ຈີນ ແລະ ມຽນມ້າ ຮ່ວມກັນລົງນາມໃນສັນຍາການຮ່ວມມືໂຄງການມຽນມ້າ ພາຍໃຕ້ກອງທຶນການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງປະຈໍາປີ 2024

ພິທີເຊັນສັນຍາການຮ່ວມມືໂຄງການມຽນມ້າ ພາຍໃຕ້ກອງທຶນ ການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງປະຈໍາປີ 2024 ລະຫວ່າງປະເທດ ຈີນ ແລະ ປະເທດ ມຽນມ້າ ໄດ້ຈັດຂຶ້ນຢູ່ທີ່ນະຄອນຫຼວງເນບີດໍ ປະເທດມຽນມ້າ ໃນວັນທີ 14 ທີ່ຜ່ານມານີ້, ໂດຍມີ ທ່ານ ເສີນໄຫ ເອກອັກຄະລັດຖະທູດ ສປ ຈີນ ປະຈໍາ ມຽນມ້າ ແລະ ທ່ານ ລະວິນໂອ ຮອງລັດຖະມົນຕິ ກະຊວງການຕ່າງປະເທດ ມຽນມາ ໄດ້ຮ່ວມກັນລົງນາມໃນສັນຍາ.

ທ່ານ ເສີນໄຫ ກ່າວວ່າ, ການເຊັນສັນຍາຄັ້ງນີ້ ເປັນມາດຕະການສໍາຄັນ ໃນການຈັດຕັ້ງປະຕິບັດ ຄວາມຮັບຮູ້ທີ່ເປັນເອກະພາບສໍາຄັນ ຂອງກອງປະຊຸມຜູ້ນໍາ ຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ຄັ້ງທີ 4, ທັງເປັນການສະແດງໃຫ້ເຫັນເຖິງສາຍພົວພັນມິດຕະພາບ ແລະ ການຮ່ວມມືລະຫວ່າງ ຈີນ ແລະ ມຽນມ້າ ຢ່າງມີຊີວິດຊີວາ ພາຍຫຼັງສອງປະເທດໄດ້ສ້າງຕັ້ງສາຍພົວພັນທາງການທູດ ເປັນເວລາ 74 ປີ. ປະເທດມຽນມ້າເປັນປະເທດສໍາຄັນທີ່ ເຂົ້າຮ່ວມ, ຊຸກຍູ້ ແລະ ໄດ້ຮັບຜົນປະໂຫຍດ ຈາກການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ. ບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງຄວນຮ່ວມກັນເສີມຂະຫຍາຍການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງໃຫ້ຂະຫຍາຍຕົວຍິ່ງໆຂຶ້ນ, ກໍ່ສ້າງປະຊາຄົມຮ່ວມຊະຕາກໍາຂອງບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງ ທີ່ອ່ວຍໜ້າສູ່ສັນຕິພາບ ແລະ ຄວາມວັດທະນາຖາວອນ ທີ່ແໜ້ນແຟ້ນກວ່າເກົ່າ. ຝ່າຍຈີນ ຍິນດີສືບຕໍ່ຮ່ວມກັບຝ່າຍ ມຽນມ້າ ປະຕິບັດໂຄງການແມ່ນໍ້າລ້ານຊ້າງ-ແມ່ນໍ້າຂອງໃຫ້ດີ ເພື່ອນໍາເອົາໝາກຜົນການຮ່ວມມືຫຼາຍກວ່າເກົ່າມາສູ່ປະຊາຊົນມຽນມ້າ.

ໃນໂອກາດດັ່ງກ່າວ, ທ່ານ ຕານສູຍ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດມຽນມ້າກ່າວວ່າ: ປະເທດຈີນ ກັບ ປະເທດມຽນມ້າເປັນປະເທດເພື່ອນບ້ານມິດຕະພາບທີ່ເປັນມູນເຊື້ອ, ຄວາມຮັກແພງມິດຕະພາບຖານພີ່ນ້ອງຂອງສອງຊາດຍິ່ງດົນຍິ່ງມີຄ່າ. ນັບແຕ່ສ້າງຕັ້ງສາຍພົວພັນທາງການທູດເປັນເວລາ 74 ປີມານີ້, ສາຍພົວພັນສອງຝ່າຍໄດ້ນັບມື້ນັບແໜ້ນແຟ້ນຂຶ້ນ. ຝ່າຍມຽນມ້າຍິນດີ ສືບຕໍ່ຮ່ວມກັບບັນດາປະເທດຄູ່ຮ່ວມຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ເສີມຂະຫຍາຍສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃນພາກພື້ນ.

12 ໂຄງການ ທີ່ໄດ້ຮ່ວມກັນລົງນາມໃນຄັ້ງນີ້ ຈະສະໜັບສະໜູນມຽນມ້າ ພັດທະນາຂົງເຂດກະສິກໍາ, ການຫຼຸດຜ່ອນຄວາມທຸກຍາກ, ການຄ້າ, ການປະດິດສ້າງ ແລະຂົງເຂດອື່ນໆ ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.