ທ່ານ ຊຸ່ນເວີ້ຍຕົງ ຮອງລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ຄັ້ງທີ 11

ວັນທີ 8 ສິງຫາ 2024, ກອງປະຊຸມເຈົ້າໜ້າທີ່ອາວຸໂສຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ (LM) ຄັ້ງທີ 11 ໄດ້ຈັດຂຶ້ນຜ່ານຮູບແບບວິດີໂອທາງໄກ ໂດຍການເປັນປະທານຮ່ວມຂອງ ທ່ານ ຊຸ່ນເວີ້ຍຕົງ (Sun Weidong) ຮອງລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ  ແລະ ທ່ານນາງ ຣູຈິກອນ ແສງຈັນ ເຈົ້າໜ້າທີ່ອາວຸໂສ ແຫ່ງ ລາຊະອານາຈັກໄທ ທີ່ມາຈາກສອງປະເທດປະທານຮ່ວມຂອງຂອບ LM ແລະ ມີເຈົ້າໜ້າທີ່ອາວຸໂສຈາກປະເທດກໍາປູເຈຍ, ລາວ, ມຽນມາ ແລະ ຫວຽດນາມເຂົ້າຮ່ວມ. ຫົກປະເທດໄດ້ຫວນຄືນຄວາມຄືບໜ້າຂອງການຮ່ວມມື LM ແລະ ໄດ້ແລກປ່ຽນຄຳຄິດເຫັນຢ່າງເລິກເຊິ່ງໂດຍເນັ້ນໜັກເຖິງບັນຫາຕ່າງໆ, ເຊັ່ນ: ທິດທາງການຮ່ວມມືໃນຕໍ່ໜ້າ, ການກະກຽມຄວາມພ້ອມໃຫ້ແກ່ການຈັດກອງປະຊຸມລັດຖະມົນຕີການຕ່າງປະເທດຂອບການຮ່ວມມື LM ຄັ້ງທີ 9.

ທ່ານ ຊຸ່ນເວີ້ຍຕົງ ກ່າວວ່າ ປີນີ້ແມ່ນປີທຳອິດໃນການຈັດຕັ້ງຜັນຂະຫຍາຍແຜນປະຕິບັດງານ 5 ປີ ຄັ້ງທີ 2 ຂອງຂອບການຮ່ວມມື LM, ຫົກປະເທດໄດ້ຕັ້ງໜ້າຈັດຕັ້ງປະຕິບັດຄວາມເຫັນເປັນເອກະພາບກັນອັນສຳຄັນທີ່ໄດ້ບັນລຸໃນກອງປະຊຸມຜູ້ນຳ ຄັ້ງທີ 4 ແລະ ກອງປະຊຸມລັດຖະມົນຕີການຕ່າງປະເທດ ຄັ້ງທີ 8 ຂອງຂອບການຮ່ວມມື LM ແລະ ໄດ້ຕັ້ງໜ້າຂະຫຍາຍການຮ່ວມມືໃນທຸກຂົງເຂດ, ເຊິ່ງໄດ້ສ້າງໝາກຜົນອັນອຸດົມສົມບູນ ແລະ ໄດ້ຊຸກຍູ້ສົ່ງເສີມສັນຕິພາບ, ຄວາມໝັ້ນຄົງ, ການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ LM ຢ່າງແຂງແຮງ.

