ព្រឹត្តិការណ៍តភ្ជាប់បេះដូងប្រជាជន ផ្លូវរថភ្លើងចិន-ឡាវ "សប្តាហ៍ឡានឆាង-មេគង្គ" ឆ្នាំ ២០២៥ ប្រារព្ធនៅប្រទេសឡាវ

ពេលថ្មីៗនេះ ព្រឹត្តិការណ៍ "រួមគ្នានិយាយអំពីផ្លូវរថភ្លើង ឡានឆាង-មេគង្គ និងបុរីវេទមន្តចាប់ដៃជាមួយបុរីបុរាណ" នៃកម្មវិធី "សប្តាហ៍ឡានឆាង-មេគង្គ" ឆ្នាំ ២០២៥ បានចាប់ផ្តើមនៅហ្លួងព្រះបាង ប្រទេសឡាវ ក្រោមប្រធានបទ "តភ្ជាប់ផ្លូវរថភ្លើង តភ្ជាប់បេះដូងប្រជាជន" ដើម្បីបង្ហាញពីកិច្ចសហប្រតិបត្តិការស៊ីជម្រៅ និងទំនាក់ទំនងរវាងប្រជាជន និងប្រជាជននៃប្រទេសចិន និងឡាវ ក្រោមគំនិតផ្តួចផ្តើម "ខ្សែក្រវាត់ និងផ្លូវ" តាមរយៈកិច្ចសន្ទនាពហុកម្រិត និងការផ្លាស់ប្តូរវប្បធម៌។

ព្រឹត្តិការណ៍នេះត្រូវបានរៀបចំរួមគ្នាដោយសាកលវិទ្យាល័យបច្ចេកវិទ្យាប្រើប្រាស់សៀងហៃ និងសាកលវិទ្យាល័យស៊ូផានូវង្សនៃប្រទេសឡាវ។ លោក វ៉ាង ធុង សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សខេត្តហ្លួងព្រះបាង និងជាអភិបាលក្រុងហ្លួងព្រះបាង បានថ្លែងថា ក្រោយពីបានដាក់ឱ្យដំណើរការនូវផ្លូវរថភ្លើងឡាវ-ចិន កិច្ចសហប្រតិបត្តិការរវាងហ្លួងព្រះបាង និងទីក្រុងសៀងហៃកាន់តែមានភាពស្អិតរមួត។ និស្សិតឡាវពីរក្រុមបានទៅបន្តការសិក្សានៅទីក្រុងសៀងហៃ ដើម្បីរៀនសូត្រពីបច្ចេកវិទ្យាផ្លូវដែក ហើយបន្ទាប់ពីត្រឡប់ទៅប្រទេសឡាវវិញ ពួកគេបានក្លាយជាកម្លាំងស្នូលសម្រាប់ការសាងសង់ផ្លូវរថភ្លើងឡាវ-ចិន។ ផ្លូវរថភ្លើងនេះមិនត្រឹមតែនាំមកនូវឱកាសអភិវឌ្ឍន៍ប៉ុណ្ណោះទេ ប៉ុន្តែថែមទាំងធ្វើប្រជាជននៃប្រទេសទាំងពីរកាន់តែមានភាពជិតស្និទ្ធទៀតផង។

លោក ចាំង ស៊ឺភីង អគ្គកុងស៊ុលប្រទេសចិនប្រចាំនៅហ្លួងព្រះបាង បានលើកឡើងថា ផ្លូវរថភ្លើងចិន-ឡាវជាផ្លូវអភិវឌ្ឍន៍ ផ្លូវមិត្តភាព និងជាស្ពានសម្រាប់បណ្តុះបណ្តាលធនធានមនុស្សផង។ កិច្ចសហប្រតិបត្តិការប្រកបដោយប្រសិទ្ធភាពរវាងប្រទេសទាំងពីរ ទីក្រុងទាំងពីរ និងសាកលវិទ្យាល័យទាំងពីរ នឹងជួយបណ្ដុះបណ្ដាលធនធានមនុស្សដែលមានជំនាញបច្ចេកទេសវិស្វកម្មគុណភាពខ្ពស់កាន់តែច្រើនសម្រាប់ការសាងសង់ផ្លូវរថភ្លើងចិន-ឡាវ និងការអភិវឌ្ឍសេដ្ឋកិច្ច និងសង្គមនៃប្រទេសឡាវ ធ្វើឱ្យកាន់តែស៊ីជម្រៅថែមទៀតនូវទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសចិន និងឡាវ និងជំរុញកិច្ចសហប្រតិបត្តិការឡានឆាង-មេគង្គឱ្យឈានដល់កម្រិតថ្មីមួយ។

គួរបញ្ជាក់ថា កម្មវិធី "សប្តាហ៍ ឡានឆាង-មេគង្គ" នេះនឹងបង្កើតគម្រោងផ្លាស់ប្តូរមួយចំនួនធំសម្រាប់យុវជន តាមរយៈគំរូ "ផ្លូវរថភ្លើង+" រួមមានការតាំងពិព័រណ៍ស្ថាបត្យកម្មប្រវត្តិសាស្ត្រ និងវប្បធម៌ ការរចនាបែបច្នៃប្រឌិត និងវិទ្យាសាស្ត្រអំពីការតភ្ជាប់ផ្លូវដែក ការស្វែងរករឿងរ៉ាវពាក់ព័ន្ធ និងការសន្ទនារបស់យុវជន ដើម្បីជំរុញការសិក្សា និងការអនុវត្តជាក់ស្តែងអំពី "ដំណើរការស្វែងយល់ពីផ្លូវរថភ្លើង ឡានឆាង-មេគង្គ"។