ឯកឧត្តមឯកអគ្គរដ្ឋទូត វ៉ាង វិនពីន អញ្ជើញចូលរួមកម្មវិធីផ្លាស់ប្តូរវប្បធម៌ កម្ពុជា-ចិន និងអបអរសាទរពិធីបុណ្យចូលឆ្នាំប្រពៃណីចិន

កាលពីថ្ងៃទី ១១ ខែមករា ពិធីបើកកម្មវិធីផ្លាស់ប្តូរវប្បធម៌ កម្ពុជា-ចិន និងអបអរសាទរពិធីបុណ្យចូលឆ្នាំប្រពៃណីចិន បានប្រារព្ធឡើងនៅរាជធានីភ្នំពេញនៃព្រះរាជាណាចក្រកម្ពុជា។ ឯកឧត្តម វ៉ាង វិនពីន ឯកអគ្គរដ្ឋទូតប្រទេសចិនប្រចាំប្រទេសកម្ពុជា និងលោក ជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈកម្ពុជា បានអញ្ជើញចូលរួម និងថ្លែងសុន្ទរកថាក្នុងពិធីនេះ។ ការបង្ហាញសិប្បកម្មប្រពៃណីចិន ការសម្តែងកម្មវិធីសិល្បៈប្រពៃណី ការតាំងពិព័រណ៍អាហារឆ្ងាញ់ៗ និងកម្មវិធីផ្សេងៗទៀត ត្រូវបានរៀបចំឡើងក្នុងឱកាសនេះ។ ឯកឧត្តម វ៉ាង វិនពីន បានមានប្រសាសន៍ថា ពិធីបុណ្យចូលឆ្នាំប្រពៃណីចិនតំណាងឱ្យការជូនពរដ៏ល្អបវរនៃការជួបជុំក្រុមគ្រួសារ ការលាឆ្នាំចាស់ទទួលស្វាគមន៍ឆ្នាំថ្មី និងការបួងសួងឱ្យមានសុខភាពល្អ ហើយបានបង្កប់នូវការស្វែងរកតម្លៃនៃសិរីមង្គល ភាពសុខដុមរមនា និងសុភមង្គល។ ក្នុងប៉ុន្មានឆ្នាំចុងក្រោយនេះ ពិធីបុណ្យចូលឆ្នាំប្រពៃណីចិនត្រូវបានដាក់បញ្ចូលក្នុងបញ្ជីថ្ងៃឈប់សម្រាកនៃអង្គការសហប្រជាជាតិ និងបញ្ជីបេតិកភណ្ឌវប្បធម៌អរូបីមនុស្សជាតិនៃអង្គការយូណេស្កូ។ មិត្តភក្តិខ្មែរក៏មានទំនៀមទម្លាប់នៃការប្រារព្ធពិធីបុណ្យចូលឆ្នាំប្រពៃណីចិនដែរ ដូចជាការបិទពាក្យទំនឹមអបអរឆ្នាំថ្មី ការរាំនាគ និងម៉ុងសាយ ព្រមទាំងកម្មវិធីអបអរសាទរគ្រប់ប្រភេទ ដែលអាចត្រូវបានគេមើលឃើញនៅគ្រប់ទីកន្លែង។ យើងអាចនិយាយបានថា ពិធីបុណ្យចូលឆ្នាំប្រពៃណីចិន គឺជាពិធីបុណ្យរួមសម្រាប់ប្រជាជនចិន និងកម្ពុជា ហើយក៏ជានិមិត្តរូបដ៏សំខាន់នៃចំណងមិត្តភាពរវាងប្រជាជនទាំងពីរដែរ។

កម្មវិធីអបអរសាទរនេះត្រូវបានរៀបចំឡើងនៅផ្សារធំៗចាប់ពីថ្ងៃទី ១១ ដល់ថ្ងៃទី ១២ ខែមករា ដែលជាការចាប់ផ្តើមនៃកម្មវិធីអបអរសាទរបុណ្យចូលឆ្នាំប្រពៃណីចិនឆ្នាំ ២០២៥។ បន្ទាប់មក កម្មវិធីអបអរសាទរពិធីបុណ្យចូលឆ្នាំប្រពៃណីជាច្រើននឹងត្រូវប្រារព្ធធ្វើនៅកន្លែងផ្សេងៗក្នុងរាជធានីភ្នំពេញ។