ខេត្តយូណានទទួលបាននូវលទ្ធផលផ្លែផ្កាក្នុងការពង្រឹងកិច្ចសហប្រតិបត្តិការបរិស្ថាន ឡានឆាង-មេគង្គ

នៅក្នុងសន្និសីទសារព័ត៌មានស្តីពី "ការពិនិត្យឡើងវិញ និងការរំពឹងទុកអំពីកិច្ចសហប្រតិបត្តិការបរិស្ថានអេកូឡូស៊ីអន្តរជាតិរយៈពេលមួយទសវត្សរ៍របស់យូណាន" ដែលរៀបចំនាពេលថ្មីៗនេះ មន្ទីរបរិស្ថាន និងអេកូឡូស៊ីខេត្តយូណានបានប្រកាសថា ដោយមានការណែនាំពីការរួមគ្នាស្ថាបនាដោយមានគុណភាពខ្ពស់នូវ "ខ្សែក្រវាត់ និងផ្លូវ" និងការអភិវឌ្ឍមជ្ឈមណ្ឌលជំរុញការអភិវឌ្ឍតំបន់អាស៊ីខាងត្បូង និងអាគ្នេយ៍ ស្ថាប័នបរិស្ថាន និងអេកូឡូស៊ីរបស់ខេត្តយូណានបានបន្តពង្រឹងកិច្ចសហប្រតិបត្តិការបរិស្ថានក្នុងតំបន់ទន្លេឡានឆាង-មេគង្គ ដោយផ្តោតលើការកសាងយន្តការ ការអនុវត្តគម្រោងជីវភាពរស់នៅប្រជាជន ការបង្ហាញគំរូបច្ចេកវិទ្យា ការសន្ទនាអន្តរជាតិ ការអនុវត្តកិច្ចព្រមព្រៀង និងកិច្ចសហការក្នុងតំបន់ជាដើម រៀបចំបង្កើតបណ្តាញពេញលេញសម្រាប់កិច្ចសហប្រតិបត្តិការបៃតងក្នុងតំបន់ និងបានបង្ហាញពីស្មារតីទំនួលខុសត្រូវ និងក្តីប្រាជ្ញារបស់ខេត្តយូណានក្នុងការគ្រប់គ្រងបរិស្ថានក្នុងតំបន់។

ដោយពឹងផ្អែកលើយន្តការសហប្រតិបត្តិការពហុភាគី និងទ្វេភាគី រួមទាំងយន្តការសហប្រតិបត្តិការបរិស្ថានឡានឆាង-មេគង្គ ខេត្តយូណានបានចុះហត្ថលេខាលើលិខិតមួយចំនួនធំស្តីពីកិច្ចសហប្រតិបត្តិការជាមួយស្ថាប័នបរិស្ថាននៃប្រទេសជិតខាងដូចជាប្រទេសឡាវ វៀតណាម មីយ៉ាន់ម៉ា និងកម្ពុជា។ល។ លិខិតទាំងនេះបញ្ជាក់យ៉ាងច្បាស់អំពីទិសដៅនៃការធ្វើកិច្ចសហប្រតិបត្តិការសំខាន់ៗដូចជា ការអភិវឌ្ឍបៃតងនិងកាបូនទាប ការទប់ទល់នឹងបម្រែបម្រួលអាកាសធាតុ និងការអភិរក្សជីវៈចម្រុះជាដើម ដោយបង្កើតជាក្របខ័ណ្ឌសហការ "ការសម្របសម្រួលថ្នាក់ខេត្ត + ការតភ្ជាប់ទីក្រុងនិងមណ្ឌលតាមព្រំដែន"។ ខេត្តយូណានក៏បានព្យាយាមបណ្តុះម៉ាកយីហោនៃការផ្តល់ជំនួយដល់បរទេស "ទឹកស្អាតអេកូឡូស៊ី" ដោយបានសាងសង់ប្រព័ន្ធទឹកស្អាតចំនួន ៤ នៅក្នុងសាលារៀននៃប្រទេសឡាវ និងកម្ពុជាចាប់តាំងពីឆ្នាំ ២០២១ មក ដែលផ្តល់ផលប្រយោជន៍ដោយផ្ទាល់ដល់គ្រូបង្រៀន និងសិស្សនិស្សិតជិត ៩០០០ នាក់។ ជាពិសេស ការផ្តល់ជំនួយខាងបច្ចេកទេសបានលើកកម្ពស់ "ការតភ្ជាប់ទន់"។ ក្នុងរយៈពេលមួយទសវត្សរ៍កន្លងមកនេះ ខេត្តយូណានបានធ្វើកិច្ចសហប្រតិបត្តិការជាមួយប្រទេស និងតំបន់ជិតខាងលើគម្រោងនៃការផ្តល់ជំនួយខាងបច្ចេកទេស និងការកសាងសមត្ថភាពជាច្រើន។ តាមរយៈការអនុវត្តគម្រោងបង្ហាញគំរូអភិបាលកិច្ចបរិស្ថានតាមជនបទ និងការកសាងសមត្ថភាពសម្រាប់ការគ្រប់គ្រងធាតុគីមី និងគុណភាពទឹកប្រកបដោយនិរន្តរភាព ខេត្តយូណានបានផ្តល់ដល់ប្រទេសជិតខាងនូវដំណោះស្រាយអភិបាលកិច្ចបរិស្ថានដែលអាចរៀនសូត្រ និងអាចផ្សព្វផ្សាយបាន។