ງານສັບປະດາຮູບ-ວິດີໂອສາກົນແມ່ນໍ້າລ້ານຊ້າງ-ແມ່ນໍ້າຂອງປະຈໍາປີ 2024 ໄດ້ໄຂຂຶ້ນທີ່ເມືອງຢູ້ຊູ້

ໃນວັນທີ 18 ສິງຫາທີ່ຜ່ານມາ, ງານສັບປະດາຮູບ-ວິດີໂອສາກົນແມ່ນໍ້າລ້ານຊ້າງ-ແມ່ນໍ້າຂອງປະຈໍາປີ 2024 ໄດ້ໄຂຂຶ້ນຢ່າງເປັນທາງການ ທີ່ສະໜາມເກສະເອີ ເມືອງຢູ້ຊູ້ ແຂວງຊິງໄຫ ສປ ຈີນ.

ງານສັບປະດາຄັ້ງນີ້ດໍາເນີນພາຍໃຕ້ຫົວຂໍ້ "ຮ່ວມຊົມໃຊ້ແມ່ນໍ້າສາຍດຽວກັນ, ຢູ່ຮ່ວມກັນໃຕ້ແສງລັດສະໝີແມ່ນໍ້າລ້ານຊ້າງ-ແມ່ນໍ້າຂອງ" ເຊິ່ງມີຈຸດປະສົງນໍາໃຊ້ຮູບພາບ ແລະ ວິດີໂອ ເພື່ອເສີມຂະຫຍາຍມິດຕະພາບ, ເລົ່າຂານມົນສະເໜ່ ຂອງບັນດາປະເທດແມ່ນໍ້າລ້ານຊ້າງ ແລະ ແມ່ນໍ້າຂອງ  ເພື່ອສະແດງໃຫ້ທົ່ວໂລກເຫັນໄດ້ເຖິງຜົນງານອັນໃຫຍ່ຫຼວງຂອງລຸ່ມແມ່ນໍ້າລ້ານຊ້າງ-ແມ່ນໍ້າຂອງ ໃນການພັດທະນາເສດຖະກິດ, ການປົກປັກຮັກສາລະບົບນິເວດ, ການແລກປ່ຽນດ້ານວັດທະນະທໍາ ແລະ ສັງຄົມ, ການປັບປຸງຊີວິດການເປັນຢູ່ຂອງປະຊາຊົນ ແລະ ດ້ານອື່ນໆ. ໃນໄລຍະງານສັບປະດາ, ນັກການທູດ, ຕົວແທນສື່ມວນຊົນຫຼັກ, ຊ່າງຖ່າຍຮູບ, ແອັດມິນພາທ່ຽວ ຈາກບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງ ຈະໄດ້ພາກັນໄປສໍາຫຼວດຫາຍອດແມ່ນໍ້າລ້ານຊ້າງ-ແມ່ນໍ້າຂອງ ພ້ອມທັງຮັບຮູ້ຢ່າງເລິກເຊິ່ງເຖິງ “ການຮ່ວມຊົມໃຊ້ແມ່ນໍ້າສາຍດຽວກັນ, ຮ່ວມຮັດແໜ້ນຊາຕາກໍາຕິດພັນກັນ” ໂດຍຜ່ານກິດຈະກໍາຕ່າງໆ ເຊັ່ນ: ການຈັດພິທີເປີດງານສັບປະດາຮູບພາບ-ວິດີໂອ, ການສັງສັນຕັ້ງແຄ້ມ, ການສົນທະນາກັນແຄມຍອດແມ່ນໍ້າລະຫວ່າງຊາວໜຸ່ມ ອາຍຸລະຫວ່າງ 20-30 ປີ, ງານຄອນເສີດກາງແຈ້ງຕອນຄໍ່າ, ການເດີນສໍາຫຼວດຮ່ວມກັນ ແລະ ອື່ນໆ.

ແມ່ນໍ້າລ້ານຊ້າງ-ແມ່ນໍ້າຂອງມີຍອດນໍ້າຕັ້ງຢູ່ກິ່ງແຂວງຢູ້ຊູ້ ມີຄວາມຍາວເຖິງຫຼາຍສິບພັນກິໂລແມັດ ໂດຍໄດ້ໄຫຼຜ່ານ 6 ປະເທດ ແລະ ຢູ່ຮ່ວມກັນຢ່າງແໜ້ນແຟ້ນ ເຊັ່ນ: ປະເທດຈີນ, ມຽນມ້າ, ລາວ, ໄທ, ກໍາປູເຈຍ ແລະ ຫວຽດນາມ. ໃນທັນວາ 2023 ທີ່ຜ່ານມາ, ງານສັບປະດາຮູບ-ວິດີໂອສາກົນແມ່ນໍ້າລ້ານຊ້າງ-ແມ່ນໍ້າຂອງໄດ້ລະບຸເຂົ້າໃນ ຖະແຫຼງການເນບີດໍ ຂອງ ກອງປະຊຸມຜູ້ນໍາຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ຄັ້ງທີ Ⅳ. ງານສັບປະດາຮູບພາບ-ວິດີໂອສາກົນແມ່ນໍ້າລ້ານຊ້າງ-ແມ່ນໍ້າຂອງທີ່ໄດ້ຈັດຂຶ້ນເປັນ 3 ຄັ້ງລຽນຕິດກັນນັ້ນ ກໍາລັງສ້າງພື້ນຖານອັນໜັກແໜ້ນໃນການໄວ້ເນື້ອເຊື່ອໃຈກັນລະຫວ່າງແຂວງຊິງໄຫ ສປ ຈີນ ກັບ ບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງ, ເຊັ່ນປະເທດມຽນມ້າ, ລາວ, ໄທ, ກໍາປູເຈຍ ແລະ ຫວຽດນາມ, ຮັດແໜ້ນການພົວພັນມິດຕະພາບ, ສົ່ງເສີມວັດທະນະທໍາປະຈໍາແມ່ນໍ້າລ້ານຊ້າງ-ແມ່ນໍ້າຂອງທີ່ "ປະຕິບັດຕໍ່ກັນຢ່າງສະເໝີພາບ, ຊ່ວຍເຫຼືອກັນຢ່າງຈິງໃຈ, ຮັກແພງກັນຖານພີ່ນ້ອງດຽວກັນ" ໃຫ້ຊຶມຊັບເຂົ້າໃນດວງໃຈຂອງປະຊາຊົນເຊິ່ງໄດ້ກາຍເປັນເວທີແລກປ່ຽນທາງດ້ານວັດທະນະທໍາ-ສັງຄົມທີ່ມີອິດທິພົນຫຼາຍພໍສົມຄວນໃນລ້ອງແມ່ນໍ້າລ້ານຊ້າງ-ແມ່ນໍ້າຂອງ.