ເພື່ອເປັນການສະເຫຼີມສະຫຼອງ “ສັບປະດາທີ 6 ຂອງແມ່ນໍ້າລ້ານຊ້າງ - ແມ່ນໍ້າຂອງ(LM )ແລະ ທັງເປັນການຕ້ອນຮັບການຮ່ວມມື LM ຄົບຮອບ “5 ປີ ທອງຄໍາ” ຢ່າງເປັນທາງການ, ທີ່ນະຄອນເສີງຕູ່ ສະຖາບັນຄົ້ນຄວ້າສື້ທົ່ງເສີງຕູ່ ໄດ້ຈັດປະຊຸມສໍາມະນາຂຶ້ນໃນວັນທີ 28 ມີນາ 2023, ໂດຍໄດ້ເຊື້ອເຊີນຊ່ຽວຊານນັກຄົ້ນຄວ້າຕາງໜ້າ ຈາກ ປະເທດລາວ, ກໍາປູເຈຍ, ໄທ, ມຽນມາ ຕະຫຼອດຮອດຄັງປັນຍາຂອງຈີນ ແລະ ອົງການຈັດຕັ້ງກ່ຽວຂ້ອງ 20 ກວ່າທ່ານ ເຂົ້າຮ່ວມ ເພື່ອພ້ອມກັນປຶກສາຫາລືຊອກຊ່ອງທາງເພີ່ມທະວີການຮ່ວມມື ແລະ ຮັບມືກັບສິ່ງທ້າທາຍຕ່າງໆ ເພື່ອຊຸກຍູ້ການພັດທະນາຂອງພາກພື້ນ.
ຊ່ຽວຊານທັງຝ່າຍຈີນແລະຕ່າງປະເທດ ທີ່ເຂົ້າຮ່ວມກອງປະຊຸມ ໄດ້ແລກປ່ຽນການວິເຄາະວິໄຈໃນຫຼາຍແງ່ມຸມຕໍ່ສະພາບການໃນປັດຈຸບັນ ແລະ ວິໄສທັດຂອງກົນໄກການຮ່ວມມື LM , ເຊິ່ງໃນນັ້ນກໍລວມໄປເຖິງດ້ານຕ່າງໆ ເຊັ່ນ ການຕື່ມເຕັມໃຫ້ສົມບູນຊຶ່ງກັນແລະກັນດ້ານການຜະລິດອຸດສາຫະກໍາໃນຂົງເຂດພະລັງງານ ລະຫວ່າງ ສປ ຈີນ ກັບ ບັນດາປະເທດອາຊີຕາເວັນອອກສຽງໃຕ້; ການປຶກສາຫາລືປະສານສົມທົບກັນພາຍໃນພາກພື້ນກ່ຽວກັບພະລັງງານ ນໍ້າ; ບັນຫາສິ່ງທ້າທາຍ ແລະ ທິດທາງວິທີແກ້ໄຂບັນຫາດ້ານການສຶກສາສາກົນ ລະຫວ່າງ ສປ ຈີນ ກັບ ບັນດາປະເທດຢູ່ລຽບຕາມລໍາແມ່ນໍ້າຂອງ; ການວິເຄາະເອກະສານແລກປ່ຽນຄໍາເຫັນຂອງການນໍາລະດັບສູງ ຂອງ ປະເທດ LM; ການກະກຽມຄວາມພ້ອມຂອງການຮັບມືແກ້ໄຂການແພ່ລະບາດຂອງພະຍາດ ແລະ ບັນຫາດ້ານສາທາລະນະສຸກອື່ນໆ; ປັດໄຈພາຍນອກທີ່ພາໃຫ້ການເຊື່ອມໂຍງຂອງພາກພື້ນເກີດມີຄວາມບໍ່ໝັ້ນທ່ຽງ; ບັນຫາການຄ້າລະຫວ່າງປະເທດ ແລະ ອາຊະຍາກໍາຂ້າມຊາດ; ຜົນສະທ້ອນຈາກຄວາມຄືບໜ້າຂອງນະໂຍບາຍພາຍໃນ ບັນດາປະເທດໃນພາກພື້ນທີ່ມີຕໍ່ການຮ່ວມມື LM.
ເພື່ອຊຸກຍູ້ກົນໄກການຮ່ວມມື LM ຂະຫຍາຍຕົວອີກກ້າວໜຶ່ງ, ບັນດາຊ່ຽວຊານກໍໄດ້ເຫັນດີເປັນເອກະພາບກັນວ່າ, ກ່ອນອື່ນໝົດ, ບັນດາປະເທດຕ້ອງໄດ້ເພີ່ມທະວີການຮ່ວມມືດ້ານການກໍ່ສ້າງພື້ນຖານໂຄງລ່າງ, ດ້ານເສດຖະກິດການຄ້າ ແລະ ຂົງເຂດອື່ນໆ, ຊຸກຍູ້ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ເຊື່ອມຕໍ່ກັບກົນໄກການຮ່ວມມື LM ເພື່ອສ້າງຄວາມຮັ່ງມີຜາສຸກໃຫ້ແກ່ປະຊາຊົນໃນພາກພື້ນ. ອີກດ້ານໜຶ່ງ, ຕ້ອງໄດ້ສ້າງກົນໄກການປົກປັກຮັກສາລະບົບນິເວດທີ່ດີໃຫ້ເປັນລະບົບຄົບຊຸດ, ຮັບປະກັນການພັດທະນາແບບຍືນຍົງຂອງແມ່ນໍ້າລໍາເຊ, ປົກປັກຮັກສາສິ່ງແວດລ້ອມນິເວດ, ເອົາໃຈໃສ່ກໍ່ສ້າງເສດຖະກິດສີຂຽວຂອງພາກພື້ນ. ພ້ອມດຽວກັນນັ້ນ, ຊ່ຽວຊານວິຊາການຍັງຮຽກຮ້ອງໃຫ້ເພີ່ມທະວີການແລກປ່ຽນດ້ານວັດທະນະທໍາ, ສົ່ງເສີມຄວາມເຂົ້າອົກເຂົ້າໃຈເຊິ່ງກັນແລະກັນລະຫວ່າງປະຊາຊົນ, ເພື່ອການຮ່ວມມືທາງເສດຖະກິດດ້ານດຽວເທົ່ານັ້ນ, ຕ້ອງສ້າງໃຫ້ເປັນຮູບແບບການແລກປ່ຽນຮ່ວມມືທີ່ມີຫຼາຍລະດັບ ແລະ ຮອບດ້ານ ເພື່ອພ້ອມກັນຄົ້ນພົບ ແລະສ້າງກາລະໂອກາດຂອງການຮ່ວມມືທ່າມກາງດໍາເນີນການແລກປ່ຽນ ຊຶ່ງກັນແລະກັນ.