ប្រទេសចិននឹងបង្កើនការវិនិយោគលើកិច្ចសហប្រតិបត្តិការជាមួយតំបន់កំណើនខាងកើតចិន-អាស៊ាន អនុតំបន់ទន្លេឡានឆាង-មេគង្គ និងអនុតំបន់មួយចំនួនទៀត

កាលពីថ្ងៃទី ៨ ខែតុលា ឯកឧត្តម យ៉ាន តុង អនុរដ្ឋមន្ត្រីក្រសួងពាណិជ្ជកម្មចិន បានថ្លែងក្នុងសន្និសីទសារព័ត៌មានដែលរៀបចំដោយការិយាល័យព័ត៌មាននៃក្រុមប្រឹក្សាកិច្ចការរដ្ឋចិនថា ប្រទេសចិននឹងបង្កើនការវិនិយោគលើកិច្ចសហប្រតិបត្តិការជាមួយតំបន់កំណើនខាងកើតចិន-អាស៊ាន តំបន់ទន្លេឡានឆាង-មេគង្គ និងអនុតំបន់មួយចំនួនទៀត ដើម្បីពង្រឹងកម្លាំងចលករសម្រាប់កិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមករវាងប្រទេសចិន និងអាស៊ាន។

ពិព័រណ៍ចិន-អាស៊ានលើកទី ២២ នឹងប្រារព្ធឡើងនៅទីក្រុងណាននីង តំបន់ស្វយ័តក្វាងស៊ី ប្រទេសចិន ក្នុងអំឡុងពីថ្ងៃទី ១៧ ដល់ទី ២១ ខែកញ្ញា ដែលក្រុមហ៊ុនប្រមាណ ៣២០០ មកពីប្រទេសចំនួន  ៤៥ នឹងចូលរួមក្នុងពិព័រណ៍នេះ។

ឯកឧត្តម យ៉ាន តុង បានថ្លែងថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិន និងអាស៊ានបានរក្សានិន្នាការអភិវឌ្ឍសេដ្ឋកិច្ច និងពាណិជ្ជកម្មយ៉ាងល្អប្រសើរ។ ប្រទេសចិននឹងបន្តជំរុញការកសាង និងលើកកម្ពស់តំបន់ពាណិជ្ជកម្មសេរីចិន-អាស៊ាន និងអនុវត្ត"កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់"ប្រកបដោយគុណភាពខ្ពស់។

លើសពីនេះទៀត ប្រទេសចិននឹងពង្រីកការនាំចូលផលិតផលពិសេសរបស់ប្រទេសអាស៊ានដូចជាផ្លែឈើត្រូពិច និងកាហ្វេជាដើម ទន្ទឹមនឹងនេះដែរ ប្រទេសចិននឹងធ្វើឱ្យស៊ីជម្រៅនូវកិច្ចសហប្រតិបត្តិការពាណិជ្ជកម្មអេឡិចត្រូនិកឆ្លងដែនជាមួយបណ្តាប្រទេសអាស៊ាននានា ដើម្បីចាក់បញ្ចូលនូវថាមពលថ្មីសម្រាប់ការអភិវឌ្ឍពាណិជ្ជកម្ម។

ឯកឧត្តម យ៉ាន តុង ក៏បានមានប្រសាសន៍បញ្ជាក់ផងដែរថា ភាគីចិននឹងពន្លឿនការកសាងច្រកពាណិជ្ជកម្មផ្លូវគោក និងសមុទ្រអន្តរជាតិថ្មី ពង្រឹងភាពធន់ និងភាពរស់រវើករបស់វា ហើយរួមសហការជាមួយប្រទេសអាស៊ានក្នុងការរក្សាលំហូររលូននៃផលិតផល និងសេវាកម្មសំខាន់ៗ សម្របសម្រួលគ្នាដើម្បីដោះស្រាយបញ្ហាប្រឈមនានាដូចជាការផ្តាច់ខ្សែសង្វាក់ផ្គត់ផ្គង់ជាដើម ព្រមទាំងបង្កើតប្រព័ន្ធផលិតកម្ម និងខ្សែសង្វាក់ផ្គត់ផ្គង់ក្នុងតំបន់ដែលកាន់តែមានស្ថិរភាព ភាពរលូន និងមានឧត្តមភាព។