ກິດຈະກໍາການຖ່າຍຮູບ ແລະ ສ້າງສາລະຄະດີກ່ຽວກັບວັດທະນະທຳມະນຸດຂອງສັບປະດາຮູບຖ່າຍສາກົນ LM ປີ 2023 ເລີ່ມເປີດຕົວ

ວັນທີ 24 ກໍລະກົດ, ກິດຈະກໍາການຖ່າຍຮູບ ແລະ ສ້າງສາລະຄະດີກ່ຽວກັບວັດທະນະທຳມະນຸດ ຂອງ ສັບປະດາຮູບຖ່າຍສາກົນ LM ປີ 2023 ໄດ້ຈັດຂຶ້ນທີ່ເມືອງຢູ້ຊູ້ ກິ່ງແຂວງປົກຄອງຕົນເອງເຜົ່າຕິເບດຢູ້ຊູ້ ແຂວງຊິ່ງໄຫ, ເຊິ່ງກິດຈະກໍາຄັ້ງນີ້ຈະເກັບກຳຮູບຖ່າຍ ແລະ ວິດີໂອຈາກບັນດາປະເທດຢູ່ເຂດລ້ອງແມ່ນ້ຳ LM, ພ້ອມທັງໄດ້ເຊື້ອເຊີນສື່ມວນຊົນທີ່ສໍາຄັນ, ຜູ້ເຮັດໂຄສະນາຜ່ານທາງອິນເຕີເນັດທີ່ມີຊື່ສຽງ, ຜູ້ຕາງໜ້າຈາກວົງການວັດທະນະທຳ ມາຢ້ຽມຢາມແຫຼ່ງນ້ຳ ແລະ ສຳຜັດກັບຂະໜົບທຳນຽມແລະວັດທະນະທຳຂອງທ້ອງຖິ່ນດ້ວຍຕົນເອງ, ພ້ອມທັງຈັດຕັ້ງນັກຖ່າຍພາບທັງພາຍໃນ ແລະ ຕ່າງປະເທດມາຜະລິດຜົນງານຫຼາຍມິຕິຮ່ວມກັນຢູ່ທີ່ນີ້ ລວມທັງການຖ່າຍທຳຢູ່ເທິງໜ້າດິນ, ກາງອາກາດ, ໃນຕອນກາງເວັນ ແລະ ຕອນກາງຄືນ.

ຈຸດປະສົງຂອງກິດຈະກໍາຄັ້ງນີ້ ແມ່ນເພື່ອສະແດງໝາກຜົນຂອງປະເທດ LM ໃນການພັດທະນາເສດຖະກິດ, ປົກປັກຮັກສາລະບົບນິເວດ ແລະ ປັບປຸງຊີວິດການເປັນຢູ່ຂອງປະຊາຊົນ ກໍຄື ການສ້າງເວທີໃໝ່ອ່ຽມເພື່ອແລກປ່ຽນວັດທະນະທຳ ແລະ ຄວາມເຂົ້າອົກເຂົ້າໃຈກັນລະຫວ່າງປະຊາຊົນ ປະກອບສ່ວນເຂົ້າໃນການເລົ່າເລື່ອງຢູ່ເຂດລ້ອງແມ່ນ້ຳ “ປະເທດ LM ສະໜິດສະໜົມກັນເໝືອນເປັນສະມາຊິກໃນຄອບຄົວດຽວກັນ”.

ທ່ານ Laurence Chellali ນັກຖ່າຍຮູບປະເທດຝຣັ່ງໄດ້ກ່າວວ່າ “ພາບວິວທິວທັດຂອງຢູ້ຊູ້ສວຍງາມຫຼາຍ ແຕ່ສິ່ງທີ່ປະທັບໃຈຂ້າພະເຈົ້າຫຼາຍທີ່ສຸດ ແມ່ນຄົນຢູ່ທີ່ນີ້. ສິ່ງທີ່ມີຊີວິດ ແລະ ສັບພະສິ່ງໃນພື້ນທີ່ຕ່າງກັນໄດ້ເຊື່ອມໂຍງກັນດ້ວຍແມ່ນ້ຳລຳເຊ ແລະ ຄົນຢູ້ຊູ້ກໍໄດ້ເປັນຜູ້ຮັກສາແຫຼ່ງນ້ຳຢູ່ທີ່ນີ້ ເຊິ່ງໄດ້ຍຶດໝັ້ນເຮັດເລື່ອງເລັກໆນ້ອຍໆຈຳນວນໜຶ່ງເປັນຫຼາຍປີໃນຊີວິດການລ້ຽງສັດແບບເຄື່ອນທີ່ເຄື່ອນຍ້າຍຕະຫຼອດ, ຂ້າພະເຈົ້າຄິດວ່າ ເຂົາເຈົ້ານີ້ແຫຼະ ມີຄວາມລ້ຳເລີດເປັນຢ່າງຍິ່ງ. ຫວັງວ່າໂດຍຜ່ານມູມກ້ອງຂອງຂ້າພະເຈົ້າ ແລະ ຜ່ານວິທີການລາຍງານແບບຖ່າຍທຳເປັນສາລະຄະດີ, ຂ້າພະເຈົ້າຈະສາມາດເລົ່າເລື່ອງກ່ຽວກັບຜູ້ເຝົ້າແຫຼ່ງນ້ຳຢູ່ແຫ່ງນີ້ຕໍ່ປະຊາຊົນຂອງປະເທດຕົນ.”