យោងតាមទិន្នន័យដែលប្រកាសដោយក្រសួងពាណិជ្ជកម្មចិនកាលពីថ្ងៃទី ៣ ខែសីហាឱ្យដឹងថា នៅឆមាសទីមួយនៃឆ្នាំ ២០២៣ ពាណិជ្ជកម្មសេវាកម្មរបស់ប្រទេសចិនបានបន្តរក្សានិន្នាការកើនឡើងដ៏ល្អប្រសើរ ។ ទំហំនាំចេញនាំចូលសរុបខាងពាណិជ្ជកម្មសេវាកម្មរបស់ប្រទេសចិនមានចំនួន ៣,១៣៥៨៤ ទ្រីលានយាន់ប្រាក់ចិនដែលបានកើនឡើង ៨,៥ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ។
តាមទិន្នន័យបង្ហាញឱ្យឃើញថា នៅឆមាសទីមួយឆ្នាំនេះ ការនាំចេញខាងពាណិជ្ជកម្មសេវាកម្មរបស់ចិនមានចំនួន ១,៣២៣២២ ទ្រីលានយាន់ប្រាក់ចិនដែលបានធ្លាក់ចុះ ៥,៩ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ទំហំនាំចូលមានចំនួន ១,៨១២៦២ ទ្រីលានយាន់ប្រាក់ចិនដែលបានកើនឡើង ២២, ១ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ចំណែកឯឱនភាពពាណិជ្ជកម្មសេវាកម្មមានចំនួន ៤៨,៩៤ ម៉ឺនលានយាន់ប្រាក់ចិន ។ និយាយជារួម វាលេចចេញលក្ខណៈពិសេសដូចខាងក្រោម៖
សមាមាត្រនៃពាណិជ្ជកម្មសេវាកម្មដែលផ្អែកលើជំនាញបានកើនឡើង ។ នៅឆមាសទីមួយឆ្នាំនេះ ការនាំចេញនាំចូលពាណិជ្ជកម្មសេវាកម្មដែលផ្អែកលើជំនាញមានចំនួន ១,៣៦៣៩២ ទ្រីលានយាន់ប្រាក់ចិនដែលបានកើនឡើង ១២,៣ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ។ លើសពីនេះទៅទៀត មុខរបរសេវាទេសចរណ៍កំពុងងើបឡើងវិញយ៉ាងច្បាស់លាស់ ។ នៅឆមាសទីមួយនៃឆ្នាំ ២០២៣ ទំហំនាំចេញនាំចូលខាងសេវាកម្មទេសចរណ៍មានចំនួន ៦៥,០៩៤ ម៉ឺនលានយាន់ប្រាក់ចិន បានកើនឡើង ៦៥,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ។ ក្នុងនោះ ការនាំចេញកើនឡើង ៥២,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ចំណែកឯការនាំចូលកើនឡើង ៦៦,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ៕