នៅថ្ងៃទី ១៣ ខែកក្កដា ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានបើកធ្វើសន្និសីទប្រកាសព័ត៌មាន ។ អ្នកទទួលខុសត្រូវពាក់ព័ន្ធនៃអគ្គនាយកដ្ឋានគយចិនបានថ្លែងថា នៅឆមាសទីមួយឆ្នាំនេះ ការនាំចេញនាំចូលរបស់ចិនបានកើនឡើង ២,១ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ដែលបានបំបែកកំណត់ត្រាថ្មីក្នុងរយៈពេលដូចគ្នានៃប្រវត្តិសាស្ត្រ ។ ហេតុនេះ ការនាំចេញនាំចូលខាងពាណិជ្ជកម្មជាមួយបរទេសនៃប្រទេសចិនបានលើកកម្ពស់គុណភាពប្រកបដោយស្ថិរភាពដែលសមស្របនឹងការប៉ាន់ប្រមាណ ។
តាមស្ថិតិរបស់គយចិនបានឱ្យដឹងថា នៅឆមាសទីមួយឆ្នាំនេះ ទំហំពាណិជ្ជកម្មទំនិញនាំចេញនាំចូលរបស់ចិនមានចំនួន ២០,១ ទ្រីលានយាន់ប្រាក់ចិនដែលកើនឡើង ២,១ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ក្នុងនោះ ការនាំចេញមានចំនួន ១១,៤៦ ទ្រីលានយាន់ប្រាក់ចិន បានកើនឡើង ៣,៧ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ចំណែកការនាំចូលមានចំនួន ៨,៦៤ ទ្រីលានយាន់ប្រាក់ចិនដែលធ្លាក់ចុះ ០,១ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ។
ក្នុងពេលដំណាលគ្នា ទំហំនាំចេញនាំចូលរបស់ប្រទេសចិនជាមួយអាស៊ានដែលជាដៃគូពាណិជ្ជកម្មធំទីមួយរបស់ចិនមានចំនួន ៣,០៨ ទ្រីលានយាន់ប្រាក់ចិន បានកើនឡើង ៥,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ។ ទំហំនាំចេញនាំចូលរបស់ប្រទេសចិនជាមួយសហភាពអឺរ៉ុបមានចំនួន ២,៧៥ ទ្រីលានយាន់ប្រាក់ចិន បានកើនឡើង ១,៩ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២២ ។ ទំហំនាំចេញនាំចូលរបស់ប្រទេសចិនជាមួយប្រទេសតាមបណ្តោយ"ខ្សែក្រវាត់និងផ្លូវ"បានកើនឡើង ៩,៨ ភាគរយបើប្រៀបធៀបរយៈពេលដូចគ្នានៃឆ្នាំ ២០២២ ។ ដោយឡែកទំហំនាំចេញនាំចូលរបស់ប្រទេសចិនជាមួយរដ្ឋសមាជិកចំនួន ១៤ ផ្សេងទៀតនៃកិច្ចព្រមព្រៀង RCEP បានកើនឡើង ១,៥ ភាគរយបើប្រៀបធៀបរយៈពេលដូចគ្នានៃឆ្នាំ ២០២២ ៕