ເສັ້ນທາງລົດໄຟຈີນ-ລາວໄດ້ເປີດນຳໃຊ້ຄົບຮອບ 100 ວັນ: ມີປະລິມານການຂົນສົ່ງທັັງໝົດຫຼາຍກວ່າ 1,2 ລ້ານໂຕນ

ຕາມຂ່າວCRI: ວັນທີ 12 ມີນານີ້, ແມ່ນວັນທີ່ເສັ້ນທາງລົດໄຟຈີນ-ລາວໄດ້ເປີດນຳໃຊ້ຄົບຮອບ 100 ວັນ, ມີປະລິມານການຂົນສົ່ງສິນຄ້າທັງໝົດຫຼາຍກວ່າ 1,2 ລ້ານໂຕນ, ປະລິມານການຂົນສົ່ງສິນຄ້າຂ້າມຊາຍແດນຫຼາຍກວ່າ 2 ແສນ 8 ໝື່ນໂຕນ, ທົ່ວປະເທດຈີນມີ 13 ແຂວງແລະກຳແພງນະຄອນໄດ້ເປີດບໍລິການຂະບວນລົດໄຟສິນຄ້າຂ້າມຊາຍແດນ 360 ກວ່າຂະບວນ, ໄດ້ສົ່ງອອກສິນຄ້າໄປສູ່ລາວ, ມຽນມາ, ກຳປູເຈຍ, ໄທ, ຫວຽດນາມ, ມາເລເຊຍ, ສິງກະໂປ, ບັງກະລາເດັດແລະປະເທດອື່ນໆ. ພ້ອມດຽວກັນນັ້ນ, ເສັ້ນທາງລົດໄຟຈີນ-ລາວກໍໄດ້ຂົນສົ່ງຜູ້ໂດຍສານທີ່ມີຈຳນວນຫຼາຍກວ່າ 1,8 ລ້ານ, ສະພາບການແລ່ນລົດຢ່າງປອດໄພສະດວກວ່ອງໄວ, ສີຂຽວ, ມີປະສິດທິພາບສູງເຊິ່ງເຮັດໃຫ້ເສັ້ນທາງລົດໄຟຈີນ-ລາວໄດ້ກາຍເປັນທາງເລືອກທຳອິດໃນການເດີນທາງຂອງປະຊາຊົນ.

ທ່ານຫຼີໂຫງຊີງ, ຮອງຫົວໜ້າສະຖານີລົດໄຟຄຸນໝິງຕາເວັນອອກຂອງກຸ່ມບໍລິສັດ ທາງລົດໄຟຄຸນໝິງຈີນກ່າວວ່າ, ຫຼັງຈາກເສັ້ນທາງລົດໄຟຈີນ-ລາວໄດ້ເປີດນຳໃຊ້, ຕົ້ນທຶນການຂົນສົ່ງສິນຄ້າຈາກນະຄອນຫຼວງວຽງຈັນຂອງລາວຫານະຄອນຄຸນໝິງຂອງຈີນຈະຫຼຸດລົງ 40% ຫາ 50%, ພ້ອມກັນນັ້ນຕົ້ນທຶນການຂົນສົ່ງສິນຄ້າພາຍໃນປະເທດລາວຈະຫຼຸດລົງ 20% ຫາ 40%. ໄປຄຽງຄູ່ກັບ “ສັນຍາວ່າດ້ວຍສາຍພົວພັນຄູ່ຮ່ວມເສດຖະກິດຮອບດ້ານໃນພາກພື້ນ” ຫຼື RCEP ເກີດມີຜົນບັງຄັບໃຊ້ຢ່າງເປັນທາງການ, ປະລິມານການຂົນສົ່ງສິນຄ້າແລະປະລິມານການຂົນສົ່ງຜູ້ໂດຍສານຂອງເສັ້ນທາງລົດໄຟຈີນ-ລາວຍັງຈະໄດ້ເພີ່ມຂຶ້ນຢ່າງໝັ້ນທ່ຽງ. ເວລາການຂົນສົ່ງໄດ້ຫຼຸດລົງຢ່າງຫຼວງຫຼາຍແລະຮູບແບບການອອກເດີນທາງຢ່າສະດວກວ່ອງໄວ, ໄດ້ອຳນວຍຄວາມສະດວກຫຼາຍຢ່າງຫຼວງຫຼາຍໃຫ້ແກ່ການເດີນທາງຂອງປະຊາຊົນທີ່ຢູ່ລຽບຕາມເສັ້ນທາງລົດໄຟ.