ឧបនាយករដ្ឋមន្ត្រីកម្ពុជា៖ កិច្ចសហប្រតិបត្តិការឡានឆាង-មេគង្គបង្រួញគម្លាតអភិវឌ្ឍន៍រវាងប្រទេសអាស៊ានថ្មី និងចាស់

កាលពីថ្ងៃទី ៥ ខែកញ្ញា ឯកឧត្តម វ៉ាង វិនពីន ឯកអគ្គរដ្ឋទូតប្រទេសចិនប្រចាំប្រទេសកម្ពុជា និងឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានចុះហត្ថលេខាលើកិច្ចព្រមព្រៀងអំពីគម្រោងសម្រាប់ប្រទេសកម្ពុជានៃមូលនិធិពិសេសនៃកិច្ចសហប្រតិបត្តិការឡានឆាង-មេគង្គឆ្នាំ ២០២៤ នៅរាជធានីភ្នំពេញ។

គម្រោងមូលនិធិពិសេសនៃកិច្ចសហប្រតិបត្តិការឡានឆាង-មេគង្គទាំង ៨ ដែលកម្ពុជាបានចុះហត្ថលេខានៅថ្ងៃនោះ បានទទួលជំនួយហិរញ្ញវត្ថុសរុបចំនួន ២ លានដុល្លារអាមេរិក ដែលគ្របដណ្តប់លើវិស័យជាច្រើនដូចជា “សប្តាហ៍ឡានឆាង-មេគង្គ” កិច្ចសហប្រតិបត្តិការអំពីការបោសសម្អាតមីន ទេសចរណ៍អេកូឡូស៊ី ការអប់រំវិជ្ជាជីវៈ និងការអភិវឌ្ឍកសិកម្មជាដើម។

ឯកឧត្តម វ៉ាង វិនពីន បានថ្លែងថា ភាគីចិនមានឆន្ទៈក្នុងការបន្តពង្រឹងកិច្ចសហប្រតិបត្តិការឱ្យកាន់តែស៊ីជម្រៅជាមួយភាគីកម្ពុជាលើវិស័យផ្សេងៗក្រោមក្របខណ្ឌឡានឆាង-មេគង្គ ជាពិសេសគឺអនុវត្តគម្រោងតូចៗតែមានស្រស់ដ៏ស្រស់ស្អាតកាន់តែច្រើន ដើម្បីជំរុញឱ្យលទ្ធផលនៃកិច្ចសហប្រតិបត្តិការអាចជួយដល់ការអភិវឌ្ឍសេដ្ឋកិច្ច និងសង្គមកិច្ចនៃប្រទេសកម្ពុជា ព្រមទាំងផ្តល់ផលប្រយោជន៍កាន់តែច្រើនដល់ប្រជាពលរដ្ឋក្នុងតំបន់។

ឯកឧត្តម សុខ ចិន្តាសោភា បានមានប្រសាសន៍វាយតម្លៃខ្ពស់ចំពោះលទ្ធផលនៃកិច្ចប្រជុំថ្នាក់រដ្ឋមន្ត្រីការបរទេសស្តីពីកិច្ចសហប្រតិបត្តិការឡានឆាង-មេគង្គលើកទី ៩ ដែលធ្វើឡើងនៅប្រទេសថៃកាលពីពេលថ្មីៗនេះ ហើយបានប្រកាសជាថ្មីឡើងវិញនូវការប្តេជ្ញាចិត្តរបស់កម្ពុជាក្នុងការពួតដៃគ្នាជាមួយគ្រប់ភាគីក្នុងតំបន់ ដើម្បីកសាងសហគមន៍វាសនារួមទន្លេឡានឆាង-មេគង្គដែលមានសុខសន្តិភាព វិបុលភាព និងការអភិវឌ្ឍប្រកបដោយនិរន្តរភាព។

ឯកឧត្តមបានគូសបញ្ជាក់ថា បច្ចុប្បន្ន អាស៊ានមានប្រទេសសមាជិកចំនួន ១០ ក្នុងនោះ ប្រទេសមីយ៉ាន់ម៉ា វៀតណាម ឡាវ និងកម្ពុជា ជាប្រទេសអាស៊ានថ្មី។ យន្តការនៃកិច្ចសហប្រតិបត្តិការឡានឆាង-មេគង្គមិនត្រឹមតែអាចជួយជំរុញការអភិវឌ្ឍសេដ្ឋកិច្ចនៃប្រទេសក្នុងតំបន់ និងលើកកម្ពស់ជីវភាពរស់នៅរបស់ប្រជាជនក្នុងប្រទេសផ្សេងៗប៉ុណ្ណោះទេ ប៉ុន្តែអ្វីដែលសំខាន់ជាងនេះទៅទៀតគឺ វាអាចបង្រួញនូវគម្លាតអភិវឌ្ឍន៍រវាងប្រទេសអាស៊ានថ្មី និងប្រទេសអាស៊ានចាស់។