ຫົວໜ້າກອງເລຂາຄະນະກໍາມະການແມ່ນໍ້າຂອງ: ຮ່ວມຊົມໃຊ້ສາຍນ້ຳ, ຮ່ວມອະນາຄົດ

 “ພວກຂ້າພະເຈົ້າເຫັນດີເຫັນພ້ອມຕໍ່ຮູບແບບການຮ່ວມມື ແມ່ນໍ້າລ້ານຊ້າງ-ແມ່ນໍ້າຂອງ. ຮ່ວມຊົມໃຊ້ສາຍນ້ຳ, ຮ່ວມອະນາຄົດ”, ທ່ານ Anoulak Kittikhoun ຫົວໜ້າກອງເລຂາຄະນະກຳມະການແມ່ນໍ້າຂອງ ໄດ້ກ່າວໃນໂອກາດໃຫ້ສໍາພາດຕໍ່ສໍານັກຂ່າວຈີນ ໃນ ບໍ່ດົນມານີ້.

ໃນວັນທີ 15 ກໍລະກົດ ທີ່ຜ່ານມານີ້, ກິດຈະກໍາການຮ່ວມກັນສໍາຫຼວດຍອດແມ່ນໍ້າລ້ານຊ້າງ-ແມ່ນໍ້າຂອງ 6 ປະເທດແມ່ນໍ້າລ້ານຊ້າງ-ແມ່ນໍ້າຂອງໄດ້ໄຂຂຶ້ນຢູ່ແຂວງຊິນໄຫ່. ໃນພິທີເປີດ, ທ່ານ Anoulak ໄດ້ເນັ້ນໜັກເຖິງຄວາມຈໍາເປັນຂອງການຮ່ວມມືລະຫວ່າງ 6 ປະເທດແມ່ນໍ້າລ້ານຊ້າງ-ແມ່ນໍ້າຂອງ ແລະ ຄວາມສໍາຄັນຂອງການສໍາຫຼວດຮ່ວມກັນ.ເພິ່ນກ່າວວ່າ, “ການສໍາຫຼວດຄັ້ງປະຫວັດສາດນີ້ ເປັນການຮ່ວມກັນສໍາຫຼວດແຫຼ່ງຍອດແມ່ນໍ້າຂອງ ທີ່ ຈັດຕັ້ງໂດຍສູນຮ່ວມມືດ້ານຊັບພະຍາກອນແມ່ນໍ້າລ້ານຊ້າງ-ແມ່ນໍ້າຂອງ ແລະ ກອງເລຂາຄະນະກໍາມະການແມ່ນໍ້າຂອງ ໂດຍມີ 6 ປະເທດເຂົ້າຮ່ວມ, ເຊິ່ງຈະເພີ່ມທະວີຄວາມເຂົ້າໃຈເລິກເຊິ່ງກວ່າເກົ່າຕໍ່ສະພາບການຕອນເທິງແມ່ນໍ້າລ້ານຊ້າງ-ແມ່ນໍ້າຂອງ. ຄະນະກໍາມະການແມ່ນໍ້າລ້ານຊ້າງ-ແມ່ນໍ້າຂອງ ຍິນດີຈະປະກອບສ່ວນເຂົ້າໃນເວທີດັ່ງກ່າວ ເພື່ອຮັບປະກັນໃຫ້ 6 ປະເທດສາມາດໄດ້ຮັບຜົນປະໂຫຍດຈາກການແບ່ງປັນຂໍ້ມູນ.”

ທ່ານ Anoulak ກ່າວວ່າ, “ການສໍາຫຼວດຮ່ວມກັນທີ່ກໍາລັງດໍາເນີນຢູ່ນັ້ນມີຈຸດປະສົງເພື່ອເກັບກໍາຂໍ້ມູນເບື້ອງຕົ້ນ ເພື່ອກໍານົດຍຸດທະສາດທີ່ມີປະສິດທິຜົນ ແລະ ຮັບມືກັບສະພາບອຸທົກກະສາດທີ່ປ່ຽນແປງຕະຫຼອດຂອງລຸ່ມແມ່ນໍ້າ, ພ້ອມທັງສະໜອງຜົນປະໂຫຍດຈາກແມ່ນໍ້າໃນລະດັບສູງສຸດໃຫ້ແກ່ທຸກປະເທດທີ່ກ່ຽວຂ້ອງ.”

ນອກຈາກນັ້ນ, ທ່ານ Anoulak ຍັງໄດ້ຕີລາຄາສູງຕໍ່ຄວາມພະຍາຍາມຂອງລັດຖະບານຈີນໃນການປົກປັກຮັກສາແຫຼ່ງຍອດແມ່ ນໍ້າລ້ານຊ້າງ ແລະ ຄວາມເອົາໃຈໃສ່ທີ່ມີຕໍ່ປັດໄຈດ້ານນິເວດ ແລະ ສິ່ງແວດລ້ອມໃນໂຄງການພັດທະນາ. ເພິ່ນກ່າວວ່າ ທິວທັດອັນສະຫງ່າງາມຢູ່ລຽບຕາມສອງຝັ່ງແຫຼ່ງຍອດແມ່ນໍ້າລ້ານຊ້າງນັ້ນ ເປັນການຢັ້ງຢືນທີ່ຊັດເຈນເຖິງວຽກງານການປົກປັກຮັກສາລຳນໍ້າຂອງປະເທດຈີນ. ທ່ານໄດ້ເປີດເຜີຍວ່າ, ຈະມີແຜນການເຊື້ອເຊີນ 6 ປະເທດດໍາເນີນການສໍາຫຼວດຮ່ວມກັນ ຄັ້ງທີ 2 ໃນເດືອນກັນຍາ ຫຼື ເດືອນຕຸລາເພື່ອຮັບຟັງຄວາມຄິດເຫັນອັນລໍ້າຄ່າໃຫ້ຫຼາຍຂຶ້ນກວ່າເກົ່າ.