ໂດຍສະເພາະແມ່ນດຳເນີນໂຄງການທີ່ີມີຂະໜາດນ້ອຍແຕ່ສົມບູນແບບ  ໃຫ້ຫຼາຍກວ່າເກົ່າ ເພື່ອເຮັດໃຫ້ຜົນການຮ່ວມມືປະກອບສ່ວນໃຫ້ຫຼາຍກວ່າເກົ່າ ເຂົ້າໃນການພັດທະນາເສດຖະກິດ ແລະ ສັງຄົມຂອງປະເທດກຳປູເຈຍ ແລະ ນຳເອົາຜົນປະໂຫຍດມາສູ່ປະຊາຊົນທົ່ວໄປຂອງທ້ອງຖິ່ນໃຫ້ຫຼາຍກວ່າເກົ່າ.

ທ່ານ Sok Chenda Sophea ໄດ້ຕີລາຄາສູງຕໍ່ໝາກຜົນທີ່ໄດ້ຮັບໃນກອງປະຊຸມລັດຖະມົນຕີການຕ່າງປະເທດຄັ້ງທີ 9 ຂອບການຮ່ວມມື LM ທີ່ຈັດຂຶ້ນຢູ່ປະເທດໄທໃນບໍ່ດົນຜ່ານມາ, ທັງໄດ້ຢ້ຳຄືນອີກຄັ້ງໜຶ່ງເຖິງຄວາມຕັດສິນໃຈຂອງຝ່າຍກຳປູເຈຍໃນການຮ່ວມມືກັບທຸກຝ່າຍໃນພາກພື້ນ ເພື່ອສຸມໃສ່ການສ້າງປະຊາຄົມຮ່ວມຊາຕາກຳ ທີ່ມີສັນຕິພາບ, ຄວາມຈະເລີນຮຸ່ງເຮືອງ ແລະ ບັນລຸການພັດທະນາແບບຍືນຍົງ ລະຫວ່າງບັນດາປະເທດ LM.

ທ່ານໄດ້ຊີ້ອອກວ່າ ປັດຈຸບັນ ອາຊຽນມີສະມາຊິກ 10 ປະເທດ, ເຊິ່ງໃນນັ້ນ ປະເທດມຽນມາ, ຫວຽດນາມ, ລາວ ແລະ ກຳປູເຈຍ ຖືວ່າເປັນ "ປະເທດສະມາຊິກໃໝ່ຂອງອາຊຽນ". ກົນໄກການຮ່ວມມື LM ບໍ່ພຽງແຕ່ຈະຊຸກຍູ້ການພັດທະນາດ້ານເສດຖະກິດຂອງປະເທດພາຍໃນພາກພື້ນແລະຍົກສູງລະດັບຊີວິດການເປັນຢູ່ຂອງປະຊາຊົນຂອງທຸກປະເທດເທົ່ານັ້ນ, ສຳຄັນກວ່ານັ້ນແມ່ນຍັງສາມາດຊ່ວຍໃນການຫຼຸດຊ່ອງວ່າງການພັດທະນາລະຫວ່າງປະເທດສະມາຊິກໃໝ່ຂອງອາຊຽນ ກັບ ປະເທດສະມາຊິກເກົ່າຂອງອາຊຽນ.