ບໍລິສັດສາຍສົ່ງໄຟຟ້າພາກໃຕ້ຈີນ ຮ່ວມມືກັບປະເທດທີ່ຢູ່ລຽບຕາມ ແມ່ນໍ້າລ້ານຊ້າງ-ແມ່ນໍ້າຂອງ ຊຸກຍູ້ການຄ້າໄຟຟ້າແບບສີຂຽວ ແລະ ກາກບອນຕໍ່າ

ເຂດບໍລິການກິດຈະການ ຂອງ ບໍລິສັດສາຍສົ່ງໄຟຟ້າພາກໃຕ້ຈີນຕິດຈອດກັບປະເທດລາວ, ຫວຽດນາມ ແລະ ມຽນມາ, ມາຮອດເດືອນສິງຫາປີນີ້, ໃນ 18 ປີຜ່ານມາ ບໍລິສັດດັ່ງກ່າວໄດ້ເຊື່ອມຕໍ່ລະບົບສາຍສົ່ງ ກໍາລັງແຮງ 110 kW ແລະ ກໍາລັງແຮງສູງກວ່າ 110 kW ກັບປະເທດອ້ອມຂ້າງດ້ວຍຫຼາຍສາຍ, ເຊິ່ງບໍລິມາດການຄ້າໄຟຟ້າສະສົມບັນລຸເຖິງ 65,5 ຕື້ກິໂລວັດໂມງ kW·h ຂຶ້ນໄປ, ໃນນັ້ນ, ພະລັງງານສະອາດ ກວມເອົາຫຼາຍກວ່າ 90% 

   ຢູ່ປະເທດລາວ, ໂຄງການຮັບເໝົາກໍ່ສ້າງລະບົບສາຍສົ່ງໄຟຟ້າ ແລະ ອາຍແກັສຢູ່ເຂດຊົນນະບົດ ຂອງແຂວງໄຊຍະບູລີ ທີ່ຮັບເໝົາໂດຍບໍລິສັດການກໍ່ສ້າງລະບົບສາຍສົ່ງໄຟຟ້າ ແລະ ສະຖານີໄຟຟ້າປັບຂະໜາດກວາງຊີ ວິສາຫະກິດ ສາຍສົ່ງໄຟຟ້າພາກໃຕ້ຈີນ ໄດ້ເລີ່ມການຜະລິດໃນປີ 2012, ເຊິ່ງໄດ້ອຳນວຍຄວາມສະດວກ ແລະ ສ້າງຜົນປະໂຫຍດໃຫ້ແກ່ປະຊາຊົນ 51.000 ຄົນ, 8.000 ກວ່າຄອບຄົວ ໃນ 69 ບ້ານທົ່ວແຂວງໄຊຍະບູລີ ຂອງ ສປປ ລາວ.

    ຢູ່ປະເທດຫວຽດນາມ, ໂຄງການກໍ່ສ້າງໂຮງໄຟຟ້າຖ່ານຫີນຢົງຊີນ ໃນຮູບແບບ BOT ໄລຍະທີ 1  ໄດ້ຍຶດຖືເອົາເປົ້າໝາຍການສ້າງໂຮງໄຟຟ້າຕົວແບບທີ່ “ກ້າວໜ້າ, ໜ້າເຊື່ອຖື, ສີຂຽວ”, ນໍາໃຊ້ອຸປະກອນ ແລະ ເຕັກນິກທີ່ທັນສະໄໝພາຍໃນປະເທດ ເພື່ອຫຼຸດຜ່ອນຜົນກະທົບຕໍ່ສິ່ງແວດລ້ອມໃຫ້ຢູ່ໃນລະດັບຕໍ່າທີ່ສຸດ.

    ອີງຕາມການຄາດຄະເນພາຍໃນວົງການ ເຫັນວ່າໃນປີ 2021-2025, ຈໍານວນຄວາມຕ້ອງການໄຟຟ້າ ແລະ ຈໍານວນໄຟຟ້າທີ່ນໍາໃຊ້ສະເລ່ຍຕໍ່ຫົວຄົນຂອງ 5 ປະເທດທີ່ຢູ່ລຽບຕາມ ແມ່ນໍ້າລ້ານຊ້າງ-ແມ່ນໍ້າຂອງ ຕ່າງຈະເພີ່ມຂຶ້ນ 6,5% ແລະ 5,8% ຕໍ່ປີ, ການກໍ່ສ້າງພື້ນຖານໂຄງລ່າງດ້ານລະບົບຕາໜ່າງໄຟຟ້າ ແລະ ແຫຼ່ງພະລັງໄຟຟ້າທີ່ມີລັກສະນະຄ້ຳປະກັນຈະຮັບການພັດທະນາຢ່າງວ່ອງໄວ, ການຮ່ວມມືດ້ານພະລັງໄຟຟ້າພາຍໃນເຂດແມ່ນໍ້າລ້ານຊ້າງ-ແມ່ນໍ້າຂອງຈະກ້າວເຂົ້າສູ່ “ໄລຍະທອງຄໍາ”. ໃນປັດຈຸບັນ, ບໍລິສັດສາຍສົ່ງໄຟຟ້າພາກໃຕ້ຈີນ ກໍາລັງຮ່ວມມືກັບບັນດາປະເທດ ທີ່ຢູ່ລຽບຕາມແມ່ນໍ້າລ້ານຊ້າງ-ແມ່ນໍ້າຂອງຊຸກຍູ້ການເຊື່ອມຕໍ່ກັນດ້ານລະບົບຕາໜ່າງໄຟຟ້າທີ່ມີແຮງດັນສູງກວ່າເກົ່າ,ເປັນລະບົບການຄ້າໄຟຟ້າແບບສີຂຽວ ແລະ ກາກບອນຕໍ່າທີ່ມີຂະໜາດໃຫຍ່ກວ່າເກົ່າ, ພ້ອມທັງພ້ອມກັນສະແຫວງຫາການຮ່ວມມືທີ່ມີລະດັບສູງກວ່າ, ເລິກເຊິ່ງກວ່າ ແລະ ກວ້າງຂວາງກວ່າເກົ່າ.