ວັນທີ 20 ມິຖຸນານີ້, ວັກຊິນໂຄວິດ-19 ຂອງກຸ່ມບໍລິສັດ SINOPHARM ທີ່ຈີນໃຫ້ການຊ່ວຍເຫຼືອຫວຽດນາມໄດ້ຖືກຂົນສົ່ງໄປຮອດປະເທດຫວຽດນາມແລ້ວ. ທ່ານຫງວຽນແທັງລອງ ລັດຖະມົນຕີກະຊວງສາທາລະນະສຸກຫວຽດນາມໄດ້ຕາງໜ້າລັດຖະບານຫວຽດນາມ ກັບ ທ່ານຊົງໂປ່ ເອກອັກຄະລັດຖະທູດຈີນປະຈຳຫວຽດນາມ ພ້ອມຄະນະ ໄດ້ອອກໄປຕ້ອນຮັບວັກຊິນຢູ່ສະໜາມບິນ ແລະ ຈັດພິທີມອບຮັບວັກຊິນດັ່ງກ່າວ.
ທ່ານຫງວຽນແທັງລອງໄດ້ຕີລາຄາສູງຕໍ່ຜົນສຳເລັດຂອງຈີນໃນການຕ້ານກັບພະຍາດໂຄວິດ-19 ແລະໄດ້ສະແດງຄວາມຂອບໃຈລັດຖະບານ ແລະ ປະຊາຊົນຈີນທີ່ໄດ້ໃຫ້ການຊ່ວຍເຫຼືອດ້ານວັກຊິນເພື່ອຕ້ານກັບພະຍາດໂຄວິດ-19 ຢູ່ຫວຽດນາມ, ຫວັງວ່າສອງປະເທດຫວຽດນາມ-ຈີນຈະສາມາດສືບຕໍ່ດຳເນີນການຮ່ວມມືເພື່ອພ້ອມກັນຕ້ານພະຍາດໂຄວິດ-19 ແລະ ຄົ້ນຄວ້າພັດທະນາວັກຊິນໃນອະນາຄົດ.
ກະຊວງສາທາລະນະສຸກຫວຽດນາມແຈ້ງໃຫ້ຮູ້ວ່າ, ວັກຊິນເທື່ອນີ້ຈະສັກໃຫ້ປະຊາຊົນ 3 ກຸ່ມກ່ອນຄື: ຊາວຈີນທີ່ເຮັດວຽກຢູ່ຫວຽດນາມ, ຊາວຫວຽດນາມທີ່ຢາກໄປຮຽນ ແລະ ເຮັດວຽກຢູ່ຈີນ ພ້ອມທັງປະຊາຊົນທີ່ອາໄສຢູ່ເຂດຊາຍແດນ. ຕາມຂໍ້ມູນໃຫ້ຮູ້ວ່າ: ວັກຊິນໂຄວິດ-19 ຂອງກຸ່ມບໍລິສັດ SINOPHARM ຂອງຈີນແມ່ນວັກຊິນໂຄວິດ-19 ຊະນິດທີສອງທີ່ໄດ້ຂົນສົ່ງໄປຮອດປະເທດຫວຽດນາມ.