ທ່ານ ຊຸ່ນເວີ້ຍຕົງ ຍັງໄດ້ນໍາສະເໜີກ່ຽວກັບເນື້ອໃນ ແລະ ໝາກຜົນອັນສຳຄັນທີ່ໄດ້ຮັບໃນກອງປະຊຸມຄົບຄະນະຄັ້ງທີ 3 ຂອງຄະນະກໍາມະການສູນກາງພັກຄອມມູນິດຈີນສະໄໝທີ XX ທັງໄດ້ກ່າວວ່າ ເມື່ອປະເຊີນໜ້າກັບຄວາມປັ່ນປ່ວນ ຢ່າງສະຫຼັບສັບຊ້ອນໃນໂລກນີ້, ຝ່າຍຈີນຈະຖືເອົາເນື້ອໃນຈິດໃຈຂອງກອງປະຊຸມຄົບຄະນະດັ່ງກ່າວເປັນທິດຊີ້ນຳ ເພື່ອລົງເລິກການປະຕິຮູບຢ່າງຮອບດ້ານອີກກ້າວໜຶ່ງ ແລະ ຊຸກຍູ້ຄວາມທັນສະໄໝແບບຈີນ. ຝ່າຍຈີນຍິນດີຮ່ວມກັບບັນດາປະເທດແມ່ນ້ຳຂອງລົງເລິກເສີມຂະຫຍາຍຄວາມສາມັກຄີ ແລະ ການຮ່ວມມື, ຮ່ວມກັນຊຸກຍູ້ການເຊື່ອມໂຍງເຊື່ອມຈອດກັນ ແລະ ການພັດທະນາແບບສີຂຽວໃນພາກພື້ນ, ຮ່ວມມືກັນຮັບມືກັບສິ່ງທ້າທາຍຂອງຄວາມໝັ້ນຄົງແບບໃໝ່ ແລະ ການສ້າງເຂດສາທິດ ການສ້າງ “ໜຶ່ງແລວ ໜຶ່ງເສັ້ນທາງ” ຮ່ວມກັນ, ການສ້າງເຂດນຳໜ້າໃນການປະຕິບັດຂໍ້ລິເລີ່ມ ວ່າດ້ວຍ ການພັດທະນາທົ່ວໂລກ, ການສ້າງເຂດທົດລອງໃນການປະຕິບັດຂໍ້ລິເລີ່ມ ວ່າດ້ວຍ ຄວາມໝັ້ນຄົງທົ່ວໂລກ, ການສ້າງເຂດຕົວແບບໃນການປະຕິບັດຂໍ້ລິເລີ່ມ ວ່າດ້ວຍ ອາລິຍະທຳທົ່ວໂລກ ເພື່ອເລັ່ງລັດໃນການສ້າງປະຊາຄົມຮ່ວມຊະຕາກຳຂອງປະເທດ LM.

ແຕ່ລະຝ່າຍຕ່າງກໍໄດ້ສະແດງຄວາມຊົມເຊີຍຕໍ່ການເປີດກອງປະຊຸມຄົບຄະນະ ຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນ ສະໄໝທີ XX ຢ່າງສໍາເລັດຜົນ, ໄດ້ຕີລາຄາສູງຕໍ່ຄວາມຄືບໜ້າຢ່າງວ່ອງໄວຂອງການດໍາເນີນການຮ່ວມມື LM ເປັນເວລາ 8 ປີ, ພ້ອມທັງໄດ້ສະແດງຄວາມຂອບໃຈຕໍ່ກອງທຶນພິເສດ LM ທີ່ໄດ້ໃຫ້ການສະໜັບສະໜູນອັນສຳຄັນຕໍ່ການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນຂອງປະເທດຕ່າງໆ. ນອກຈາກນີ້ແລ້ວ, ແຕ່ລະຝ່າຍຍັງໄດ້ປະກອບຄຳເຫັນຢ່າງເອກະພາບກັນວ່າ ຍິນດີຈະເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນດ້ານການເມືອງ, ລົງເລິກການຮ່ວມມືຢ່າງຕິດແທດຕົວຈິງ, ຮ່ວມກັນປະຕິບັດແຜນປະຕິບັດງານ 5 ປີ ຄັ້ງທີ 2 ໃຫ້ເປັນຮູບປະທໍາ ເພື່ອສ້າງຄວາມຜາສຸກໃຫ້ແກ່ປະຊາຊົນທີ່ອາໄສຢູ່ຕາມເຂດລ້ອງແມ່ນ້ຳ.