ກອງປະຊຸມສຳມະນາແມ່ນ້ຳລ້ານຊ້າງ-ແມ່ນ້ຳຂອງ ໄດ້ຈັດຂຶ້ນຢູ່ ສສ ມຽນມາ ພາຍໃຕ້ຫົວຂໍ້ “ການພັດທະນາການທ່ອງທ່ຽວຢູ່ແຫຼ່ງທ່ອງທ່ຽວມໍລະດົກວັດທະນະທຳແບບຍືນຍົງ ໃນຍຸກຫຼັງໂຄວິດ-19”

ໃນລະຫວ່າງວັນທີ 23 ຫາ 24 ສິງຫາ, ກອງປະຊຸມສຳມະນາຂອງແມ່ນ້ຳລ້ານຊ້າງ-ແມ່ນ້ຳຂອງ (LM) ພາຍໃຕ້ຫົວຂໍ້ “ການພັດທະນາ ການທ່ອງທ່ຽວຢູ່ແຫຼ່ງທ່ອງທ່ຽວທາງດ້ານມໍລະດົກວັດທະນະທຳແບບຍືນຍົງ ໃນຍຸກຫຼັງໂຄວິດ-19” ທີ່ເປັນໂຄງການຂອງກອງທຶນພິເສດ LM ໄດ້ຈັດຂຶ້ນຢູ່ນະຄອນບາກັນ ສສ ມຽນມາ, ໂດຍມີ ທ່ານ ນາງ ມາຈາ (Ma Jia), ເອກອັກຄະລັດຖະທູດ ແຫ່ງ ສປ ຈີນ ປະຈຳ ສສ ມຽນມາ, ທ່ານ Thet Thet Khine, ລັດຖະມົນຕີກະຊວງໂຮງແຮມ ແລະ ທ່ອງທ່ຽວ ແຫ່ງ ສສ ມຽນມາພ້ອມດ້ວຍບັນດາເຈົ້າໜ້າທີ່ ພາກລັດ ແລະ ຊ່ຽວຊານ-ນັກປາດຈາກປະເທດ LM ເຂົ້າຮ່ວມ.

ທ່ານ Thet Thet Khine ຂຶ້ນກ່າວຄໍາປາໄສ.

ທ່ານ ນາງ ມາຈາ ໄດ້ກ່າວວ່າ ຮອດປັດຈຸບັນ, ການຮ່ວມມື LM ຢ່າງຮອບດ້ານ ໄດ້ດໍາເນີນມາເປັນເວລາ 8 ປີແລ້ວ, ການຮ່ວມມືດັ່ງກ່າວໄດ້ສ້າງໝາກຜົນອັນອຸດົມສົມບູນ ໂດຍໄດ້ສ້າງຄວາມຜາສຸກໃຫ້ແກ່ປະຊາຊົນຂອງບັນດາປະເທດຢູ່ລຽບຕາມລ້ອງແມ່ນ້ຳ, ເຊິ່ງໄດ້ກາຍເປັນ “ເວທີທອງຄຳ” ແຫ່ງການຮ່ວມມືໃນພາກພື້ນ; ຫວັງວ່າ ບັນດາແຂກຜູ້ມີກຽດທີ່ເຂົ້າຮ່ວມກອງປະຊຸມຈະສຸມໃສ່ຫົວຂໍ້ການພັດທະນາ, ລົງເລິກການແລກປ່ຽນ ແລະ ການຮ່ວມມື ເພື່ອຮ່ວມກັນຊຸກຍູ້ການຈັດຕັ້ງປະຕິບັດຂໍ້ລິເລີ່ມ ວ່າດ້ວຍ ອາລິຍະທຳທົ່ວໂລກ ໃຫ້ເປັນຮູບປະທຳ ແລະ ການສ້າງປະຊາຄົມຮ່ວມຊະຕາກຳຂອງປະເທດ LM.

ທ່ານນາງ ມາຈາ ຂຶ້ນກ່າວຄໍາປາໄສ.

ທ່ານ Thet Thet Khine ໄດ້ສະແດງຄວາມຂອບໃຈຕໍ່ຝ່າຍຈີນທີ່ໄດ້ປະກອບທຶນເຂົ້າໃນກອງທຶນພິເສດ LM ແລະ ໄດ້ຕີລາຄາສູງຕໍ່ບົດບາດອັນສໍາຄັນຂອງກົນໄກການຮ່ວມມື LM ຕໍ່ການພັດທະນາຂະແໜງການໃນພາກພື້ນນີ້.

ທ່ານນາງ ມາຈາ ມອບເຄື່ອງລະນຶກທີ່ມີເອກະລັກສະເພາະຂອງຈີນໃຫ້ແກ່ ທ່ານ Thet Thet Khine.

ໃນເວລາດຳເນີນກອງປະຊຸມ, ທ່ານ ນາງ ມາຈາ ແລະ ທ່ານ Thet Thet Khine ໄດ້ແລກປ່ຽນຄຳຄິດເຫັນຢ່າງເລິກເຊິ່ງ ກ່ຽວກັບ ການເພີ່ມທະວີການແລກປ່ຽນທາງດ້ານວັດທະນະທຳ ແລະ ການຮ່ວມມືດ້ານການທ່ອງທ່ຽວລະຫວ່າງ ສປ ຈີນ ແລະ ສສ ມຽນມາ.