ប្រទេសទន្លេមេគង្គយកបទពិសោធន៍ពីទំនប់វារីអគ្គិសនីជ្រលង ៣៖ ប្រាជ្ញារបស់ប្រទេសចិនក្នុងការគ្រប់គ្រងធនធានទឹកទាក់ទាញការចាប់អារម្មណ៍យ៉ាងខ្លាំង

កាលពីថ្ងៃទី ២៤ ខែកញ្ញា វេទិកាស្តីពីកិច្ចសហប្រតិបត្តិការធនធានទឹក ឡានឆាង-មេគង្គ លើកទី ៤ បានប្រារព្ធនៅទីក្រុងអ៊ូហាន ខេត្តហ៊ូប៉េ។ ក្នុងឱកាសវេទិកានេះ គណៈប្រតិភូជាន់ខ្ពស់ដែលមកពីបណ្តាប្រទេសទន្លេមេគង្គ បានអញ្ជើញទៅទស្សនាទំនប់វារីអគ្គិសនីជ្រលង ៣ នៅទីក្រុងយីឆាង ខេត្តហ៊ូប៉េ។

ឯកឧត្តម Chanthanet Boualapha អនុរដ្ឋមន្ត្រីក្រសួងកសិកម្ម និងបរិស្ថានឡាវ បានមានប្រសាសន៍ថា នេះគឺជាទំនប់ទឹកពហុមុខងារដែលអាចធ្វើនាវាចរណ៍ គ្រប់គ្រងទឹកជំនន់ ធ្វើការស្រោចស្រព និងផលិតថាមពលអគ្គិសនីបាន។ ឯកឧត្តមជឿជាក់ថា គម្រោងនេះអាចផ្តល់បទពិសោធន៍ដ៏មានតម្លៃសម្រាប់តំបន់ទន្លេមេគង្គ។ ឯកឧត្តមបានបន្ថែមថា ការរៀនសូត្រពីបទពិសោធន៍របស់ទំនប់វារីអគ្គិសនីជ្រលង ៣ ក្នុងការគ្រប់គ្រង និងការព្រមានជាមុនលើទឹកជំនន់ ពិតជាមានសារៈសំខាន់ក្រៃលែងសម្រាប់ពួកយើងក្នុងដោះស្រាយបញ្ហាផ្សេងៗឱ្យបានកាន់តែជោគជ័យ។ ជាពិសេស យើងក៏គួររៀនសូត្រពីវិធីសាស្ត្ររបស់ទំនប់វារីអគ្គិសនីជ្រលង ៣ ក្នុងការប្រើប្រាស់វារីអគ្គីសនីតាមបែបវិទ្យាសាស្ត្រផងដែរ។

ឯកឧត្តមបានបញ្ជាក់ទៀតថា ការតាំងទីលំនៅថ្មីសម្រាប់ប្រជាជននៃគម្រោងទំនប់វារីអគ្គិសនីជ្រលង ៣ ក៏បានទទួលសមិទ្ធផលជាច្រើនក្នុងការធានាជីវភាពរស់នៅរបស់ប្រជាជន ដែលបានផ្តល់កិច្ចធានា និងលើកកម្ពស់ជីវភាពរស់នៅរបស់ប្រជាជនក្នុងតំបន់ តាមរយៈការគាំទ្រការសាងសង់សាលារៀន និងមន្ទីរពេទ្យ ព្រមទាំងការអនុវត្តគោលនយោបាយអភិវឌ្ឍឧស្សាហកម្មជាដើម។

ឯកឧត្តម Surasri Kidtimonton អគ្គលេខាធិការនៃការិយាល័យជាតិធនធានទឹកប្រទេសថៃ បានមានប្រសាសន៍បញ្ជាក់ថា ក្រៅពីការគ្រប់គ្រងទឹកជំនន់ និងការបង្កើតថាមពលស្អាត អាងស្តុកទឹកនេះក៏បានរួមចំណែកក្នុងការអនុវត្តគម្រោងបង្ហូរទឹកពីខាងត្បូងទៅខាងជើង ដែលបានបញ្ជូនធនធានទឹកទៅកាន់តំបន់ដែលមានតម្រូវការចាំបាច់។ ឯកឧត្តមចាប់អារម្មណ៍ជាពិសេសលើបច្ចេកទេសសម្រាប់នាវាធ្វើដំណើរឆ្លងកាត់ទំនប់ទឹក ដោយបានបញ្ជាក់ថា នេះគឺជាបច្ចេកទេសដែលយើងអាចរៀនសូត្រ និងអនុវត្តបាននៅក្នុងប្រទេសថៃ។

ឯកឧត្តម ចូវ ជឺវៃ ប្រធានមជ្ឈមណ្ឌលសហប្រតិបត្តិការធនធានទឹក ឡានឆាង-មេគង្គ បានមានប្រសាសន៍ថា គោលបំណងនៃការអញ្ជើញតំណាងមកពីប្រទេសទន្លេមេគង្គឱ្យមកទស្សនាតំបន់នេះ គឺដើម្បីជួយពួកគេឱ្យយល់ដឹងកាន់តែច្បាស់អំពីគោលគំនិត និងបច្ចេកទេសនៃការគ្រប់គ្រងធនធានទឹករបស់ប្រទេសចិន និងចែករំលែកបទពិសោធន៍របស់ចិនដើម្បីជួយបណ្តាប្រទេសនានាឱ្យកំណត់គោលនយោបាយ និងធ្វើការអនុវត្តជាក់ស្តែងដោយស្របតាមលក្ខណៈជាតិរៀងៗខ្លួន។ ឯកឧត្តមបានសង្កត់ធ្ងន់ថា នេះនឹងជំរុញឱ្យប្រទេសទាំង ៦ រួមគ្នាលើកកម្ពស់អភិបាលកិច្ចធនធានទឹក និងពន្លឿនការសម្រេចបាននូវគោលដៅដែលទាក់ទងនឹងធនធានទឹកនៃរបៀបវារៈប្រចាំឆ្នាំ ២០៣០ របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព។

បើសម្លឹងមើលទៅអនាគត ឯកឧត្តម ចូវ ជឺវៃ បានថ្លែងថា យើងគួរតែធ្វើការរួមគ្នាដើម្បីដោះស្រាយបញ្ហាប្រឈមអំពីធនធានទឹកក្នុងដំណើរការធ្វើទំនើបភាវូនីយកម្ម និងបន្តជំរុញការអនុវត្ត "ផែនការសកម្មភាពរយៈពេល ៥ ឆ្នាំអំពីកិច្ចសហប្រតិបត្តិការធនធានទឹក ឡានឆាង-មេគង្គ (២០២៣-២០២៧)"។

ឯកឧត្តមបានអំពាវនាវឱ្យប្រទេសទាំង ៦ ពង្រឹងការសម្របសម្រួលគោលនយោបាយអំពីអភិបាលកិច្ចធនធានទឹក ហើយរួមចំណែកក្នុងការកសាង "កិច្ចសហប្រតិបត្តិការ ឡានឆាង-មេគង្គ ២.០" ដែលមានលក្ខណៈរួមសាមគ្គីនិងសហប្រតិបត្តិការគ្នា បើកចំហនិងឈ្នះ-ឈ្នះ ធ្វើការច្នៃប្រឌិតបៃតង និងរក្សាសុខសន្តិភាព តាមរយៈការធ្វើកិច្ចសហប្រតិបត្តិការធនធានទឹកដែលប្រកបដោយសមិទ្ធផលជាផ្លែផ្កា។