ໃນວັນທີ 26 ຫາ 29 ເມສາທີ່ຜ່ານມາ, ກິດຈະກຳ “ດື່ມນໍ້າແມ່ນໍ້າສາຍດຽວກັນ, ປະເທດ LM ສະໜິດສະໜົມກັນເໝືອນດັ່ງຄົນໃນຄອບຄົວດຽວກັນ” ແລະ “ສັບປະດາ LM”ຂົງເຂດຊັບພະຍາກອນນ້ຳ ປະຈຳປີ 2021 ໄດ້ຈັດຂຶ້ນຢູ່ແຂວງຢູນນານ, ໂດຍມີຜູ້ຕາງໜ້າຈາກກະຊວງຊັບພະຍາກອນນ້ຳ, ກະຊວງການຕ່າງປະເທດ ແຫ່ງ ສປ ຈີນ, ບັນດາທູຕານຸທູດຈາກປະເທດກຳປູເຈຍ, ລາວ, ມຽນມາ, ໄທ ແລະ ຫວຽດນາມ ປະຈຳ ສປ ຈີນເຂົ້າຮ່ວມກິດຈະກຳດັ່ງກ່າວ, ເຊິ່ງກິດຈະກໍາໃນຄັ້ງນີ້ໄດ້ມີການແລກປ່ຽນຄຳຄິດຄຳເຫັນນໍາກັນຢ່າງເລິກເຊິ່ງ ກ່ຽວກັບການຊຸກຍູ້ຮ່ວມມືທີ່ທີ່ເປັນຮູບປະທຳໃນດ້ານວຽກງານຊັບພະຍາກອນນ້ຳ LM ໃຫ້ເຂົ້າສູ່ລວງເລິກອີກກ້າວໜຶ່ງ.
ໃນເວລາຈັດກິດຈະກຳດັ່ງກ່າວ, ຄະນະຜູ້ແທນໄດ້ໄປທັດສະນະສຶກສາ ແລະ ຢ້ຽມຊົມ ເຂື່ອນໄຟຟ້ານ້ຳຕົກໂນ້ຈ່າຕູ້(Nuozhadu), ສະຖານີການຂະຫຍາຍແນວພັນປາໂນ້ຈ່າຕູ້, ສະຖານີຊ່ວຍຊີວິດສັດລ້ຽງພະເນຈອນ, ບ້ານຈັດສັນຍົກຍ້າຍມ້ານມີ່(Manmi) ແລະ ເຂື່ອນໄຟຟ້ານ້ຳຕົກຊຽງຮຸ່ງ. ນອກຈາກນີ້ແລ້ວ, ຍັງໄດ້ເຂົ້າຮ່ວມເວທີສົນທະນາກ່ຽວກັບການຮ່ວມມືທາງດ້ານຊັບພະຍາກອນນ້ຳ LM.
ທ່ານ ຈົ່ງຢົງ (Zhong Yong) , ຫົວໜ້າຄະນະປະສານງານຮ່ວມ ການຮ່ວມມືທາງດ້ານຊັບພະຍາກອນນ້ຳ LM ຂອງ ຝ່າຍຈີນ, ຫົວໜ້າພະແນກ ກົມຮ່ວມມືສາກົນ ແລະ ເຕັກນິກວິທະຍາສາດຂອງກະຊວງຊັບພະຍາກອນນ້ຳ ສປ ຈີນ ໄດ້ກ່າວວ່າ: ປີນີ້ແມ່ນປີຄົບຮອບ 5 ປີຂອງການເລີ່ມດໍາເນີນກົນໄກການຮ່ວມມື LM, 6 ປະເທດ LM ໄດ້ບັນລຸຄວາມເຫັນເປັນເອກະພາບກັນວ່າ “ວຽກງານກ່ຽວກັບລ້ອງແມ່ນ້ຳ LM, ຄວນແກ້ໄຂໂດຍຜ່ານການປຶກສາຫາລືລະຫວ່າງ 6 ປະເທດລ້ອງແມ່ນ້ຳ LM”. ກະຊວງຊັບພະຍາກອນນ້ຳ ແຫ່ງ ສປ ຈີນ ຈະຮ່ວມກັບບັນດາປະເທດຢູ່ລຽບຕາມແມ່ນ້ຳຂອງສືບຕໍ່ຊຸກຍູ້ສົ່ງເສີມ ແຜນປະຕິບັດງານວ່າດ້ວຍການຮ່ວມມືດ້ານຊັບພະຍາກອນນ້ຳ LM (2018-2022), ຈັດກິດຈະກໍາສຳຄັນຕ່າງໆ, ເຊັ່ນ: ກອງປະຊຸມຂັ້ນລັດຖະມົນຕີ ກ່ຽວກັບການຮ່ວມມືດ້ານຊັບພະຍາກອນນ້ຳ LM ແລະ ກອງປະຊຸມເວທີປຶກສາຫາລືກ່ຽວກັບການຮ່ວມມືດ້ານຊັບພະຍາກອນນ້ຳ LM ເປັນຕົ້ນ, ຊຸກຍູ້ການສ້າງເວທີແບ່ງປັນຂໍ້ມູນຂ່າວສານຮ່ວມກັນກ່ຽວກັບການຮ່ວມມືດ້ານຊັບພະຍາກອນນ້ຳ LM, ຈັດຕັ້ງປະຕິບັດໂຄງການຄວາມປອດໄພຂອງເຂື່ອນ, ໂຄງການຄວາມປອດໄພຂອງນ້ຳດື່ມ ແລະ ໂຄງການອື່ນໆໃຫ້ດີ ເພື່ອປະກອບສ່ວນອັນໃໝ່ເຂົ້າໃນການຍົກສູງຄວາມສາມາດການຄຸ້ມຄອງນໍ້າຂອງບັນດາປະເທດ LM ແລະ ຮ່ວມກັນສ້າງປະຊາຄົມຮ່ວມຊາຕາກຳຂອງບັນດາປະເທດ LM.
ບັນດາທູຕານຸທູດຂອງປະເທດທີ່ຢູ່ລຽບຕາມແມ່ນ້ຳຂອງ ປະຈຳ ສປ ຈີນ ມີຄຳເຫັນວ່າ: ໂດຍຜ່ານການທັດສະນະສຶກສາຕາມລໍາແມ່ນ້ຳຂອງ ແລະ ການແລກປ່ຽນສົນທະນາກັນໃນຄັ້ງນີ້, ຕົນເອງໄດ້ຮັບຮູ້ເຖິງຈຸດພິເສດຂອງອຸທົກກະສາດຂອງແມ່ນ້ຳລ້ານຊ້າງ ແລະ ບົດບາດການປັບປະລິມານນ້ຳໄຫຼຂອງອ່າງເກັບນ້ຳເປັນຊັ້ນໆຂອງລໍາແມ່ນ້ຳລ້ານຊ້າງ, ພ້ອມທັງຮັບຮູ້ໄດ້ວ່າ ຝ່າຍຈີນມີຄວາມເອົາໃຈໃສ່ລະດັບສູງຕໍ່ການອະນຸຮັກສິ່ງແວດລ້ອມ ແລະ ລະບົບນິເວດ ໄປຄວບຄູ່ກັບການພັດທະນາພະລັງໄຟຟ້ານ້ຳຕົກ, ໂດຍສະເພາະແມ່ນຝ່າຍຈີນໄດ້ມີຄວາມພະຍາຍາມໃນການຊ່ວຍເຫຼືອບັນດາປະເທດຢູ່ຕອນລຸ່ມຂອງແມ່ນ້ຳ ໃນການຮັບມືກັບສະພາບແຫ້ງແລ້ງ ຢ່າງມີປະສິດທິຜົນ, ໂດຍຜ່ານການປັບປະລິມານນ້ຳໄຫຼອອກຈາກອ່າງນ້ຳຕາມຫຼັກວິທະຍາສາດ. ບັນດາທູຕານຸທູດຍັງມີຄຳເຫັນວ່າ ການຮ່ວມມືດ້ານຊັບພະຍາກອນນ້ຳ ແມ່ນຂົງ ເຂດບູລິມະສິດ ແລະແມ່ນເນື້ອໃນສຳຄັນຂອງການຮ່ວມມື LM ແລະ ຍິນດີເພີ່ມທະວີການແລກປ່ຽນປະສານງານກັບກະຊວງຊັບພະຍາກອນນ້ຳ ແລະ ກະຊວງການຕ່າງປະເທດ ແຫ່ງ ສປ ຈີນເພື່ອຮ່ວມກັນຊຸກຍູ້ການຮ່ວມມືດ້ານຊັບພະຍາກອນນ້ຳ LM ຕື່ມອີກບາດກ້າວໜຶ່ງ.