ທ່ານສີຈິ້ນຜິງໄດ້ສົ່ງສານອວຍພອນໄປຍັງທ່ານຮຸນເຊັນ ເນື່ອງໃນໂອກາດວັນສ້າງຕັ້ງພັກປະຊາຊົນກຳປູເຈຍຄົບຮອບ 70 ປີ
CRI, July 2, 2021
Size：
ວັນທີ 28 ມິຖຸນານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ສົ່ງສານອວຍພອນໄປຍັງທ່ານຮຸນເຊັນ ປະທານພັກປະຊາຊົນກຳປູເຈຍ ເນື່ອງໃນໂອກາດວັນສ້າງຕັ້ງພັກປະຊາຊົນກຳປູເຈຍຄົບຮອບ 70 ປີ.
ໃນສານຂອງທ່ານສີຈິ້ນຜິງລະບຸວ່າ: ເປັນເວລາດົນນານມາແລ້ວ, ພັກປະຊາຊົນກຳປູເຈຍໄດ້ສາມັກຄີ ແລະ ນຳພາປະຊາຊົນກຳປູເຈຍ ສຸມໃສ່ພາລະກິດສ້າງສາແລະພັດທະນາປະເທດຕົນ, ໄດ້ປະກອບສ່ວນຢ່າງຕັ້ງໜ້າ ເພື່ອຊຸກຍູ້ການສ້າງສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ. ຈີນຈະເຮັດຄືກັນກັບເມື່ອກ່ອນໃນການສະໜັບສະໜູນກຳປູເຈຍເດີນຕາມເສັ້ນທາງການພັດທະນາທີ່ສອດຄ່ອງກັບສະພາບຄວາມເປັນຈິງຂອງປະເທດກຳປູເຈຍ, ເຊື່ອວ່າພາຍໃຕ້ການນຳພາອັນຖືກຕ້ອງຂອງທ່ານປະທານ, ພັກປະຊາຊົນກຳປູເຈຍຈະສືບຕໍ່ປະກອບສ່ວນຫຼາຍກວ່າເກົ່າ ເພື່ອສ້າງຄວາມຈະເລີນຮຸ່ງເຮືອງຂອງປະເທດກຳປູເຈຍ ແລະ ຄວາມຜາສຸກໃຫ້ກັບປະຊາຊົນກຳປູເຈຍ ກໍຄືການປົກປັກຮັກສາສັນຕິພາບແລະການພັດທະນາຂອງພາກພື້ນ.
ທ່ານສີຈິ້ນຜິງກ່າວເນັ້ນວ່າ: ຈີນແລະກຳປູເຈຍແມ່ນປະເທດເພື່ອນມິດທີ່ຈິງໃຈຕໍ່ກັນ ແລະ ເປັນຄູ່ຮ່ວມຊາຕາກຳ, ພັກກອມມູນິດຈີນໄດ້ເອົາໃຈໃສ່ຢ່າງສູງຕໍ່ມິດຕະພາບ ແລະ ການຮ່ວມມືກັບພັກປະຊາຊົນກຳປູເຈຍ, ຍິນດີເພີ່ມທະວີການຊີ້ນຳນຳພາສາຍພົວພັນລະຫວ່າງສອງພັກແລະສອງລັດທາງດ້ານການເມືອງ, ລົງເລິກການແລກປ່ຽນແລະຮ່ວມມືລະຫວ່າງພັກ ແລະ ຂົງເຂດອື່ນໆ, ຊຸກຍູ້ການສ້າງຄູ່ຮ່ວມຊາຕາກຳຈີນ-ກຳປູເຈຍ ເພື່ອສ້າງຄວາມຜາສຸກໃຫ້ແກ່ສອງປະເທດ ກໍຄື ປະຊາຊົນສອງຊາດ.